الەۋمەتتىك جەلىدە «ەكسپو-2017» حالىقارالىق كورمەسىنىڭ اۋماعىندا ورانالاسقان مەيرامحانالاردىڭ بىرىندەگى تاماق ءمازىرىنىڭ باعاسى جازىلعان سۋرەتتەر پايدا بولدى، دەپ جازادى قامشى اقپاراتتىق اگەنتتىگى.

سۋرەتتەرگە نازار اۋدارساق، باعالاردىڭ ۋداي قىمبات ەكەنىن بايقاۋعا بولادى. ماسەلەن، ءبىر ستاقان كومپوتتىڭ باعاسى تايقازان مەيرامحاناسىندا 1200 تەڭگە تۇرادى. سالقىنداتىلعان سۋسىنداردىڭ دا باعاسى ءماز ەمەس، جارتى ليتر سىرانىڭ باعاسىمەن بىردەي.

«ءيا، تۇسىنەمىن، حالىقارالىق كورمە. ءبىراق ءوزىمىزدىڭ قازاقستاندىقتاردى دا ويلاۋعا بولادى عوي. وسىنشالىقتى پايداقورلىقتىڭ قاجەتى قانشا؟»، دەپ جازىپتى سۋرەتتەردى تاراتقان اۆتور كۇيىنە وتىرىپ.

سونداي-اق، تاماقتار مازىرىنە دە كوڭىل اۋدارۋعا بولادى. تىزىمدە كۇندەلىكتى ازىق سانالاتىن سورپا، لاعمان، ءمانتى، قۋىرداق، پالاۋ سىندى تاعامداردان باسقا ەشتەڭە جوق. ءوزىمىزدىڭ ۇلتتىق تاعامدارىمىز: قىمىز، شۇبات، بەشبارماقتاردى مازىرگە قوسۋعا بولاتىن ەدى. ونىڭ ۇستىنە قوناقتاردى وزىنە شاقىراتىن ەرەكشە تاعامداردى دا كورمەدىك.

شولۋشى: گۇلىم جاقان