انگليالىق ازامات قازاقستانداعى ءومىرى جايىندا، الماتىدان گورى استانادا نە سەبەپتى تۇرعىسى كەلگەنى جايىندا، سونداي-اق قازاق حالقىنىڭ قوناقجايلىلىعى تۋراسىندا ايتىپ بەردى. Weproject.kz سايتىنىڭ جاريالاعان سۇحباتىن قامشى اقپاراتتىق اگەنتتىگى قازاق تىلىنە اۋدارىپ، شەتەلدىك ازاماتتىڭ قازاقستان جايلى ويلارىن وقىرمان نازارىنا ۇسىنادى. وكسفورد قالاسىنىڭ تۋماسى گەنري مانۋەل 36 جاستا. بۇگىنگى تاڭدا Haileybury Astana  مەكتەبىنىڭ وقىتۋشىسى.

استاناداعى ءومىر جايىندا

بۇل جاقتا تۇرىپ جاتقانىما 3 جىل بولدى. بۇعان دەيىن 2 جىل پەكيندە جۇمىس ىستەدىم. ءسويتىپ، انگليا مەن قىتايعا مۇلدەم ۇقسامايتىن مەملەكەتتە ءومىر سۇرگىم كەلىپ، قازاقستاندى تاڭدادىم. جۇمىستى عالامتوردان الەم بويىنشا ءمۇعالىم ىزدەيتىن توپتار ارقىلى تاپتىم. بۇل جەردىڭ ادامدارى – فانتاستيكا. ءارى مەنى قىزىقتىرعانى، قازاقستان ۇزدىكسىز دامۋ ۇستىندە.

استاناعا تاڭ اتا كەلگەم، كۇن ىستىق ەدى. كوزىمە العاش تۇسكەنى كەڭ القاپ بولدى. Park Inn ءقوناقۇيى ماڭىنداعى پاتەردىڭ بىرىنە ورنالاستىم، سول سەبەپتى قالانىڭ وڭ جاعالاۋىندا ءبىراز سەرۋەندەدىم. ءسويتىپ Sine Tempore ساۋدا ورتالىعىنىڭ كافەسىنەن ءدامى ءتىل ۇيىرەتىن پيسسا جەدىم.

مەن 4 جاسار بالاقايلارمەن جۇمىس ىستەيمىن. بايقاعانىم، قازاقستاندا انگلياعا قاراعاندا اتا-انا مەن بالا تاراپىنان مۇعالىمگە دەگەن قۇرمەت ەرەكشە. ماسەلەن، 1 قىركۇيەك كۇنى سىيلاستىق رەتىندە وقۋشىلار بۇرىن-سوڭدى كورمەگەن مۇعالىمگە گۇل بەرەدى. بۇل كۇن – ولار ءۇشىن دە، مۇعالىمدەر ءۇشىن دە اسا ماڭىزدى. گۇل سىيلاۋ – اتا-انا مەن بالانىڭ مۇعالىممەن جاقىنىراق تانىسۋى ءۇشىن جاساعان ماڭىزدى قادامى.
 

قازاقستانعا كوشىپ كەلمەي تۇرعاندا، الماتىدا ءبىراز كۇن بولعانمىن. كوبىسى الماتىنى استاناعا قاراعاندا كوڭىلدىرەك دەيدى. ءتىپتى ونى ورتالىق ازياداعى پاريج دەيتىندەر دە بار. ءبىراق الماتىنىڭ ەۋروپا قالالارىنان ايىرماشىلىعى جوق، سول سەبەپتى وندا تۇرعىم كەلگەن جوق. ماعان وزگە، عاجايىپقا تولى الەم كەرەك بولدى.

قالاعا تەز بەيىمدەلدىم. سۋىعىنا دا دايىن بولدىم، ورىس ءتىلىن دە ازداپ مەڭگەرگەنمىن. باسقا قيىندىقتارمەن ماعان اينالاداعى ادامدار كومەكتەستى.

