اقتوبە وبلىسى، بايعانين اۋدانى، التاي باتىر اۋىلىندا 22 جاستاعى سەرىكبولسىن كوشەرباي باس-مي جاراقاتىن الىپ، ول ساناۆياسيامەن قالاعا جەتكىزىلدى. بىرنەشە كۇننەن سوڭ كوز جۇمعان ناۋقاستىڭ قوس بۇيرەگى كەزەكتە تۇرعان ەكى اقتوبەلىككە سالىنعان بولاتىن. بۇگىن جاس جىگىتتىڭ تۋىستارى دارىگەر ەش رۇقسات سۇراعان جوق دەپ قۇقىق قورعاۋ ورگاندارىنا ارىز جازدى، دەپ حابارلايدى قامشى قپاراتتىق اگەنتتىگى قازاقپاراتقا سىلتەمە جاساپ.
27 مامىردا سەرىكبولسىن كوشەرباي تويعا قاتىسىپ، سول جەردە بىرەۋ ونى باسىنان ۇرعان. باس-مي جاراقاتى اۋىر ناۋقاسقا وبلىس ورتالىعىنان ساناۆياسيا جىبەرىلدى. دارىگەرلەر 22 جاستاعى جاس جىگىتتىڭ باس-مي جاراقاتىنا بايعانين اۋداندىق اۋرۋحاناسىندا وتا جاساپ، كەيىن ونى اقتوبە وبلىستىق اۋرۋحاناسىنا تاسىمالدادى. سول جەردە ەم قابىلداعان ناۋقاس بىرەر كۇننەن سوڭ كوز جۇمدى.
«سەرىكبولسىن كوشەرباي سوققى الىپ، اۋرۋحانادا جاتقان كەزدە ءبارى دە سول جەردە ءجۇردى. ال كوز جۇمىپ، ءمايىتحانادان دەنەسىن الۋعا بارعاندا بىزگە «بالانىڭ ەكى بۇيرەگىن الدى» دەپ ءبىر قىزمەتكەر ايتتى. «سۋدىڭ دا سۇراۋى بار» ەمەس پە؟ بۇيرەگىن الار كەزدە بىزدەن نەگە رۇقسات سۇراماعان؟ دارىگەرلەر قىلمىس جاساپ وتىر. سەرىكبولسىن اناسىن باعىپ، سوعان قامقور بولىپ وتىرعان ۇل. اعاسى جۇمىستا، قارىنداسى ستۋدەنت. ءوزى اۋىلدا ءجۇردى، ءۇي شارۋاشىلىعىندا ەدى. مىنەزى جايسىڭ، سىيلى ادام بولدى. ول ىشىمدىك ىشپەدى، تەمەكى شەكپەدى. جۇرەگى مەن باۋىرى دا جوق دەپ جاتىر. ءبىز ەندى انىق-قانىعىنىنا كوز جەتكىزگىمىز كەلەدى»،- دەدى سەرىكبولسىن كوشەربايدىڭ ناعاشى اپاسى گۇلايىم ەسەنبايەۆا.
بۇل جاعداي بايعانين اۋدانى، التاي باتىر اۋىلىندا تۇراتىن سەرىكبولسىن كوشەربايدىڭ وتباسىنا اۋىر ءتيدى. اعاسىن جوقتاپ وتىرعان قارىنداسى بالداۋرەن نۇرلىبايەۆا دارىگەرلەردىڭ «رۇقسات الدىق» دەگەن سوزىنە رەنىشىن ءبىلدىردى.
«اكەم ەرتە كوز جۇمىپ، انامىزدىڭ جانىندا اعام سەرىكبولسىن بولدى. ول وتە جاقسى، اۋىلعا سىيلى ەدى. باس-مي جاراقاتىمەن اۋرۋحاناعا تۇسكەن كەزدە ءبىز كۇندە بارىپ، دارىگەرلەرمەن تەلەفون ارقىلى سويلەسىپ وتىردىق. سوڭعى رەت سويلەسكەندە، «ەش وزگەرىس جوق، قان قۇيىپ جاتىرمىز» دەگەن بولاتىن. قايتىس بولعان سوڭ ءمايىتحاناداعى قىزمەتكەرلەر ونىڭ قوس بۇيرەگى الىنعانىن ايتتى. دارىگەرلەر، اعامنىڭ بۇيرەگىن العان ناۋقاستار، ءبارى دە كەشىرىم سۇراسىن دەپ تالاپ قويامىز. ءالى كۇنگە دەيىن ءبىر ادام كەلىپ، بىزبەن سويلەسپەدى»،- دەدى بالداۋرەن نۇرلىبايەۆا.
