Brent ماركالى مۇناي باعاسىنىڭ باررەلىنە 80 دوللار بولىپ تۇزىلۋىنە قاتىستى ەلىمىزدىڭ ۇلتتىق بانكى تەڭگەنى 15،5 پايىزعا قۇنسىزداندىرۋى مۇمكىن. بۇدان بارىپ ءبىر دوللاردىڭ قۇنى 220 تەڭگەنى قۇراۋى عاجاپ ەمەس. Nur.kz جاڭالىقتارى جازۋىنشا، بۇل تۋرالى بۇگىن قازاقستان-رەسەي قور نارىعىنىڭ جايىن باقىلاپ، باعدارلاپ وتىراتىن Renaissance Capital اقپاراتتىق قارجىلىق ورتالىعى وسىنداي مالىمەت تاراتقان.
اتالمىش ورتالىق ماماندارىنىڭ پايىمداۋىنشا، قازاقستاننىڭ جالپى ىشكى ءونىمى مۇناي باعامى باررەلىنە 100 دوللار بولعاندا 4،8-4،5 پايىز بولۋى كەرەك. دەگەنمەن الەمدىك بيرجادا مۇناي باعامىنىڭ ءار اپتا سايىن تومەندەپ جاتقانىن ەسكەرسەك، 2015 جىلى قازاقستاننىڭ جالپى ىشكى ءونىمى 4،1 پايىزدى قۇراۋى ابدەن مۇمكىن ەكەن. ۇلتتىق بانك مۇنداي جاعدايدا تەڭگەنى 15،5 پايىزعا قۇنسىزداندىرۋى مۇمكىن. بۇدان بارىپ ءبىر اقش دوللارى 220 تەڭگەنى قۇرايدى. يمپورت-ەكسپورت ارا-قاتىناسىن رەتتەۋ ءۇشىن قازاقستان وسىنداي قادامعا بارۋى عاجاپ ەمەس.
بۇعان قوسا ماماندار قازاقستان ءۇشىن تومەندەگىدەي جايسىز اقپارات تارتقان: "ەگەر مۇنايدىڭ ءبىر باررەلى 2015 جىلى 60 دوللاردى قۇرايتىن بولسا، وندا قازاقستاننىڭ ءجىو كۇرت تومەندەيدى. ال 2015 جىلى مۇناي باعاسى 50 دوللاردان تومەندەسە، وندا ەلدىڭ ەكونوميكاسى قۇلدىرايدى. بۇل 2009 جىلعى ورىن العان قارجىلىق داعدارىستى قايتىپ اكەلەدى. مۇناي باعاسىنىڭ تومەندەۋىنە قاتىستى ەكونوميكالىق جاعدايدىڭ ۋشىعا تۇسەدى. سوندىقتان بۇل ءبىراز ەلدەرگە اۋىر سوققى بولادى"
ال الەم ەلدەرىن الاڭداتقان قارا التىن قۇنىنداعى وزگەرىسكە باس قاتىرۋدى قاجەت دەپ تاپپايتىن ەلدەر دە بار. ماسەلەن، وپەك-كە مۇشە مۇناي ءوندىرۋشى الپاۋىتتاردىڭ ءبىرى ساۋد ارابياسى الداعى ۋاقىتتا مۇناي قۇنى باررەلىنە 90 تۇرماق، 80 دوللارعا تۇسسە دە، مۇرتىمىزدى بالتا شاپپايدى دەگەندەي سىڭاي تانىتىپ وتىر ەكەن. ءتىپتى، اراب ەلى باعانىڭ قۇلدىراۋىنان پايدا دا تابۋعا نيەتتى. ويتكەنى باعانىڭ تومەندەۋىنەن وندىرۋشىلەر جاڭا ينۆەستيسيا تارتۋدى توقتاتادى. بۇل مۇنايدى مۇحيت تۇبىندەگى تەرەڭدىكتەن، ءتىپتى اقش-تاعى قاتپارلى مۇناي كەن ورىندارىنان ءوندىرۋ جوباسىن دا توقىراتۋى ىقتيمال. وپەك ەلدەرىنە تيەسىلى مۇنايدىڭ ۇشتەن ءبىر بولىگى ساۋد ارابياسىنىڭ ەنشىسىندە. باعانى ودان ءارى قۇلدىراتپاس ءۇشىن، كوپتەگەن ەلدەر مۇناي كولەمىن قىسقارتىپ جاتىر. ال كۇنىنە 9،7 ملن باررەل مۇناي وندىرەتىن ساۋد ارابياسى بيلىگى ول جايىندا ءتىپتى ويلانبايدى.
قامشى-اقپارات