قالا جايىندا

ماعان ەسىلدىڭ جاعالاۋى ۇنايدى. دەمالىس كۇندەرى مىندەتتى تۇردە ورتالىق ساياباقتىڭ جاعالاۋىندا 3 ساعاتتاپ سەرۋەندەيتىنمىن. جاز مەزگىلىندە ادامدار بەلسەندى، قىستا دا سولاي، جاعالاۋداعى مۇز ايدىنىندا ادامدار تولاستامايدى. سونداي-اق وڭ جاعالاۋدا، رەسپۋبليكا داڭعىلى مەن كەنەسارى كوشەلەرىندەگى اۋداندا سەرۋەندەگەندى جاقسى كورەمىن. «ارتەم» بازارى دا ۇنايدى.

مەنىڭ بۇل جەردە پايدالاناتىن جالعىز قۋلىعىم – كۇلكىم. كۇلىپ جۇرسەڭ، استانانىڭ ادامدارى دا ساعان جىلى شىراي تانىتادى، ءىسىڭ دە وڭعا باسادى.

استانادا تاكسي ۇستاۋ دا وڭاي. تاكسيگە ءمىنۋ ارقىلى قىزىقتى ادامدارمەن تانىسۋعا بولادى.

مەن «كەرۋەن» ساۋدا ورتالىعى ورنالاسقان اۋداندا تۇرامىن، وزىمە سول اۋدان ەرەكشە ۇنايدى. ءبىراق، قىتايعا قاراعاندا استانادا كوممۋنالدىق قىزمەت ءۇشىن تولەنەتىن قارجى قىمباتىراق.

كيىمدى سيرەك الامىن. استانادا تۇرعالى قىستىق ەتىك پەن ۇلتتىق ناقىششتاعى اياق-كيىم الدىم.

تاماعى جايىندا

مەن جەگەن تاماقتاردىڭ ىشىندەگى كوڭىلىمە جاققانى – قايماق قوسىلعان ءتۇشپارا مەن كومپوت. سونداي-اق، بەشبارماقتى دا ءسۇيىپ جەيمىن، ءبىراق ول كۇندەلىكتى جەۋگە بولاتىن تاعام ەمەس.

  كاۋابىن دا ايتپاي كەتپەسكە بولماس. كاۋاپتى ءجيى جەيمىن. ءمانتى، پالاۋ، قۋىرداق، چاك-چاك، باۋىرساقتى جاقسى كورەمىن. كوبىنە London مەيرامحاناسىنا، «دارەدجاني»، «كافە سەليننيكوۆ»، «ۆەچنوە نەبو»، سششااۋ تششمف كوفەحاناسىندا تاماقتانامىن.

ماعان «استانا وپەرا» ۇنايدى، ءبىراق 4-5 مارتە عانا باردىم. قازاقستاندىق انشىلەردىڭ ىشىندە عالىمجان مولدانازاردى تىڭدايمىن.

ادامدارى جايىندا  

قازاقتاردى قوناقجايلىلىعى ەرەكشەلەندىرىپ تۇرادى. ماعان مۇنىسى اسەر ەتتى. ەندىگى  جولى ماعان قوناقتار كەلگەندە انگلياداعى سەكىلدى ءبىر كەسە شايمەن ريزا قىلىپ قويماي، ولاردى تويدىرىپ ءبىراق جىبەرەمىن.

نەگىزى ادامدارى دورەكىلەۋ. دۇكەن قىزمەتشىلەرى مەن كولىك جۇرگىزۋشىلەرى ۇرىسقاق كەلەدى. انگليادا كەرىسىنشە.

ءبىراق تەز ءتىل تابىسقىش. ءبىر كەزدە قالانى ەسكى فوتواپپاراتپەن سۋرەتكە ءتۇسىرىپ جۇرگەنىمدە ءبىر فوتوگراف جانىما كەلىپ، اڭگىمە-دۇكەن قۇرىپ كەتتى، ءقازىر ءبىز جاقسى ارالاساتىن دوستارمىز.

قازاقستاندا ءسالت-داستۇر مەن زاماناۋي ءومىر قاشان دا ۇشتاسىپ تۇرادى. مەنى تاڭقالدىراتىنى وسى.

شولۋشى: گۇلىم جاقان