قازاقستاندا ەبولا قىزباسىنىڭ تابيعي وشاقتارىنىڭ تامىر جايۋى جانە ەپيدەميالىق تارالۋى ءۇشىن ەشقانداي جاعدايلار جوق. Nur.kzء-تىڭ جازۋىنشا، بۇل تۋرالى ۇلتتىق ەكونوميكا مينيسترلىگى تۇتىنۋشىلار قۇقىعىن قورعاۋ كوميتەتىنىڭ ءتوراعاسى ءالياقپار ماتىشيەۆ ءمالىم ەتتى.
"قازاقستاندا ەبولا قىزباسىنىڭ تابيعي وشاقتارىنىڭ تامىر جايۋى جانە ەپيدەميالىق تارالۋى ءۇشىن ەشقانداي جاعدايلار جوق. ەگەر قانداي دا ءبىر ءقاۋىپ تونە قالسا، ءبىزدىڭ مەديسينالىق مەكەمەلەرىمىز ۆيرۋستى جۇقتىرعان ادامدى دەرەۋ انىقتاپ، ونى وقشاۋلاپ، ەمدەۋگە دايىن تۇر"، - دەپ حابارلاعان كوميتەت ءتوراعاسى جۋرناليستەرگە. كوميتەت ءتوراعاسىنىڭ ايتۋىنشا، ەلىمىزگە شەتەلدەردەن ەبولا ۆيرۋسىنىڭ كىرىپ كەتپەۋىن قامتاماسىز ەتۋ ءۇشىن قاجەتتى سانيتارلىق-ەپيدەمياعا قارسى شارالار كەشەنى جاسالعان. شەكارالارداعى بارلىق وتكىزۋ اۋماقتارىندا سانيتارلىق-كارانتيندىك باقىلاۋ كۇشەيتىلگەن.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرىنە سۇيەنسەك، 10 قازانداعى جاعداي بويىنشا ەبولا ۆيرۋسىن جۇقتىرعان 8399 ادام تىركەلگەن. ولاردىڭ 4033ء-ى قايتىس بولدى. بۇل اۋرۋدىڭ ناقتى ەمى ازىرگە تابىلا قويمادى.
قامشى-اقپارات
