باعا ازىق-تۇلىك تاۋارلارىنا اعىمداعى جىلعى التى ايدا (2017ج. ماۋسىم 2016ج. جەلتوقسانعا) 5،1%، ازىق-تۇلىك ەمەس تاۋارلارىنا – 3%، اقىلى قىزمەتتەرگە – 2،8%-عا ءوستى دەپ حابارلايدى قامشى اقپاراتتىق اگەنتتىگى ق ر ۇلتتىق ەكونوميكا مينيسترلىگىنىڭ باسپا ءسوز قىزمەتىنە سىلتەمە جاساپ.

پايىزبەن، ءوسۋى

اعىمداعى جىلدىڭ باسىنان (2017ج. ماۋسىم 2016ج. جەلتوقسانعا) باعانىڭ ءوسۋى كارتوپقا 77،3%، جاڭادان جينالعان كوكونىستەرگە – 15،6%، قوي ەتىنە – 10،7%، ءسيىر ەتىنە – 9%، جاڭادان جينالعان جەمىستەرگە – 7،9%، كونسەرۆىلەنگەن سۇتكە – 6،4%، سارى مايعا – 5،6%، جىلقى ەتىنە – 4،6%، كونديتەرلىك ونىمدەرگە – 4،3%، مايەكتى ىرىمشىككە – 3،8%-عا بەلگىلەندى. باعانىڭ تومەندەۋى قيارعا 58،7%، قىزاناققا – 28،7%، جۇمىرتقاعا –27%، قاراقۇمىق جارماسىنا – 13،4%، كۇنباعىس مايىنا – 6،6%، قانتقا – 1،8%-عا تىركەلدى.

باعا ءوسىمى اۆتوموبيلدەرگە 4،7%، شىنى جانە قىشتان جاسالعان ونىمدەرگە – 4،6%، توقىما بۇيىمدارىنا – 3،4%-عا، جەكە قولداناتىن تاۋارلارعا، تۇرمىستىق اسپاپتارعا – 2،9%-دان، فارماسيەۆتيكالىق ونىمدەرگە، گازەتتەر، كىتاپتار جانە كەڭسە تاۋارلارىنا – 2،8%-دان، جيھاز جانە ۇيگە قاجەتتى زاتتارعا – 2،5%، جۋعىش جانە تازالاعىش قۇرالدارعا – 2،4% قۇرادى. ديزەل وتىنى 6،6%، باللونداعى سۇيىتىلعان گاز – 5،8%، بەنزين – 5،4%-عا قىمباتتادى.

باعا دەڭگەيى قۇقىق قىزمەتتەرىنە 7%، كولiك قۇرالدارىن ساقتاندىرۋ – 6،8%، دەنساۋلىق ساقتاۋ – 4،8%، دەمالىس، ويىن-ساۋىق جانە مادەنيەت سالاسىنداعى – 2،6%، قوعامدىق تاماقتاندىرۋ – 2،5%-عا ءوستى. قالاارالىق اۆتوبۋسپەن جول ءجۇرۋ اقىسى 4%، ىشكى قالاارالىق – 2،7%، جولاۋشىلاردىڭ اۋە كولىگىمەن – 2،4%-عا قىمباتتادى، ال تەمىر جول كولىگىمەن – 1،4%-عا ارزاندادى.

تۇرعىن ۇي-كوممۋنالدىق قىزمەتتەر سالاسىندا تاريفتەر كارىزگە 7،4%، ورتالىقتان جىلىتۋعا – 7،3%، تاراتۋ جەلىلەرى ارقىلى تاسىمالداناتىن گازعا – 4،2%، ىستىق سۋعا – 3،8%، تۇرعىن ءۇيدى كۇتىپ ۇستاۋعا – 3،5%، ەلەكتر ەنەرگياسىنا – 3،2%، سۋىق سۋعا – 2،4%-عا جوعارىلادى.

ينفلياسيا دەڭگەيىن سيپاتتايتىن تۇتىنۋ باعاسىنىڭ يندەكسى حالىقتىڭ جەكە تۇتىنۋ ءۇشىن ساتىپ الاتىن تاۋارلارى مەن قىزمەتتەرى باعاسىنىڭ وزگەرۋىن كورسەتەدى. تاۋارلار مەن قىزمەتتەر جيىنتىعىنا 510 پوزيسيا كىرەدى. باعانى تىركەۋ مەنشىكتىڭ ءتۇرلى نىساندارىنداعى ساۋدا جانە قىزمەت كورسەتۋ سالاسى كاسىپورىندارىنىڭ ىرىكتەمە جۇيەسى بويىنشا بارلىق وبلىس ورتالىقتارىندا، استانادا جانە قالالار مەن اۋدان ورتالىقتارىنىڭ بەلگىلەنگەن شەڭبەرى بويىنشا جۇرگىزىلەدى. بىرىكتىرۋ ءۇشىن پايدالانىلاتىن سالماق جۇيەسى ولاردىڭ شىعىستارى بولىگىندە وتكەن جىلعى ءۇي شارۋاشىلىقتارىن  زەرتتەۋ ماتەريالدارى نەگىزىندە ەسەپتەلەدى.

2017 جىلعى قاڭتاردان باستاپ تبي–ءدى ەسەپتەگەندە ازىق–تۇلىك تاۋارلارىنىڭ ۇلەسى 37،6%، ازىق–تۇلىك ەمەس تاۋارلار – 30،2%، اقىلى قىزمەتتەر – 32،2%–دى قۇرادى.