سولتۇستىك كورەيا بيلىگى ءبىر اپتا بۇرىن عانا بوستاندىققا شىعارعان 22 جاستاعى ستۋدەنت وتتو ۋورمبيەر (Otto Warmbier) سينسينناتي اۋرۋحاناسىندا قايتىس بولدى. بۇل تۋرالى مارقۇمنىڭ وتباسى دۇيسەنبى كۇنى جاريالاعان مالىمدەمەدە ايتىلادى، - دەپ حابارلايدى قامشى اقپاراتتىق اگەنتتىگى Tengrinews.kz سايتىنا سىلتەمە جاساپ.

"وتتو بۇگىن ساعات 2.20-دا جاقىندارىنىڭ ورتاسىندا كوز جۇمدى. قولدان كەلگەنىن جاساعان مەديسينالىق ورتالىقتىڭ ماماندارىنا العىس ايتامىز. امال نە، بالامىز سولتۇستىككورەيالىقتاردان كورگەن ازاپتان قايتىس بولدى"، - دەلىنگەن حابارلامادا. 

"وتتو 13 ماۋسىمدا سينسينناتيدەگى ۇيىنە ورالعان كەزدە ايانىشتى حالدە ەدى، سويلەي المادى، كورە المادى، داۋىسقا بەلگى بەرمەدى. ءبىراق ول ۇيدە بولعانىن سەزدى دەپ ويلايمىز"، - دەلىنگەن ۇندەۋدە. ۋورمبيەر اقش-قا ەس-تۇسسىز كۇيدە كەلگەن. 

ەسكە سالايىق، وتتو ۋورمبيەر 2016 جىلدىڭ قاڭتارىندا سولتۇستىك كورەيادا ۇستالعان بولاتىن. ول "ءبۇلدىرۋ ارەكەتىن" جاسادى دەگەن ايىپپەن 15 جىلعا باس بوستاندىعىنان ايىرىلعان. 1 قاڭتارعا قاراعان ءتۇنى ول پحەنيان ءقوناقۇيىنىڭ قىزمەتتىك بولمەسىنە كىرىپ، ءىلىنىپ تۇرعان ساياسي ءۇنقاعازدى الىپ، جەرگە قويعان. امەريكالىق ءوز كىناسىن تولىقتاي مويىنداپ، "امەريكالىق اكىمشىلىكتىڭ كحدر-عا قاتىستى جاۋگەرشىلىك ساياساتىنىڭ قۇربانى بولعانىن" مالىمدەگەن. 

2016 جىلدىڭ ناۋرىزىنان بەرى ستۋدەنت تۇرمەدە بەرىلگەن ۇيىقتاتاتىن ءدارى ىشكەننەن كەيىن ەس-تۇسسىز كۇيگە تۇسكەن. سولتۇستىككورەيالىق بيلىك وكىلدەرى ۋورمبيەر تاماقتان ۋلاندى دەپ مالىمدەدى.

ال بيىل شىلدە ايىنىڭ ورتاسىندا پحەنيان "ادامگەرشىلىك نيەتپەن" بوساتقان. اقش-تا دارىگەرلەر تۇتقىندى تەكسەرىپ شىققان كەيىن اۋىر مي جاراقاتىن الدى دەگەن قورىتىندىعا كەلدى. اقش پرەزيدەنتى دونالد ترامپ وتتو ۋورمبيەردىڭ ولىمىنە "سولۇستىككورەيالىق رەجيم" كىنالى دەپ مالىمدەمە جاسادى.