اقوردادا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا دۇنيەجۇزىلىك بانكتىڭ قازاقستانداعى تۇراقتى وكىلى اتو براۋنمەن كەزدەستى.

ەكىجاقتى كەزدەسۋ بارىسىندا قازاقستان مەن دۇنيەجۇزىلىك بانك اراسىنداعى ىنتىماقتاستىقتىڭ وزەكتى ماسەلەلەرى تالقىلاندى. قازىرگى ۋاقىتتا بانكتىڭ قاتىسۋىمەن جالپى قۇنى 8،1 ملرد. دوللار بولاتىن 46 جوبا ىسكە  اسىرىلعان.

گ.ءابدىقالىقوۆا بيىل دۇنيەجۇزىلىك بانك پەن قازاقستاننىڭ ىنتىماقتاستىعىنا 25 جىل تولىپ وتىرعانىن اتاپ ءوتتى. بانك شيرەك عاسىر ىشىندە ەلىمىزدەگى جەكەمەنشىك سەكتوردى دامىتۋعا، قۇرىلىمدىق رەفورمالار جۇرگىزۋگە جانە ينفراقۇرىلىمدى جاقسارتۋعا وزىندىك ۇلەسىن قوستى.

مەملەكەتتىك حاتشى قازاقستاننىڭ 2050 جىلعا قاراي دامىعان 30 ەلدىڭ قاتارىنا قوسىلۋ مىندەتىن العا قويىپ وتىرعانىن اتاپ ءوتتى. ەل پرەزيدەنتى ن.نازاربايەۆتىڭ حالىققا ارناعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا ەكونوميكالىق ءوسىمنىڭ جاڭا مودەلىن قالىپتاستىرۋ مىندەتى قويىلدى.

گۇلشارا ءابدىقالىقوۆا 2017 جىلى قازاقستان دۇنيەجۇزىلىك بانكتىڭ «بيزنەس جۇرگىزۋ جەڭىلدىگى» رەيتينگى بويىنشا 190 ەلدىڭ اراسىندا 51ء-شى ورىننان 35ء-شى ورىنعا كوتەرىلگەنىن اتاپ ءوتتى. «تاۋەلسىزدىك جىلدارىندا ەلىمىزگە كەلگەن شەتەلدىك تىكەلەي ينۆەستيسيانىڭ جالپى اعىنى شامامەن 280 ملرد. دوللار بولدى»، – دەدى مەمحاتشى.

كەزدەسۋ بارىسىندا تاراپتار ەكىجاقتى ىنتىماقتاستىقتى دامىتۋدىڭ قازىرگى قارقىنىنا ريزاشىلىق ءبىلدىردى.

كەزدەسۋ سوڭىندا ق ر مەملەكەتتىك حاتشىسى گ.ءابدىقالىقوۆا مۇشە ەلدەردىڭ تۇراقتى ەكونوميكالىق ءوسۋىن قامتاماسىز ەتۋ جولىندا دۇنيەجۇزىلىك بانكتىڭ قازاقستانداعى تۇراقتى وكىلى ا.براۋنعا ساتتىلىك پەن تابىس تىلەدى.