قىزىلوردا تۇرعىنى ءوزىنىڭ Facebook پاراقشاسىندا بۇرىنعى كۇيەۋىنىڭ وزىنە كورسەتكەن قورلىعى جايىندا جازىپ، ونىڭ قالاي اياۋسىز ۇرىپ-سوققاندىعىن اشكەرە قىلدى. «اجىراسقان» دەگەن اتقا ىلىگۋدەن قورىققان بويجەتكەن مۇنداي مازاققا بىرنەشە ۋاقىت بويى شىداپ كەلگەن، دەپ حابارلايدى قامشى اقپاراتتىق اگەنتتىگى.
ءجاميلانىڭ ايتۋىنشا، ول كۇيەۋىمەن نەكەدە 6 جىل بولعان. ءبىراق تەك 3 جىل عانا بىرگە تۇرعان ەكەن.
«كۇيەۋىم ماعان ءبىرىنشى رەت قول كوتەرگەن كەزدە باقىتىم باسىمنان ۇشقانداي بولدى. كەيىننەن مەنى ۇرىپ-سوعۋدى ادەتكە اينالدىردى. بىرنەشە رەت ەسىمنەن تانىپ قالدىم، ەرىنىمدى ءتىلىپ، قىلقىندىراتىن، سونان سوڭ قورقىتا باستادى.
ول مەنىمەن سويلەسپەيتىن، ماسەلەنىڭ ءمان-جايىن انىقتاپ الماي جاتىپ ۇرىپ-سوعۋعا كوشتى. شاپالاقپەن ۇرسا مەيلى، شىداۋعا بولاتىن شىعار، ءبىراق ول مەنى ايۋاندىقپەن اياۋسىز ۇراتىن. ءتىپتى، مەنى ۇرىپ-سوققاننان ءوزى ءلاززات الاتىن سەكىلدى. سول سەبەپتى دە ءبىر ايىرىلىسىپ، ءبىر قوسىلىپ جۇردىك»، - دەپ جازادى ول.
سونىمەن قاتار، كۇيەۋى ونى اياعى اۋىر كەزىندە دە سوققىعا جىققان ەكەن.
«بالام كەمتار بولىپ تۋىلادى ما دەپ قاتتى قورىقتىم. ابىروي بولعاندا بالام ساۋ بولىپ دۇنيەگە كەلدى. تەك اتا-اناما قىزدارى اجىراسقان دەگەن ءسوز كەلەدى ما دەپ شىداپ ءجۇردىم»، - دەپ جالعاستىرادى ءسوزىن.
ونىڭ ايتۋىنشا، وتكەن جىلدىڭ ءساۋىر ايىندا بارلىعىنا نۇكتە قويۋعا ءماجبۇر بولىپ، ومىرىندە ادام سەنگىسىز وقيعا بولعان.
«ۇيدە ۇرىسىپ قالعان كەزدە ونىڭ اكەسى مەن اناسى ونى توقتاتۋعا تىرىساتىن. ءبىر كۇنى كۇيەۋىم كەراميكالىق شاينەكتى قابىرعاعا ۇرىپ سىندىردى دا، ونىڭ سىنىعىن الىپ اناسى مەن اكەسىنىڭ قولىن جاراقاتتادى. وسى وقيعانىڭ بارلىعىنا ءبىزدىڭ 3 جاستاعى ۇلىمىز كۋا بولدى.
كەيىننەن ماعان تاپ بەردى. مەنى ۇستىمدەگى جەيدەمنەن ۇستاپ تارتىپ، قولىمدى كەسكىلەدى. ءسال بولعاندا مەنىڭ ارتەريامدى كەسىپ تاستايتىن ەدى. قولىما قاراسام قان اتقىلاپ، تەرى استىنداعى مايلاردان ەتىم كورىنىپ تۇردى»، - دەپ ەسكە الادى ول.
سول ۋاقىتتا بالاسىن الىپ، كوشەگە قاشىپ شىققان ءجاميلا جەدەل جاردەم شاقىرىپ جاتپاي، تاكسي ۇستاپ دەرەۋ اۋرۋحاناعا بارعان.
«ماعان اۋرۋحانادا العاشقى مەديسينالىق كوم ەك كورسەتىپ، جارامدى تاڭىپ، تىگىپ تاستادى. اۋرۋحاناعا پوليسيا قىزمەتكەرلەرى كەلىپ، ارىز جازىپ بەرۋىمدى ايتتى. مۇنداي جاعدايدا قانداي جازا قولداناتىنىن سۇراعانىمدا، «ەگەر رەسمي نەكەدە بولسا، بىرنەشە كۇنگە قامالادى نەمەسە ايىپپۇل تولەيدى» دەپ جاۋاپ بەردى. دەمەك، بىرنەشە كۇن عانا قامالىپ شىعىپ نەمەسە ايىپپۇلىن تولەپ الىپ ايەلىن ۇرىپ-سوعۋدى جالعاستىرا بەرسە بولادى ەكەن. قورعانسىز ايەلدەرگە قاتىستى ءبىزدىڭ زاڭ نەگە سونشا ءالسىز؟!» - دەيدى قىزىلوردالىق بويجەتكەن.
بۇل ءىس سوتقا دەيىن جەتكەنىمەن ءجاميلا سوت وتىرىسىنا بارماعان، سەبەبى مورالدىق جاعىنان ەش قولداۋ كورمەگەن. ال ول جەردە بويجەتكەندى ءوزىنىڭ ارىزىنان باس تارتادى دەپ شەشىم قابىلداپ قويعان ەكەن.
«مۇنىڭ بارلىعىن بۋمەرانگ ەرەجەسىنە قالدىردىم دا، ءوزىم ارى قاراي ءومىر سۇرە بەردىم. ۋاقىتىندا كەتىپ قالعانىم ءۇشىن ءوزىمدى ءقازىر جاقسى سەزىنەمىن جانە دە بارلىق قىز-كەلىنشەكتەرگە وسىعان كەڭەس بەرەمىن. وقيعا ناسىرعا شاپپاي تۇرىپ بارلىعىنا نۇكتە قويىڭىزدار...
اقىرى اجىراستىق. ول ءۇشىن بۇل جاڭا ءومىر بولار، ال مەن ءۇشىن تەك اجىراسقان دەگەن ءمور. ادامدارعا ءزابىر كورسەتۋشىلەر ۇنەمى وڭاي قۇتىلىپ كەتەدى»، - دەپ جازادى ءجاميلا.
شولۋشى: نازەركە لابيحان
