«مەملەكەتتىك ساتىپ الۋ جۇيەسىن تولىقتاي اۆتوماتتاندىرۋ ەلەكتروندى كامەرالى باقىلاۋدىڭ قۇرىلۋىنا تۇرتكى بولدى. ەندىگى ۋاقىتتا ول نىسانعا بارماستان، ۆەب-پورتال ارقىلى ونلاين-رەجىمدە جۇزەگە اسىرىلادى. اتالعان شارالار ءبىر كونكۋرسقا قاتىسۋشىلاردىڭ سانىن شامامەن 4 ەسەگە 1-2-دەن 4-كە دەيىن ارتتىرۋعا جانە ۇنەمدى ءۇش ەسە ۇلعايتىپ، 43 ملرد. تەڭگەدەن 130 ملرد. تەڭگەگە دەيىن جەتكىزۋگە مۇمكىندىك بەردى»، - دەپ اتاپ ءوتتى ول.

دەگەنمەن، مينيستر مەملەكەتتىك ساتىپ الۋ سالاسىندا شەشىلمەگەن ءبىرقاتار پروبلەمانىڭ قالىپ وتىرعاندىعىن دا جاسىرمادى.

«ءبىرىنشى كەزەكتە، بۇل ءبىر كوزدەن ساتىپ الۋ ۇلەسىنىڭ كولەمدى بولۋىنا قاتىستى. بۇل جەمقورلىق كورىنىستەرى تاۋەكەلدەرىنە تۇرتكى بولادى. ماسەلەن، 2014 جىلى جالپى كولەمدەگى مۇنداي ساتىپ الۋ ۇلەسى 79 پروسەنتتى، 2015 جىلى 75 پروسەنتتى، 2016 جىلى 69 پروسەنتتى قۇرادى. بۇعان قوسا، اتالعان ءبىر كوزدەن ساتىپ الۋدىڭ 69 پروسەنتى زاڭمەن كوزدەلگەن نەگىز بويىنشا ساتىپ الۋلاردىڭ ۇلەسىنە تيەسىلى. بۇعان دەيىن مۇنداي ساتىپ الۋلار زاڭ نورماسىن قولدانباي جۇرگىزىلەتىن. ءقازىر بۇل ءادىستىڭ بارلىق پروسەدۋرالارى پورتالدا راسىمدەلەدى. بۇل ولارعا مونيتورينگ جۇرگىزۋگە مۇمكىندىك بەرەدى. قالعان 30 پروسەنتى كونكۋرستىڭ وتپەۋى ناتيجەسىندە تاڭداپ الىنعان ءبىر كوزدەن ساتىپ الۋلارعا تيەسىلى. ءدال وسى ءبىر كوزدەن ساتىپ الۋ ءتۇرى جەمقورلىق تاۋەكەلگە بارىنشا بەيىم»، - دەدى سۇلتانوۆ.

ونىڭ ايتۋىنشا، وتكىزىلمەگەن كونكۋرستاردىڭ نەگىزگى ۇلەسى قۇرىلىس جۇمىستارمەن بايلانىستى. جالپى مۇنداي ءبىر كونكۋرسقا 7-8 كومپانيا قاتىسادى. دەگەنمەن، قۇرىلىستاعى ساتىپ الۋلار وتىنىمدەرىنىڭ كەرى قايتارىلۋىنىڭ باستى سەبەبى جوبالىق-سمەتالىق قۇجاتتارعا بايلانىستى.

«تاعى دا ءبىر ماڭىزدى پروبلەما ساتىپ الۋلارعا قاتىسۋشىلاردىڭ باسىم بولىگىنىڭ بىلىكتىلىكتەرىنىڭ تومەندىگى بولىپ وتىر. بۇل ساپاسىز تاۋارلار، جۇمىستار مەن قىزمەتتەردى ساتىپ الۋعا سەبەپ. اتالعان پروبلەمانى الدىن الا بىلىكتىلىكتىك ىرىكتەۋ ينستيتۋتىن كەڭىنەن پايدالانۋ ارقىلى شەشۋگە بولادى. قازىرگى ۋاقىتتا مەملەكەتتىك ساتىپ الۋلارداعى مۇنداي ءتاسىل ءبىرىنشى ساناتتاعى كۇردەلى  قۇرىلىستاردا عانا قاراستىرىلعان. سوندىقتان ساتىپ الۋدىڭ وسى ءتاسىلى ارقىلى ساتىپ الىناتىن تاۋارلار، قىزمەتتەر مەن جۇمىستاردىڭ ءتىزىمىن كەڭەيتۋ جۇمىستارىن جۇرگىزۋدەمىز»، - دەدى مينيستر.