لاتىن الىپبيىنە كوشۋدى 2025 جىلعا دەيىن سوزا بەرۋدىڭ قاجەتى جوق. بۇل تۋرالى بۇگىن ەلورداداعى تاۋەلسىزدىك سارايىندا ءوتىپ جاتقان دۇنيەجۇزى قازاقتارىنىڭ V قۇرىلتايىندا قازاقستان پرەزيدەنتى نۇرسۇلتان نازاربايەۆ ايتتى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ. 

"قازاق ءتىلىن لاتىن ارپىنە كوشىرۋ - بۇل انا ءتىلىمىزدىڭ جاھاندىق عىلىم مەن بىلىمگە كىرىگۋىن، رۋحاني تۇتاستىعىن قامتاماسىز ەتەتىن بىرەگەي قادام. بۇرىنعى كسرو اۋقىمىندا، تمد دەپ اتالاتىن ءبىز - كيريلليسا، قىتايداعى قانداستارىمىز - توتە جازۋ، باتىس ەلدەرىندەگى باۋىرلارىمىز لاتىن ءارپىن قولدانادى. سوندا، سويلەسكەندە ءتىلىمىز ءبىر بولعانىمەن، وقىعاندا ءتىلىمىز ءۇش ءتۇرلى. ءبىر-بىرىمىزدى تۇسىنە المايمىز. جازۋىن ۇقپايمىز. بۇل ءبىر جاعىنان، جەر جۇزىنە تارىداي شاشىلعان قازاقتىڭ كەيىنگى ۇرپاعىن بىر-بىرىنەن الىستادى. ەكىنشى جاعىنان، عىلىم مەن تەحنيكاعا، ينتەرنەتكە ۇيرەنەتىن جاعدايىمىز بار. ولاردىڭ لاتىن ارپىمەن جۇرەتىنىن بىلەسىزدەر"، - دەدى نۇرسۇلتان نازاربايەۆ.

مەملەكەت باسشىسى كوپ ۇزاماي بۇل ولقىلىقتار جويىلاتىندىعىن، قازاق ءتىلىنىڭ لاتىن الىپبيىنە كوشۋى بىرلىگىمىزدى نىعايتىپ، رۋحاني جاقىنداستىرا تۇسەتىندىگىن باسا ايتتى.

"مەن ءوزىمنىڭ جولداۋىمدا بۇل ماسەلەدە «2025 جىلعا دەيىن» دەپ مەجە  قويعان بولاتىنمىن. ءبىراق تا ونى سوزا بەرۋدىڭ قاجەتى جوق دەپ ويلايمىن. ءبىزدىڭ عالىمدارىمىز ءتيىستى ءارىپتىڭ بىزگە كەرەك ۇلگىلەرىن تۇرىك جانە باسقا لاتىن ارپىنە كوشكەن ازەربايجان، وزبەكستان ۇلگىلەرىنە قاراپ وتىرىپ، كەمشىلىكتەرىن ەسكەرە وتىرىپ، بىزگە كەرەكتى الىپپەنى تاڭداپ الۋى كەرەك. مەنىڭشە، قيىندىعى جوق. سەبەبى، 1 سىنىپتان باستاپ بارلىق بالالارىمىز اعىلشىن تىلىندە وقيدى. بارلىق مەكتەپتەردە اعىلشىن ءتىلى وقىتىلادى. ولاردا لاتىن ءارپى قولدانىلادى.  ءوسىپ كەلە جاتقان ۇرپاققا ونىڭ ەشقانداي قيىندىعى جوق. بىزگە دە ونشا قيىنشىلىعى جوق دەپ ويلايمىن. كەيبىر اعايىنداردىڭ ءبىزدىڭ شىعارمالارىمىز نە بولادى دەپ  قىنجىلاتىنى بار. قازىرگى ينتەرنەت زامانىندا ەشقانداي پروبلەما جوق"، - دەدى قازاقستان پرەزيدەنتى.