ەلباسى «ۇزدىك مەملەكەتتىك قىزمەتشى» رەسپۋبليكالىق كونكۋرسىنىڭ جەڭىمپازدارىمەن كەزدەستى، - دەپ حابارلايدى قامشى اقپاراتتىق اگەنتتىگى اقورداعا سىلتەمە جاساپ.   قازاقستان پرەزيدەنتى مەملەكەتتىك ورگانداردىڭ قىزمەتكەرلەرىن مەملەكەتتىك قىزمەتشى كۇنىنە وراي وتكىزىلگەن كونكۋرستاعى جەڭىستەرىمەن قۇتتىقتادى.

نۇرسۇلتان نازاربايەۆ مەملەكەتتىك قىزمەتتىڭ ميسسياسى حالىققا ادال قىزمەت ەتۋ جانە ەلىمىزدىڭ ۇلتتىق مۇددەسىن ءتيىمدى قورعاي ءبىلۋ ەكەنىن اتاپ ءوتتى. «مەملەكەتتىك اپپاراتتىڭ ۇيلەسىمدى جۇمىسى مىقتى ءارى تاۋەلسىز قازاقستاندى قۇرۋعا سەپتىگىن تيگىزدى. بۇگىندە ەلىمىز الەمنىڭ بارلىق جەتەكشى رەيتينگىندە سەنىمدى تۇردە لايىقتى ورىندارعا يە بولۋدا. ەكونوميكانىڭ وڭ قارقىنى ساقتالۋدا، قوعامدىق كەلىسىم مەن بىرلىك ورنىقتى قولداۋعا يە»، - دەدى مەملەكەت باسشىسى.

ەلباسى مەملەكەتتىك قىزمەتشىلەر ەلىمىزدى دامىتۋعا زور ۇلەس قوسقانىن اتاپ ءوتىپ، اۋقىمدى رەفورمالاردى ىسكە اسىرۋدا مەملەكەتتىك اپپاراتتىڭ ماڭىزدى ءرول اتقاراتىنىنا نازار اۋداردى.

نۇرسۇلتان نازاربايەۆ قازاقستاننىڭ جاھاندىق باسەكەگە قابىلەتتىگىن ارتتىرۋ تۇرعىسىنان مەملەكەتتىك اپپاراتتى جۇيەلى تۇردە ترانسفورماسيالاۋ جونىندەگى شارالارعا ەرەكشە توقتالدى.

«مەملەكەتتىڭ اشىقتىعىن قالىپتاستىرۋ جالعاسۋدا. مەملەكەتتىك قىزمەتتەر كورسەتۋدىڭ ءبىرىڭعاي پروۆايدەرى - «ازاماتتارعا ارنالعان ۇكىمەت" مەملەكەتتىك كورپوراسياسى قۇرىلدى. ورتالىق جانە جەرگىلىكتى اتقارۋشى ورگانداردىڭ جەتەكشىلەرى جىل سايىن حالىق الدىندا ەسەپ بەرەدى»، - دەدى قازاقستان پرەزيدەنتى.

سونىمەن قاتار، ەلباسى مەملەكەتتىك قىزمەتتىڭ مەريتوكراتيا جانە اشىقتىق قاعيداتتارىنا نەگىزدەلگەن جاڭا فورماتىن ەنگىزۋدىڭ ناتيجەلەرىن اتاپ ءوتتى. «قىزمەتكەرلەرگە ەڭبەكاقىنى جۇمىس ناتيجەسى بويىنشا تولەۋ، سونداي-اق بىلىكتىلىك پەن كاسىبي قابىلەتتى تۇراقتى تۇردە ارتتىرۋ ماسەلەسى زاڭ جۇزىندە بەكىتىلدى. قازاقستان مەملەكەتتىك باسقارۋ سالاسىندا ەكونوميكالىق ىنتىماقتاستىق جانە دامۋ ۇيىمى ەلدەرىنىڭ قاعيداتتارىن ەنگىزۋدە. مەملەكەتتىك اپپاراتتىڭ تۇراقتىلىعى نىعايدى - مەملەكەتتىك قىزمەتتەگى اۋىس-تۇيىستەر ەكى ەسە قىسقاردى. باسقا جۇمىسقا اۋىسۋ 18 ەسە، ال جۇمىستان بوساۋ - ەكى ەسە ازايدى»، - دەدى مەملەكەت باسشىسى.

