بۇل تۋرالى رف پرەزيدەنتى جانىنداعى كاسىپكەرلەردىڭ  قۇقىعىن قورعاۋ جونىندەگى ۋاكىل بوريس تيتوۆ «اتامەكەن» ق ر ۇكپ-نىڭ IV سەزىندە حابارلادى

قازاقستاندا شىن مانىندە بيزنەس جۇرگىزۋ ءۇشىن قولايلى جاعدايلار جاسالعاندىعىن رەسەيلىك بيزنەس-ومبۋدسمەن اتاپ ايتتى. ونىڭ ايتۋىنشا، قۇرىلعانىنا ءبىر جارىم جىل عانا بولعان ۋاكىلدىڭ ينستيتۋتى ءوزىنىڭ تيىمدىلىگىن دالەلدەپ ۇلگەردى.

«ارينە، ءبىز وسى ينستيتۋتتى قۇرۋدى قولدادىق. بۇگىندە بولات ابىلقاسىمۇلىمەن ءوزارا تىعىز قارىم-قاتىناس ورناتىپ، بىر-بىرىمىزدەن ۇيرەنۋدەمىز. ءقازىردىڭ وزىندە وڭ وزگەرىستەر بار. بىرلەسە وتىرىپ قارالعان وتىنىشتەر سانى ازىرگە ونشا كوپ ەمەس، نەبارى ونشاقتى ءوتىنىش.  ولار، نەگىزىنەن، رەسەي اۋماعىندا كاسىپكەرلەردىڭ قۇقىعى بۇزىلۋىنا بايلانىستى. ءبىراق بۇل قۇقىق بۇزۋشىلىقتار مەملەكەتتىك ورگان تاراپىنان ەمەس، كاسىپكەرلەردىڭ ءوز اراسىنداعى ماسەلەلەر.   بۇل جەردە سەرىكتەستى مۇقيات تاڭداڭىزدار دەگەن كەڭەس بەرگىمىز كەلەدى»، - دەدى بوريس تيتوۆ.

تيتوۆ ءوزى اتاپ وتكەندەي، ول قازاقستاننىڭ جۇرگىزىپ وتىرعان ساياساتىنا «قىزىعا دا، قىزعانا» قارايدى ەكەن. بۇل نەگىزىنەن سالىق جۇيەسى، تاريفتىك ساياسات جانە ەڭ باستىسى بيلىكتىڭ كاسىپكەرلىكتى قولداۋداعى بەلسەندىلىگى.

«كاسىپكەرلەرگە قاتىستى قوزعالعان ىستەردىڭ ازايۋى ايتارلىقتاي اسەر قالدىرادى. رەسەيدە ءبىز بۇل كورسەتكىشتەردى تۇراقتاندىرۋدى ەندى عانا قولعا الۋدامىز. ال سىزدەردە باقىلاۋ-قاداعالاۋ قىزمەتىندە جانە زاڭنامانى ىزگىلەندىرۋدەگى ناتيجەلەر ايتارلىقتاي»، - دەپ، اتاپ ءوتتى رەسەيلىك بيزنەس-ومبۋدسمەن.

ەستەرىڭىزگە سالا كەتەيىك، 2016 جىلى كاسىپكەرلەردىڭ قۇقىقتارىن قورعاۋ جونىندەگى ۋاكىل بولات پالىمبەتوۆ جانە رف پرەزيدەنتى جانىنداعى كاسىپكەرلەردىڭ قۇقىعىن قورعاۋ جونىندەگى ۋاكىل بوريس تيتوۆ  ءوزارا ءىس-قيمىل مەن ىنتىماقتاستىق تۋرالى مەموراندۋمعا قول قويدى. بىرلەسە وتىرىپ شەشكەن وزەكتى ماسەلەلەردىڭ ءبىرى – قوستاناي وبلىسىنداعى سوت ورىنداۋشىلارىنىڭ رەسەيلىك «تەحكومپلەكت» كومپانياسىنا قاتىستى زاڭسىز ارەكەتتەرىنە توسقاۋىل قويۋ بولدى.