قازاق ءتىلىن Google Translate جۇيەسىنە قوسۋ جوباسى ەكىنشى كەزەڭگە ءوتتى. Bnews.kzء-تىڭ حابارلاۋىنشا، بۇل تۋرالى بۇگىن ورتالىق كوممۋنيكاسيالار قىزمەتىندە وتكەن بريفينگتە «WikiBilim» قورى قامقورشىلار كەڭەسىنىڭ ءتوراعاسى راۋان كەنجەحان ۇلى ءمالىم ەتكەن.

 «وسى باستامانى قولعا العان كەزدە Google-مەن بايلانىسقا شىقتىق، ولار بۇل جۇمىستى وزدەرى جاساي المايتىندىعىن، ءبىراق پلاتفورمانىڭ جاڭا ءتىلدى قابىلداۋعا دايىن ەكەنىن جەتكىزدى. ءبىراق بۇل ءۇشىن سول تىلدە سويلەيتىن ورتانىڭ ءوزى جۇيەنى اعىلشىن جانە قازاق تىلدەرىندەگى وتە كوپ، قاتەسىز اۋدارما ماتەريالدارمەن قامتاماسىز ەتۋ كەرەك بولدى. سونىڭ نەگىزىندە Google-دىڭ اۋدارما جۇيەسى قازاق ءتىلىن يگەرىپ الىپ كەتە الادى. بۇل جۇمىستىڭ ءبارى اتقارىلدى. ءبىرىنشى كەزەڭدە وتە كوپ ماتىندەر سالىندى»، - دەيدى راۋان كەنجەحان ۇلى.

«ەكىنشى كەزەڭدە Google بىزگە حابار بەرىپ، ەندى جاسالعان اۋدارمالاردى باعالاۋ كەرەك دەگەن ءوتىنىش ايتتى. بيلاين قازاقستان كومپانياسىنىڭ كومەگىمەن ءتىلشى ماماندار ارالاسىپ، اۋدارما ساپاسىن ءبىر رەت باعالاپ شىقتىق. ەندى اۋدارمالاردى تاعى ءبىر رەت قاراپ، ولاردى بەكىتۋ كەرەك. بۇگىنگى مۇمكىندىكتى پايدالانىپ، تىلگە جانى اشيتىن قاۋىمداستىققا تاعى ءبىر مارتە ءوتىنىش ايتقىمىز كەلىپ وتىر. وسى جۇيەگە كىرىپ، اۋدارماعا باعا بەرىپ، دۇرىس بولسا ونى قۇپتاپ، ودان دا كوبىرەك ەڭبەك سىڭىرۋگە ۋاقىت جانە كۇش بولسا، قوسىشا اۋدارما جاساۋ ارقىلى وسى جۇيەنى تەزىرەك ىسكە قوسۋعا اتسالىسۋعا بولادى»، - دەگەن ءوتىنىشىن بىلدىرەدى ر.كەنجەحان ۇلى.

ءتىل جاناشىرلارى http://translate.google.kz/community سىلتەمەسى ارقىلى ءوتىپ، «Google Translate + Kazakh» جوباسىنا ءوز ۇلەسىن قوسا الادى. ەل ازاماتتارى نەمقۇرايلىلىق تانىتپاي، بۇل يگى ىسكە ءبىر ادامداي جۇمىلسا، قازاق ءتىلى Google Translate جۇيەسىنە 2014 جىلدىڭ سوڭىنا دەيىن قوسىلادى.

قامشى-اقپارات