الدا كەلە جاتقان ورازا ايت مەرەكەسىنىڭ قۇرمەتىنە ءماشھۇر ءجۇسىپ ورتالىق مەشىتىنىڭ الدىندا «ورازا ايت - بەرەكەلى مەرەكە» اتتى ءدىني شارا ۇيىمداستىرىلادى، دەپ حابارلايدى قامشى اقپارات اگەنتتىگى pavlodarnews.kz مالىمەتىنە سۇيەنىپ.

 قمدب پاۆلودار وبلىسى بويىنشا جاستار ءىسى ءبولىمىنىڭ مەڭگەرۋشىسى ايبەك ورالحاننىڭ ايتۋىنشا، بيىلعى ايت نامازى بارلىق مەشىتتەردە 25-ماۋسىم، جەكسەنبى كۇنى تاڭعى 6:30-دا وقىلادى. «ورازا ايت - بەرەكەلى مەرەكە» اتتى اۋقىمدى ءدىني مەرەكە ورتالىق مەشىت اۋلاسىندا ساعات 14:00-دە باستالىپ، 18:00-گە دەيىن جالعاسادى.

 - مەشىت اۋلاسىندا بالالار مەن جاسوسپىرىمدەرگە ارنالعان ءىس-شارالار كوپتەپ ۇيىمداستىرىلماق. اتاپ ايتار بولساق، بالالارعا ارنالعان ويىن باتۋتتارى ورناتىلادى. سونىمەن قاتار، قۇران وقۋ، ءدىن تۋرالى سۇراق-جاۋاپ جانە ءيلاھي ولەڭ-جىر ايتۋدان جارىستار ۇيىمداستىرىلادى. ال، ەرەسەك ادامدار اراسىندا گىر تاسىن كوتەرۋ، قول كۇرەسى، ارقان تارتۋ، قازاق كۇرەسى سىندى ۇلتتىق سپورت تۇرلەرىنەن سايىس جۇرگىزىلەدى. ماقساتىمىز – رامازان ايتىنىڭ قوعامدا كەڭىنەن ناسيحاتتاۋ جانە جاسوسپىرىمدەردى جىل سايىن اسىعا كۇتەتىندەي دارەجەگە جەتكىزۋ. جىلىنا ءبىر رەت كەلەتىن قاسيەتتى ءدىني مەرەكەنى تاماشالايمىن، جارىستارعا قاتىسامىن دەۋشىلەرگە ەسىگىمىز اشىق. بۇل كۇنى مەرەكەگە جينالعان جۇرتشىلىققا 15 قازان پالاۋ جانە تاندىر نان تەگىن تاراتىلادى، - دەيدى ايبەك ورالحان.

سونداي-اق، وسى كۇنى مەشىت اۋلاسىنا جينالعان بالالارعا جەرگىلىكتى كاسىپكەرلەر مەن جاماعاتتاردىڭ دەمەۋشىلگىمەن ءتۇرلى كادەسىيلار، ويىنشىقتار تابىستالسا، سپورتتىق جارىستاردا ونەر كورسەتكەن ازاماتتارعا داستارحان جايىلىپ، قازاقتىڭ ۇلتتىق تاعامدارىنان ءدام بەرىلەدى. بيىلعى مەرەكەنى ۇيىمداستىرۋعا جەرگىلىكتى دەمەۋشىلەرمەن قاتار، وبلىس ورتالىعىنداعى مەشىتتەر دە اتسالىسۋدا. 

شولۋشى: ايگەرىم تاۋباي