شىمكەنتتە ءىرى قازاق-قىرعىز بازارى اشىلادى دەپ حابارلايدى otyrar.kz. بۇرىنعى بەكجان بازانى ەندى شىمكەنت-دوردوي بازارى دەپ اتالماق. بۇل جايىندا بەكجان بازارىندا وتكەن جيىندا ايتىلدى. ساۋدا ورنىنىڭ قۇرىلتايشىسى ءامىرحان شۇمەنوۆ بازاردى كورشى قىرعىزستانداعى دوردوي بازارىنىڭ باسشىسىنا 10 جىلعا باسقارۋعا بەرىپتى. ال ايىر قالپاقتى اعايىن ءوز كەزەگىندە بازارعا 3 ميلليون دوللار ينۆەستيسيا قۇيۋعا ۋادە بەرىپ وتىر.

بۇرىنعى بەكجان بازارى ەندى شىمكەنتتەگى ەڭ ءىرى، ساۋداگەرلەرگە ىڭعايلى جانە ارزان بازار بولادى. بۇل تۋرالى وسى بازاردى 10 جىلعا باسقارۋعا العان قىرعىزستاندىق دوردوي بازارىنىڭ قۇرىلتايشىلارى مالىمدەدى. قىرعىز كاسىپكەرلەر شىمكەنتتەگى ساۋدا ورنىنا 3 ملن دوللار ينۆەستيسيا قۇيامىز دەپ وتىر. ال بازار ماڭىنداعى 4 گەكتار جەردە 5 مىڭ اۆتوكولىكە ارنالعان اۆتوتۇراق سالىنباق.

ەستەرىڭىزگە سالار بولساق، وسىدان بىرنەشە جىل بۇرىن بۇل بازاردىڭ ورتەنگەنىن كوپشىلىك ءالى ۇمىتقان جوق. وسى وقيعادان كەيىن بازار باسشىسى ءامىرحان شۋمەنوۆ ساۋدا ورنىن زامان تالابىنا ساي ەتىپ، ساۋداگەرلەرگە ىڭعايلى ەتىپ سالدى. بۇگىندە بازاردا 8 مىڭ ساۋداگەرگە ارنالعان دۇڭگىرشەك بار. جانە قالاداعى ەڭ ءقاۋىپسىز بازار بولدى. ال 50 مىڭ ساتۋشىسى بار دوردوي بازارى دا ەكى رەت ورتەندى دەگەن قىرعىز اعايىندار بەكجان بازارىنىڭ قۇرىلىسىنا تاڭدانىپ، تاڭداي قاقتى. جانە جىبەك جولىنداعى ەڭ ۇلكەن ساۋدا ورنىنا اينالاتىنىنا سەنىمدى ەكەندەرىن اشىق ايتتى.

جاڭا بازاردا ەندى ءۇش باسشى بولادى. ونىڭ ەكەۋى قىرعىزداردىڭ وكىلدەرى، ال ديرەكتورلىق قىزمەت بۇعان دەيىن بىرنەشە بازاردى اياعىنان تۇرعىزعان كلارا ءنادىرقۇلوۆاعا سەنىپ تاپسىرىلىپتى. ال ول ءوز كەزەگىندە بارلىق ساتۋشىلارعا جاعداي جاساپ، ساۋداگەرلەردىڭ ساۋداسى جۇرگەنشە سالىق المايتىنىن ايتتى. تاعى ءبىر ايتا كەتەتىن ماسەلە، بۇگىنگى تاڭدا شىمكەنت قالاسىنداعى وزگە بازارلاردا 5 مىڭنان استام قىرعىز اعايىن ساۋدا جاساپ ءجۇر.