بۇل وتباسى ءمان-جايدى انىقتاۋ ءۇشىن قۇقىق قورعاۋ ورگاندارىنا ارىز جازىپ، سوتقا شاعىم ءتۇسىردى.
«اقتوبەگە اكەلىنگەن سەرىكبولسىن كوشەرباي جانساقتاۋ بولىمىندە جاتقان. دارىگەرلەردىڭ ەمى ناتيجە بەرمەي، ناۋقاس قايتىس بولعان. ەم-دوم جاسالىپ جاتقان كەزدە س.كوشەربايدىڭ تۋعان-تۋىستارى سول اۋرۋحانانىڭ جانىندا جۇرگەن، ۇنەمى جاعدايىن ءبىلىپ وتىرعان. جاس جىگىت قايتىس بولعاننان كەيىن دەنەسىن الۋعا ءمايىتحاناعا بارعان كەزدە «ەكى بۇيرەگىن الىپ، باسقا ناۋقاسقا سالدىق» دەپ ايتقان. سول كۇننەن باستاپ تۋىسقاندارى نارازىلىقتارىن ءبىلدىرىپ، قۇقىق قورعاۋ ورگاندارىنا شاعىمداندى. «حالىقتىڭ دەنساۋلىعى جانە دەنساۋلىق ساقتاۋ جۇيەسى تۋرالى» زاڭى بويىنشا «ءمايىتتىڭ ىشكى ورگاندارىن الۋ ءۇشىن جاقىندارىنىڭ، زاڭدى وكىلدەرىنىڭ رۇقساتى قاجەت» دەپ. رۇقساتى بولماسا، دارىگەرلەر رۇقسات بەرمەيتىنىن بىلسە، ىشكى ورگانداردى الۋعا بولمايدى. دەنساۋلىق ساقتاۋ ءمينيسترىنىڭ دە بۇيرىعى بار. وندا ىشكى ورگانداردى الۋ ءۇشىن جاقىندارىنىڭ، زاڭدى وكىلدەرىنىڭ كەلىسىمىن الۋ كەرەك ەكەنى جازىلعان. بۇل جەردە دەنساۋلىق ساقتاۋ سالاسىنىڭ ماماندارى دۇرىس جاساماعان. ءقازىر وبلىستىق پروكۋراتۋراعا ارىز بەرىلدى. «اقتوبە» گازەتىندە وبلىستىق باس حيرۋرگى سۇحبات بەرگەن ەكەن. وندا حيرۋرگ «قايتىس بولعان جىگىتتىڭ ىشكى ورگاندارىن الۋ ءۇشىن ءبىز ونىڭ جاقىن تۋىسقاندارىمەن سويلەسىپ، رۇقساتىن الدىق» دەپ مالىمدەگەن. تۋعان-تۋىستارى نارازىلىعىن ءبىلدىردى. «ءبىز رۇقسات بەرگەن جوقپىز» دەدى. وسى اقپارات بويىنشا ازاماتتىق سوتقا شاعىم تۇسىردىك. پروكۋراتۋرا، ىشكى ىستەر ورگاندارىنان كىنالى ادامداردى تاۋىپ، قىلمىستىق جاۋاپكەرشىلىككە تارتۋدى سۇراپ وتىر»،- دەدى قورعاۋشى قاتارباي رايسوۆ.
بۇل وقيعا تۋرالى وبلىستىق دەنساۋلىق ساقتاۋ باسقارماسى حاباردار.
«ەگەر ادام ءتىرى كەزىندە «مەن دونور بولمايمىن» دەگەن قاعاز قالدىرماسا، دەنە مۇشەسى ساۋ بولسا ونى الىپ، سۇراۋسىز مۇقتاج ادامدارعا اۋىستىرۋ وپەراسياسىن جاساي الامىز. ءدال وسىنداي جاعداي بىزدە بولدى. تۋعان-تۋىستارى جاقىن جەردە بولماعان. ال دەنە مۇشەلەرىن تەز الىپ، سالۋ كەرەك بولدى. اۋىستىرعان كەزدە، باسقا ادامعا سالعاندا دەنە مۇشەسى جۇمىسىن جاساپ كەتۋى ءۇشىن وپەراسيا شۇعىل جاسالادى»، - دەدى وبلىستىق دەنساۋلىق ساقتاۋ باسقارماسىنىڭ باسشىسى اسەت قالييەۆ.
