ماحاببات ولكەسىن شارلاپ، ىشكى سەزىمنىڭ نازىك يىرىمدەرىن سەزىنۋگە ماجبۇرلەگەن «قىز جىبەك» قويىلىمى كورەرمەنىن ءبىر مارقايتتى.
13 ماۋسىمدا م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ع.مۇسىرەپوۆتىڭ «قىز جىبەك» مۋزىكالىق دراماسىنىڭ پرەمەراسى ءوتتى، دەپ جازادى قامشى اقپاراتتىق اگەنتتىگى.
قازاقتىڭ ليرو-ەپوستىق جاۋھار جىرى «قىز جىبەك» ماحاببات گيمنى دەسە بولادى. وسى ەپوس نەگىزگە الىنعان بۇل تۋىندىعا دا قىز جىبەك پەن تولەگەننىڭ جۇرەك تەربىرەنتەر قايعىلى ماحابباتى ارقاۋ بولعان. وقيعالار نەگىزىنەن جاعالبايلى رۋىنان شىققان باتىر تولەگەن، شەكتى رۋىنىڭ سۇلۋى جىبەك جانە ەل اراسىندا ەرجۇرەكتىگىمەن، كۇش-قايراتىمەن اتى شىققان باتىر بەكەجان اراسىنداعى قارىم-قاتىناستار توڭىرەگىندە ءوربيدى دە، اقىرى تولەگەن قىزعانىشتىڭ قۇربانى بولادى. سۇيگەنىنسىز جىبەككە دە ءومىر جوق... ەل بىرلىگى مەن تۇتاستىعى يدەياسى قاتار ءورىلىپ، حالىقتىڭ وي-ارمانى مەن اڭسارى تانىلاتىن، بوياۋى جارقىن قويىلىمدا ۇلتتىڭ ءومىرى مەن تىعىز بايلانىستى داستۇرلەر دە - باتا ءسوز، قارعىس، جوقتاۋ، زار، كوڭىل ايتۋ، قوشتاسۋ جانە ت.ب. – جاقسى كورىنىس تاپقان.
جىبەكتىڭ باتىلدىعى مەن ادالدىعى، بەكەجاننىڭ ساتقىندىعى، تولەگەننىڭ باتىرلىعى – ءبارى حالىقتىڭ كوڭىل كوزىنە وتتاي باسىلىپ، كورەرمەن رۋحاني ءلاززات الىپ، ءبىر مارقايىپ قالدى.
قويىلىمنىڭ قويۋشى-رەجيسسەرى – ەلباسى قورى سىيلىعىنىڭ لاۋرەاتى ە. نۇرسۇلتان.
«قىز جىبەك» مۋزىكالىق دراماسىندا تانىمال جۇلدىزدار س.باقايەۆا، ا.شاياحمەتوۆ، ە.دايىروۆ، ا.كيركاباكوۆ،م.تاعانوۆ، ش.اسقاروۆا، ش.جانىسبەكوۆا، گ.تۋتوۆا،ب.تۇرىس، ب.ءابدىلمانوۆ، س.مەرەكە ۇلى، ج.تولعانباي،ز.كارمەنوۆا، د.ۇسەنوۆا، ج.جانىامانوۆا، ك.شاياحمەتوۆا، ج.ماقاجانوۆا، ا.جۇمابايەۆ، ج.تينبايەۆ، ا.باقىتجانوۆا سىندى باسقا دا كوپتەگەن تەاتر ارتيستەرى ونەر كورسەتتى.
سونداي-اق، قويىلىم ەل ومىرىندەگى ماڭىزدى شارا «ەكسپو-2017» حالىقارالىق مامانداندىرىلعان كورمەسى اياسىنداعى م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ استانا قالاسىنداعى گاسترولدىك ساپارىندا 23 ماۋسىم كۇنى ساع.19-00دە استانا جاستار تەاترىنىڭ ساحناسىندا الەم جۇرتشىلىعىنىڭ نازارىنا ۇسىنىلماق.
ايتا كەتەيىك، بۇگىن ياعني،14 ماۋسىمدا تەاتردىڭ 91-ماۋسىمىنىڭ جابىلۋ سالتاناتى وتەدى.
گۇلىم جاقان
پىكىر قالدىرۋ