"ءبىز كەز-كەلگەن سىندى سابىرلى قابىلدايتىنىمىز بارىڭىزگە ءمالىم. ەكسپو تۋرالى ماقتاۋ سوزدەر دە، سىن دا ايتىلىپ جاتىر"، —دەدى ق ر اقپارات جانە كوممۋنيكاسيالار ءمينيسترى داۋرەن ابايەۆ Foreign Policy امەريكالىق باسىلىمىندا جارىق كورگەن دجەيمس پالمەردىڭ ەكسپو كورمەسى تۋرالى سىني ماتەريالىنا، سونداي-اق سايتتىڭ قازاقستاندا بۇعاتتالۋىنا قاتىستى پىكىر بىلدىرە وتىرىپ.
ايتا كەتەيىك، جاھاندىق ساياسات، ەكونوميكا، ينتەگراسيا تاقىرىپتارىن جازاتىن، ەكى ايدا ءبىر باسىلىپ شىعاتىن تانىمال جۋرنالدا 15 ماۋسىمدا قازاقستان تۋرالى ماقالا شىققان. ماقالادا EXPO-نىڭ باس نىسانى «نۇرلى الەم» ۇلتتىق پاۆيلونى «ءولىم جۇلدىزىنا» تەڭەلىپ، مىسقىلعا الىنعان. ەكسپو-عا قازاقستان 5 ميلليون قوناق كەلەدى دەپ كۇتكەنىن، الايدا قوناقتارىنىڭ سانى 10 مىڭعا ارەى جەتكەنىن جازا كەلىپ، ءتىپتى ەكسپو-نىڭ الماتىدا وتپەگەنىنە دە «قىنجىلىس» ءبىلدىردى. ماقالا اۆتورى – بريتاندىق جۋرناليست دجەيمس پالمەر.
بۇدان كەيىن "استانا ەكسپو-2017" ۇق قوعاممەن بايلانىس دەپارتامەنتىنىڭ ديرەكتورى سەرگەي كۋيانوۆ دجەيمس پالمەر ەسىمدى ءتىلشىنىڭ بار ەكەنىن، Foreign Policy امەريكالىق باسىلىمىندا شىن مانىندە ماقالا جازعانىن، ءبىراق ەكسپو كورمەسىنە مۇنداي ءجۋرناليستىڭ تىركەلمەگەنىن ايتقان. كەيىن پالمەر ءتولقۇجاتىنداعى قازاقستانعا كەلگەنىن دالەلدەيتىن ءموردى سۋرەتكە ءتۇسىرىپ، Twitter پاراقشاسىندا جاريالادى.
"ەكسپو باسپا ءسوز حاتشىسى كۋيانوۆتىڭ مالىمدەمەسى تۋرالى ايتار بولساق، سەرگەيدى ادامگەرشىلىك تۇرعىدان تۇسىنۋگە بولادى. ويتكەنى جۋرناليست پالمەردىڭ مالىمدەمەسى شىندىققا سايكەس كەلمەيتىنىن جاقسى بىلەسىزدەر"، — دەدى مينيستر.
"ون كۇننىڭ قورىتىندىسى بويىنشا العاشقى ناتيجەلەر كورمە بويىنشا جاسالعان ءساتتى بولجامنىڭ ورىندالا باستاعانىن كورسەتىپ وتىر. Foreign Policy ءجۋرناليسى شىندىقتى ايتپاي، فاكتىلەردى وتىرىك ايتا باستاعاندا، بۇل ارينە كورمەنى ۇيىمداستىرۋعا تىكەلەي ارالاسىپ جۇرگەن ادامنىڭ كوڭىلىنە تيەدى. سوندىقتان مۇمكىن وسىنداي ەموسيونالدى رەاكسيا بولعان شىعار"،- دەدى ول.
سونداي-اق، ابايەۆ قازاقستاندىقتاردىڭ Foreign Policy باسىلىمىنىڭ سايتىنا كىرە الماۋىنا قاتىستى دا پىكىر ءبىلدىردى.
"Foreign Policy سايتىنىڭ بۇعاتتالۋىنا قاتىستى ماسەلەگە كەلسەك، ءقازىر ءبارىن انىقتاپ جاتىرمىز. بىرەۋدىڭ جاعدايدى ۋشىقتىرۋ ءۇشىن مۇنى ادەيى ىستەۋ مۇمكىن ەكەندىگىن جوققا شىعارمايمىز. ءبىزدىڭ تاراپىمىزدان سايتتى بۇعاتتاۋ بويىنشا ەشقانداي ارەكەت بولعان جوق"،- دەپ ءتۇيدى ءسوزىن ابايەۆ.
پىكىر قالدىرۋ