سوڭىندا قازاقستان پرەزيدەنتى مەملەكەتتىك قىزمەتشىلەردىڭ جوعارى ادەپ نورمالارىن قاتاڭ ساقتاۋىنىڭ ماڭىزدى ەكەنىن ايتتى. «باسەكەگە قابىلەتتى مەملەكەتتىك قىزمەتتى ورنىقتىرماساق، وركەندەگەن قازاقستاندى قالىپتاستىرۋ جونىندەگى باستى ماقساتىمىزعا دا قول جەتكىزە المايمىز. بۇل ورايدا مەملەكەتتىك قىزمەتشىنىڭ ابىروي-بەدەلىن ساقتاۋ ماڭىزدى. سىزدەر رەفورمالاردىڭ بەل ورتاسىندا جۇرسىزدەر. ەلىمىزدىڭ تابىسقا جەتۋى مەن گۇلدەنۋى كوپ جاعدايدا سىزدەردىڭ جەمىستى جۇمىستارىڭىزعا بايلانىستى. سىزدەر الداعى ۋاقىتتا دا مەملەكەتكە مۇلتىكسىز قىزمەت ەتىپ، حالقىمىزعا ادال ەڭبەك ەتەتىندەرىڭىزگە سەنىمدىمىن»، - دەدى ەلباسى.

اڭگىمە بارىسىندا نۇرسۇلتان نازاربايەۆ كەزدەسۋگە قاتىسۋشىلاردىڭ ەل ىشىندە جۇرگىزىلىپ جاتقان رەفورمالار مەن رۋحاني جاڭعىرۋدىڭ نەگىزگى باعىتتارىن ىسكە اسىرۋ بارىسى تۋرالى پىكىرىن ءبىلدى.

كەزدەسۋگە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى ق.قوجامجاروۆ، رەسپۋبليكالىق بيۋدجەتتىڭ ورىندالۋىن باقىلاۋ جونىندەگى ەسەپ كوميتەتى زاڭ ءبولىمىنىڭ مەڭگەرۋشىسى م.احمەتوۆ، اقپارات جانە كوممۋنيكاسيالار مينيسترلىگى مەملەكەتتىك قىزمەت كورسەتۋدى دامىتۋ جونىندەگى دەپارتامەنتتىڭ باسقارما باسشىسى ن.باجايەۆا، الماتى قالالىق ىشكى ىستەر دەپارتامەنتى جەرگىلىكتى پوليسيا قىزمەتىنىڭ باسشىسى ج.بايكەنوۆ، پاۆلودار وبلىسى اقسۋ قالاسى ەۆگەنيەۆ اۋىلدىق وكرۋگىنىڭ اكىمى ت.بەيسەنبايەۆا، جامبىل وبلىسى جۋالى اۋدانى كوكباستاۋ اۋىلدىق وكرۋگىنىڭ اكىمى اپپاراتىنىڭ ءىس جۇرگىزۋ ءبولىمىنىڭ باسشىسى م.بەكتۇرعانوۆ، اقتوبە وبلىسى تىلدەردى دامىتۋ باسقارماسىنىڭ باس مامانى ن.بەرتىلەۋوۆا، پاۆلودار وبلىسى شارباقتى اۋدانى ورلوۆكا اۋىلدىق وكرۋگىنىڭ اكىمى ي.گاللياموۆا، پاۆلودار وبلىسى پاۆلودار اۋداندىق ءماسليحاتى اپپاراتىنىڭ باسشىسى ۆ.گەينس، پرەزيدەنت اكىمشىلىگى ستراتەگيالىق ازىرلەمەلەر جانە تالداۋ ورتالىعى مەڭگەرۋشىسىنىڭ ورىنباسارى ج.ەرەيەۆا، پرەزيدەنت اكىمشىلىگى جالپى ءبولىمىنىڭ مەڭگەرۋشىسى م.جاقىپوۆ، ينۆەستيسيالار جانە دامۋ مينيسترلىگى كادر جۇمىسى دەپارتامەنتى ديرەكتورىنىڭ ورىنباسارى ە.قاپىشيەۆ، الماتى قالاسى قارجى باسقارماسىنىڭ باسشىسى ا.قۇدايبەرگەنوۆا قاتىستى.

شولۋشى: اسەل وتەشوۆا