بالاسىنان ايرىلۋ قاي اتا-اناعا بولسىن اۋىر بولاتىن ءسوزسىز. كەز-كەلگەن انا ءالى تۋىلماعان بالاسىن اسىعا كۇتىپ، ونىڭ كيىمدەرىن دايىنداپ، كۇن ساناپ جۇرەدى. الايدا سونشا كۇتكەن بالاسى ءولى تۋىلعان كەزدە انا جۇرەگىنىڭ قارس ايرىلىپ، قانداي كۇيگە دۋشار بولاتىنىن ءتىپتى كوز الدىنا ەلەستەتە دە، ءدال سول قينالعان اناداي سەزىنە دە المايسىز. ءارى ءوز بالاسىنىڭ ءولى تۋىلۋىنا ادامي فاكتور كەسىرىن تيگىزەتىن بولسا، ول ادامدى ءومىر باقي كەشىرمەي وتەتىنى انىق. 

يگور مەن ولەسيا ءوز بالاسىنان ايرىلعاندارىنا ءالى كۇنگە دەيىن سەنە الماي ءجۇر. ولار بالاسىنان دارىگەرلەردىڭ نەمقۇرايلىعىنىڭ كەسىرىنەن ايرىلدى. سابيىنەن ايرىلعان ولەسيانىڭ العاشقى جۇكتىلىك ۋاقىتى جاقسى ءوتىپ جاتتى. ول ۋاقىتىلى دارىگەرلەرگە كورىنىپ ءجۇردى، ال دارىگەرلەر بارلىعى جاقسى ەكەنىن ايتىپ قۋانتىپ جۇرگەن.

الايدا 41-اپتادا اياق استىنان ونىڭ ءىشى قاتتى اۋىرىپ، دارىگەرلەرگە تەكسەرىلۋ ءۇشىن اۋرۋحاناعا بارىپتى. ءبىراق دارىگەرلەر ەش قينالماستان، دەنساۋلىعىندا ەشقانداي كىنارات تاپپادىق ، نو-شپا ءدارىسىن قابىلدا دەپ كەڭەس بەرگەن.  سونىمەن بىرگە دارىگەرلەر كەز-كەلگەن اۋىرسىنۋ كەزىندە بولمايتىن نارسەگە  وزدەرىن مازالاماۋىن ەسكەرتكەن.

ولەسيانىڭ اۋىرسىنۋى ازداپ باسىلعانىمەن، ءبىراز كۇننەن كەيىن بالاسىن اۋىر جاعدايدا دۇنيەگە اكەلگەن.  العاشىندا جالعان تولعاق دەپ بەلگىسىز دارىلەر بەرىپ، تولعاقتى توقاتاتىن ەكپە سالعان. سودەن كەيىن دارىگەرلەرلەر ەش قينالماستان «ءسابيىڭىزدىڭ جاعدايى تىم اۋىر. ونىڭ ءومىر ءسۇرۋى مۇمكىن ەمەس. ءتىپتى تاڭعا دەيىن شىداماۋى مۇمكىن»،-دەپتى.  قانداي تاسجۇرەك ادام وسىنداي سوزدەردى ايتا الادى؟! وسى جاعدايدان كەيىن بايعۇس اناعا ەشقانداي پسيحولوگيالىق كومەك تە كورسەتىلمەگەن ەكەن. سابيىنەن ايرىلعان اتا-اناعا باس دارىگەر: «ەشتەڭە ەتپەيدى، ءالى جاسسىڭدار. تالاي بالانى دۇنيەگە اكەلەسىڭدەر»، - دەپتى.

سودان كەيىن اتا-اناسى بالاسىنىڭ دەنەسىن الىپ كەتىپ وزدەرى جەرلەپتى. وسى ىسكە بايلانىستى تەرگەۋ ىستەرى جۇرگىزىلىپ جاتىر. 

اۋدارعان: اسەل وتەشوۆا