تاجىكستاندا ەكى ادامدى ءولتىردى دەگەن كۇدىكپەن حاتلون وبلىسى پياندجا اۋدانىنىڭ تۇرعىنى تۇتقىندالدى. وعان كۇيەۋىنىڭ تۋىستارىن ۋ بەرىپ ءولتىردى دەگەن ايىپ تاعىلۋدا، دەپ حابارلايدى قامشى اقپاراتتىق اگەنتتىگى novosti.kg سايتىنا سىلتەمە جاساپ.

ءىىم دەرەگىنە سايكەس، حاتلون وبلىسىنىڭ پاحتاكور قىستاعىنىڭ 37 جاستاعى تۇرعىنى قاساقانا تۇردە ءوزىنىڭ كۇيەۋىنىڭ تۋىستارىنا ۋ بەرگەن. ايەل العاش تۇرمىس قۇرعان كۇننەن باستاپ ءوزىنىڭ 43 جاستاعى ەرىن جاقتىرماعان.

2014 جىلى 29 ماۋسىمدا وزدەرىنىڭ كۋرۋتوب اتتى ۇلتتىق تاعامىن ازىرلەپ، وعان ۋ قوسىپ قويعان. كەيىننەن ۋ قوسىلعان تاباقتى ادەيى كۇيەۋىنىڭ تۋىستارى جۇمىس ىستەپ جۇرگەن جاققا اپارىپ بەرگەن. وتباسى مۇشەلەرى كۋرۋتوبتى جەگەننەن سوڭ اۋىر حالدە اۋرۋحاناعا تۇسكەن. ولاردىڭ اراسىندا ول ايەلدىڭ كۇيەۋىنىڭ 39 جاستاعى اعاسى مەن ونىڭ 34 جاستاعى ايەلى جانە دە ولاردىڭ كامەلەتكە تولماعان ءۇش بالالارى بولعان. سونىمەن قاتار دۋشانبەنىڭ تۇرعىندارى – جيەنەرى – 19، 38 جانە 36 جاستاعى ەر ادامدار بولعان. ۋلاۋدىڭ ناتيجەسىندە، 39 جاستاعى اعاسى اۋرۋحانادا كوز جۇمعان. الايدا، كەلىن مۇنىمەن بۇل ءىسىن توقتاتپاعان.

ءدال سول جىلدىڭ قىركۇيەك ايىندا بۇكىل وتباسىنا ۋلانعان نان بەرگەن. پياندجا اۋرۋحاناسىنا 34 جاستاعى جەسىر ايەل مەن ونىڭ كۇيەۋىنىڭ 26 جاستاعى قارىنداسى كەلىپ تۇسكەن. سونىمەن قاتار 4 جاستاعى ءبۇلدىرشىن دە اۋرۋحاناعا ءتۇسىپ، سول جەردە كوز جۇمعان. سول كۇنى كەلىن ءۇش كۇندىك ازا تۇتۋ كۇنىنە كەلگەن ادامدارعا ارناپ تاعى دا ۋلانعان نان ءپىسىرىپ بەرگەن. ناتيجەسىندە جەتى ادام قۇرعان-توبە قالاسىنداعى اۋرۋحاناعا جەتكىزىلدى.

الايدا، ۋلانعان تاماق بەرىپ بىرنەشە ادامدارعا قاستاندىق جاساعان كەلىن ۇستالىپ، قازىرگى تاڭدا وعان قارسى «ادام ءولتىرۋ» بابى بويىنشا قىلمىستىق ءىس قوزعالعان.

شولۋشى: نازەركە لابيحان