ساۋ بارىپ، سال بولىپ قايتتى! اسكەرگە بارعانىنا ەكى-اق اي بولعان جاس سارباز مۇگەدەك بولىپ قالۋى مۇمكىن. قازارمادا ۇستىنە توسەك قۇلاعان 19 جاستاعى  باقبەرگەن قالامىش بەل ومىرتقاسى سىنىپ، ءحال ۇستىندە جاتىر. دارىگەرلەر ونىڭ اياققا تۇرىپ كەتەتىنىنە ەشقانداي كەپىلدىك بەرمەي وتىر. ال باحبەرگەننىڭ اكەسى تەپسە تەمىر ۇزەتىن ساۋ ۇلىمدى وسىنداي جاعدايعا جەتكىزگەن كومانديرلەردىڭ سالعىرتتىعى دەيدى.  بۇل تۋرالى قامشى اقپاراتتىق اگەنتتىگى كتك ارناسىنا سىلتەمە جاساپ حابارلايدى.

تۇتىكشەدەن سۋ ءىشىپ، باسىن كوتەرە الماي جاتقان جاس جىگىت باقتيار قالامىش. وتان الدىنداعى بورىشىن وتەۋ ءۇشىن پاۆلادار وبلىسىنان اسكەرگە شاقىرتىلىپ، وتارداعى 82 796 اسكەري بولىمىندە قىزمەت ەتكەن. ەندى ەكى اي وتپەي الماتىداعى اۋرۋحانادا جاتىر. سويلەۋگە دە شاماسى جوق.

قالامىش جاقسىلىق ۇلى، باقبەرگەننىڭ اكەسى:

- بارلىعى كازارمانىڭ الدىندا بولعان. ول جەردە پالاتكا تۇرعان. تەمىر نار توسەكتى بالالار ءوزى قۇرعان ەكەن. سوعان جاتقاندا مەنىڭ بالام استىڭعى قاتاردا بولعان. توسەك تايىپ كەلىپ بەلىن باسقان.

تەمىر توسەكپەن بىرگە ون شاقتى بالا ۇستىنە قۇلاعاندا باقبەرگەننىڭ بەل ومىرتقاسى سىنىپ، جۇلىنىنا زاقىم كەلگەن. ءقازىر بەلدەن تومەن جان جوق. دارىگەرلەر اياعىنا تۇرىپ كەتۋى ەكى تالاي دەپ وتىر. ال اكەسى بۇعان اسكەري ءبولىم باسشىلارىن كىنالايدى.

قالامىش جاقسىلىق ۇلى، باقبەرگەننىڭ اكەسى:

- بالامدى كۇنىن كەشىكتىرمەي تەزدەتىپ جاقسى بولنيسياعا، كەرەك بولسا شەتەلگە اپارىپ ەمدەپ بەرسىن. ساۋ بالا بەرگەنمىن، بالامدى ەندى ارقالاپ قايتقىم كەلمەيدى. ماتەريالدىق مارالدىق شىعىنداردى تالاپ ەتەم.

قامكوڭىل اكەنىڭ ۇلىنا ماسساجيست پەن پسيحولوگتى دا الدىرتا الماي جۇرگەنىنە ەكى اپتا بولعان. ءبىراق اسكەريلەر اسىعار ەمەس.

سامات تۇلەپبايەۆ، «وڭتۇستىك» وڭىرلىك اسكەري قولباسشىلىعى تاربيە ءبولىمىنىڭ باستىعى:

-بۇل وقيعا بويىنشا سوتقا دەيىنگى تەرگەۋ جۇمىستارى جۇرگىزىلىپ جاتىر. سونىڭ ناتيجەسى بويىنشا ناقتى شارالار قولدانىلادى. باقبەرگەننەن باسقا ەشكىم زارداپ شەكپەگەن. ءقازىر وعان بارلىق كومەك كورسەتىلۋدە. تەزىرەك جازىلىپ كەتۋىن كۇتەمىز.

ال، باقبەرگەننىڭ اكەسى قاراپ وتىرماق ەمەس. اسكەري پروكۋراتۋراعا ارىز جازىپ، بورىشىن وتەۋگە كەتكەن ۇلىنىڭ قاۋىپسىزدىگىنە جاۋاپتىلاردىڭ  قاتاڭ جازالاۋىن تالاپ ەتپەك.

شولۋشى: ايەرىم تاۋباي