الماتى قالاسىنىڭ تىلدەردى دامىتۋ باسقارماسى قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىن ىسكە اسىرۋ جونىندەگى الماتى قالاسىنىڭ 2017-2019 جىلدارعا ارنالعان ءىس-شارالار جوسپارىن جۇزەگە اسىرۋ ماقساتىندا جانە الماتى قالاسى اكىمدىگىنىڭ «مەملەكەتتىك قىزمەتشى كۇنىن وتكىزۋ جونىندەگى ءىس-شارالار جوسپارىنا» سايكەس مەملەكەتتىك باسقارۋ ورگاندارى مەن مەكەمەلەرىندە جۇمىس ىستەيتىن ماماندار اراسىندا «مەملەكەتتىك ءتىل – مەنىڭ ءتىلىم» اتتى قالالىق بايقاۋ وتكىزەدى دەپ حابارلايدى قامشى اقپاراتتىق اگەنتتىگى.

بايقاۋدىڭ ماقسات-مىندەتتەرى: قازاق ءتىلىنىڭ قولدانىلۋىن دامىتۋ، مەملەكەتتىك ءتىل ساياساتىن ناسيحاتتاۋ. مەملەكەتتىك باسقارۋ ورگاندارى مەن مەكەمەلەرى قىزمەتكەرلەرىنىڭ قازاق تىلىندە سويلەۋ مادەنيەتىن قالىپتاستىرۋ، شەشەندىك قابىلەتىن دامىتۋ، مەملەكەتتىك تىلدە جۇمىس ىستەيتىن مامانداردى كوتەرمەلەۋ.

بايقاۋ بەس كەزەڭنەن («جادىمىزداعى جايلار» كەزەڭى – سۇراق-جاۋاپ، «قازاق ءسوزى» كەزەڭى – ءتىل تۋرالى قاناتتى سوزدەر، ماقال-ماتەلدەر، ايتۋلى تۇلعالاردىڭ ءتىل تۋرالى ايتقان ويلارىنا بايلانىستى تاپسىرما، «جەر-سۋدىڭ اتى – تاريحتىڭ حاتى» كەزەڭى – قازاقستاننىڭ تانىمال جەرلەرىنە بايلانىستى تاپسىرمالار، «ماسەلەنىڭ ءمان-جايى» كەزەڭى – ءتىل ماسەلەسىنە بايلانىستى وزەكتى ويلار تالقىسى، «ماڭگىلىك ەل – مارتەبەلى ءتىل» كەزەڭى – شىعارماشىلىق كەزەڭ) تۇرادى. ءار كەزەڭدە قاتىسۋشىلار ويدى جەتكىزە ءبىلۋ شەبەرلىگى مەن سويلەۋ مادەنيەتىن كورسەتۋى ءتيىس.

بايقاۋدىڭ قازىلار القاسى قۇرامىنا مەملەكەتتىك مەكەمەلەر مەن قوعامدىق ۇيىمداردىڭ رەسمي وكىلدەرى ەنەدى.

بايقاۋدىڭ جۇلدەسى: ءبىرىنشى، ەكىنشى، ءۇشىنشى جۇلدەلى ورىن العاندارعا ءتيىستى دارەجەدەگى ديپلومدار مەن باعالى سىيلىقتار، قاتىسۋشىلارعا العىس حاتتار مەن ەستەلىك سىيلىقتار تاپسىرىلادى.