بارشا جۇرتتى ىزگى ۇمىتكە بولەگەن
جارتى عاسىر بۇرىن تۋدى ول ولەڭ.
جان تەبىرەنىپ وقىعاندا جۇرەككە
كۇمىس ساۋلە توگىلەتىن توبەدەن.
قازاعىنىڭ تارقامايتىن ءبىر تويىن
ارمانداعان ايبەرگەنوۆ تولەگەن.
باس سالبىراپ، ەڭسە ءتۇسىپ كۇن وتكەن-
ول زاماندا كىم الىستى تۇنەكپەن؟！
بۇگىنگىدەي بوستان كۇننىڭ ءبىر ءساتىن
جانىن تىگىپ سۇرايتىنداي تىلەكپەن
اتاتۇعىن ازاتتىقتىڭ اق تاڭىن
اڭسايتۇعىن اقىن ەدىك جۇرەكپەن.
قانشا عاسىر كۇتە-كۇتە سارىلا،
جەتتىك بىزدەر تاۋەلسىزدىك تاڭىنا.
بۇيىرعانى-اي! مىڭ جىلدىقتىڭ ءبىر ءساتى
مەنىڭ زامانداستارىمنىڭ باعىنا.
ساي كەلگەنى-اي ەلىن باستار تۇلعانىڭ
تەپسە تەمىر ۇزەتۇعىن شاعىنا！
ەلىم وسكەن،
جەرىم ءبۇتىن،
جان امان.
قۇلدىق بوياۋ ءوشىپ جاتىر سانادان
بوداندىق پەن بوستاندىقتىڭ پارقىنا
كوز قىدىرتىپ قارامايدى ءار ادام.
ال بۇگىندە جاس وتاننىڭ كەكىلىن
سارىارقانىڭ سامال جەلى تاراعان.
ەلىم وسكەن،
جەرىم ءبۇتىن،
جان امان.
(كەمەل اقىل- ءمىنسىز بوستان سانادان).
تەمىرقازىق- تۇتاستىقتىڭ تۇتقاسى
تاڭداپ قوندىق جۇرتىمىزعا قالاعان--
ساعىم تۇنعان سارىارقادا سامالا
ازات شاحار بوي كوتەردى جاڭادان！
اناۋ ءمار-مار،
مىناۋ كوشە قاس تاسى.
ارالايىق، ازات جولمەن باستاشى！
توقسان كۇندىك توي باستالدى تورقالى،
گۇلگە تولىپ داڭعىلى مەن باقشاسى،
ەلباسىنا سالەم بەردى ءبىر ساتتە
اتتان ءتۇسىپ
الپىس ەلدىڭ پاتشاسى.
استانامىز – ايبارىمىز ارمانداي،
اسقان شەبەر، تىلسىم ۇستا سالعانداي.
بيىك-بيىك عيماراتتار بيىك وي،
بيىك ەڭسە، بيىك ماقسۇت تالعامداي.
تويعا كەلسەڭ توعىز كۇننەن قالماي كەل！
توقسان كۇندە ءبىر جەتەم دەپ ساندالماي!
ەلىم وسكەن،
جەرىم ءبۇتىن،
باس امان.
(بەلدەۋدە تۇر باقىت دەگەن قاشاعان).
جاڭا عىلىم جاڭبىر بولىپ جاۋعانداي
ەكىجۇز ەل، ميلليون عالىم جاساعان.
كورەم دەسەڭ بار الەمنىڭ بۇگىنىن
استاناعا اتىڭدى بۇر، جاس ادام!
اقىن باۋىرىم، مىنەزىڭ بار ۇردا جىق.
جالعىز وتانىڭا ءجۇرسىڭ بۇلدانىپ.
نازار سالشى كۇن قونعانداي استاناڭ
ساعان قاراپ تۇرعان جوق پا نۇرلانىپ؟!
تويعا شاقىر قارانى دا، حاندى دا،
اتقا تەگىس قوندىرارداي جىر جازىپ.
قانشا قۇدا- تۋىستاردا توي قانداي
ءار بىرىنە ۇشامىز عوي ويلانباي.
EXPO تۇر عارىشتى، نە مارستى
استانانىڭ وڭ جاعىنا قويعانداي.
جالعىز مەملەكەتىڭنىڭ ءبىر تويى
سەن بارماساڭ قالادى دە تويلانباي.
EXPO-عا تارت، باۋىرىم، ويلانباي！
تويعا كەلسەڭ كەيىن كەلمە ەرتە كەل،
كوڭىلىڭنىڭ كوك جالاۋىن سەرپە كەل.
شاقىرا كەل قۇدا – تۋىس، دوسىڭدى،
ۇل-قىزىڭدى، نەمەرەڭدى ەرتە كەل.
ەلىن تانىپ، ەرتە ەسەيسە ۇرپاعىڭ
"وتانىم" دەپ ەمىرەنەر، تەر توگەر.
ماڭگى ەلى بۇل "ەلىم" دەگەن بارشانىڭ.
جاننان قىمبات ازات اتقان ءار تاڭىڭ.
قۇشاق جايىپ سەرپىلەدى كوك تۋىم
جازىلعاندا سامالىمەن ارقانىڭ.
الار ەدى مەملەكەتتىڭ تويىنان
اۋىلداعى ءار قۋانىش ارقاۋىن.
ارمانىنداي ايبەرگەنوۆ اقىننىڭ
مۇمكىن ەمەس مىنداي تويىم تارقاۋىڭ
وي الىپ قايت بولاشاقتىڭ ويىنان،
ويانىپ قايت ەركە ەسىلدىڭ بويىنان.
ازاماتىم، استاناعا بەت تۇزە،
ەرتىس، جايىق، ەركە سىردىڭ بويىنان.
جالعىز مەملەكەتىڭنىڭ بۇل تويىن
ارتىقتاۋ كور جالعىز ۇلدىڭ تويىنان!!!
پوست: كوبىمىز قانشاما تۋىس جەكجاتىمىزدىڭ تويلارىنان قالمايمىز،
ال جالعىز مەملەكەتىمىزدىڭ تويىنا بارمايمىز.
الماس احمەتبەك ۇلى.
10.06.2017 استانا.
پىكىر قالدىرۋ