قۇجاتتار بىردەن وڭدەلىپ، دايىندالادى جانە دايىن بولىسىمەن يەسىنە بەرىلەدى.

3 شىلدەدەن باستاپ استانا قالاسىنىڭ ەسىل اۋداندىق حالىققا قىزمەت كورسەتۋ ورتالىعىنان تۋۋ تۋرالى جانە ولگەندىگى جونىندەگى كۋالىكتەردى ءۇش ساعاتتىڭ ىشىندە الۋعا بولادى، دەپ جازادى قامشى اقپارات اگەنتتىگى. بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراسياسىنىڭ ءتوراعاسى ابىلايحان وسپانوۆ حابارلادى.

«1 شىلدەدەن باستاپ ادىلەت مينيسترلىگى اكىمدىكپەن بىرلەسىپ، «سانكت-پەتەربۋرگ» بيزنەس ورتالىعىنداعى حقكو-ىندا سىنامالى جوبانى ىسكە قوستى جانە بۇگىننەن باستاپ تۋۋ جانە ولگەندىگى جونىندەگى كۋالىكتەردى الۋ ءۇشىن حققو-داعى ءبىزدىڭ ماماندارىمىزدىڭ كومەگىنە جۇگىنۋلەرىڭىزگە بولادى. بۇل جوبا كۋالىكتەردى الۋ ۋاقىتىن ەكى كۇننەن ءۇش ساعاتقا دەيىن قىسقارتۋعا مۇمكىندىك بەردى. ونىڭ وزىندە ءۇش ساعاتتىڭ ءوزى ەڭ جوعارعى كورسەتكىش. شىن مانىسىندە قۇجاتتار بىردەن وڭدەلىپ، دايىندالادى جانە دايىن بولىسىمەن يەسىنە بەرىلەدى. بىزگە ءقازىر ەكى قىزمەت بويىنشا قۇجاتتاردى تىركەۋ جانە ازىرلەۋ جۇمىستارىنىڭ مولشەرىن ەسەپتەپ شىعارۋ كەرەك. ەگەر ءبارى ءساتتى اياقتالىپ جاتسا، قۇجاتتاردى قابىلداۋ ەلىمىزدىڭ بارلىق حقو-ىندا جۇزەگە اسىرىلاتىن بولادى»، - دەپ جازدى ابىلايحان وسپانوۆ فەيسبۋكتەگى پاراقشاسىندا.