2017 جىلدىڭ 9 ماۋسىمى قازاق جۇرتشىلىعى ءۇشىن تاريحي ساتكە تولىقتى. كوپتەن كۇتكەن «ەكسپو-2017» كورمەسى اشىلىپ، ەلىمىزدىڭ بار الەمگە باسقاشا قىرىنان تانىلۋىنا مۇمكىندىك تۋدى. كورمەدە الەمنىڭ ۇزدىك تەحنولوگيالارى مەن تاجىريبەسى، بالامالى ەنەرگيا كوزدەرىن پايدالانۋ سالاسىنداعى جەتىستىكتەر پاش ەتىلەدى. 115 مەملەكەت، ونىڭ ىشىندە اقش، جۇڭگو، ۇلىبريتانيا، فرانسيا، گەرمانيا، رەسەي، جاپونيا، وڭتۇستىك كورەيا سەكىلدى ەلدەر بار، سونداي-اق 22 حالىقارالىق ۇيىم ەكسپو-2017 كورمەگە قاتىساتىنىن رەسمي تۇردە راستاعان.

قانشا ايدان بەرى تىنىمسىز دايىندىق ۇستىندە بولعان مەملەكەتىمىزدىڭ ءۇمىتى، سەنىمى اقتالار. الايدا تاريحي كورمەگە جۇمسالعان قاراجاتتى ەل ازاماتتارىنان بولەك، وزگە مەملەكەت باسشىلارى دا ءسوز قىلدى. ماسەلەن، قىرعىزستان پرەزيدەنتى المازبەك اتامبايەۆ.
 

«ەگەر ءبىز استانداعى سەكىلدى كورمەنىڭ ۇيىمداستىرىلۋىنا $3 ملرد. جۇمساعانىمىزدا، مەنى تىرىدەي ورتەپ جىبەرەر ەدى»، - دەگەن قىرعىزستان پرەزيدەنتى المازبەك اتامبايەۆ بىشكەكتەگى «تازا كووم» فورۋمىندا ب ا ق وكىلدەرىمەن كەزدەسۋى بارىسىندا، دەپ جازادى قامشى اقپاراتتىق اگەنتتىگى جەرگىلىكتى ب ا ق-قا سىلتەمە جاساپ.

«ءبىز دامىعان ەلدەرمەن قاتار ءجۇرۋىمىز كەرەكپىز. الايدا مەمەلكەتتەر اراسىنداعى تەڭسىزدىكتىڭ تۇرلەرى كوپ، سولاردىڭ ءبىرى – ساندىق تەحنولوگيا. بىزدە مۇناي جوق، گاز جوق، ءبىراق بىزدە بەرىك ءارى مىقتى ازاماتتىق قوعام بار، مۇنىمىزبەن مۇناي مەن گازدىڭ ورنىن باسا الامىز. بۇل – ءبىزدىڭ مۇمكىندىگىمىز»، دەپ قوستادى ول.

پرەزيدەنتتىڭ ايتۋىنشا، مەملەكەتتە ازىرگە قارجىنىڭ جەتىسپەۋشىلىگى ورىن الۋدا. مىسال رەتىندە استانادا وتكەن كورمە ءۇشىن ەل $3 ملرد. جۇمساعانىن كەلتىردى. «ءبىز قاراپايىم جول جوندەۋ ءۇشىن نەسيەگە ميلليارد الايىقشى، حالىق قالاي دا نارازىلىعىن تانىتادى. وتكەن جىلى كوشپەندىلەردىڭ ەكىنشى ويىنىن وتكىزۋىمىزگە $30 ملن. كەتكەن ەدى، حالىق بىردەن كوتەرىلدى. ال كورمە ءۇشىن 3 ملرد. جۇمساساق، حالىق مەنى تىرىدەي ورتەپ جىبەرەر. ءبىراق قاشانعى قارجى جاعىنان قىسىلىپ جۇرەمىز؟ مەملەكەتىمىز وسىپ-وركەندەۋ ءۇشىن، دامۋى ءۇشىن ءبىر ارەكەت قىلۋىمىز كەرەك. مۇناي مەن گازدىڭ جوقتىعىن ءبىز ادام الەۋەتىمەن تولتىرامىز»، دەپ قورىتىندىلادى ول.  

ايتا كەتەيىك، كەيبىر دەرەكتەرگە سايكەس، «ەكسپو-2017» كورمەسىنىڭ ۇيىمداستىرىلۋىنا $3 ملرد. كەتكەن.