قىرعىز ەلىنىڭ پرەمەر-مينيسترى سوورانباي جيەنبەكوۆ جينالىسقا دايىندىقسىز كەلگەن شەنەۋنىككە ۇرىسىپ، جينالىستان ۇرسىپ قۋىپ جىبەردى، دەپ حابارلايدى قامشى اقپاراتتىق اگەنتتىگى.
«انە، نە ىستەرىن بىلمەي وتىر. ءقازىر سەنى جۇمىستان شىعارىپ جىبەرسەم، جيەنبەكوۆ مەنى ەش نەگىزسىز جۇمىستان قۋىپ جىبەردى دەپ ايتاسىڭ. قانشاما قارجىنىڭ ماسەلەسى تالقىلانىپ وتىر، نەگە دايىندىقپەن كەلمەيسىڭ؟ شىق ەسىكتەن!» - دەپ اشۋلانىپ، قۋىپ جىبەردى.
«قۇرىلىس ماماندارى وزدەرىڭ جاعدايدىڭ قانداي بولىپ جاتقاندىعىن بىلمەيسىڭدەر. ۇيات ەمەس پە؟ سەن پرەمەر-مينيستر قاتىساتىن ۇلكەن جينالىسقا كەلىپ وتىرسىڭ»، - دەپ جالعاستىردى ءسوزىن پرەمەر-مينيستر.
ءوز ارىپتەستەرىنىڭ كوزىنشە ماسقارا بولعان شەنەۋنىك پرەمەر-مينيستردەن كەشىرىم سۇراپ، جاعدايدى تۇسىندىرمەك بولعانىمەن ەش ناتيجە بولمادى.
جينالىس «ەلدەگى كەدەيشىلىكتىڭ الدىن الۋ» تاقىرىبىندا ءوتىپ جاتقان. پرەمەر-مينيستر سوورانباي جيەنبەكوۆ ارحيتەكتۋرا جانە قۇرىلىس مەملەكەتتىك اگەنتتىگىنىڭ ديرەكتور ورىنباسارىن المازبەك ءابدىقادىروۆتى قۋىپ جىبەرگەن.
ەستەرىڭىزگە سالا كەتسەك، سوورانباي جيەنبەكوۆ قىرعىزستاننىڭ پرەزيدەنت تاعىنا ۇمىتكەرلەردىڭ ءبىرى بولىپ تابىلادى.
شولۋشى: نازەركە لابيحان
پىكىر قالدىرۋ