قىرعىزستاننىڭ وش وبلىسىندا جەرگىلىكتى تۇرعىندار 19 جاستاعى قىزدى قۇتقارىپ قالدى، دەپ حابارلايدى قامشى اقپاراتتىق اگەنتتىگى  Turmush.kg سايتىنا سىلتەمە جاساپ.

30 ماۋسىم كۇنى رايىمبەك كوشەسىندە ورنالاسقان كوپ قاباتتى ۇيلەردىڭ بىرىنەن ءبىر قىز جۇگىرىپ شىعىپ، جۇرتتان كومەك سۇراي باستاعان. ول ءۇي ورتالىق بازاردىڭ ماڭىندا ورنالاسقاندىقتان ول جەردە جۇمىس ىستەيتىن تۇرعىندار كۇدىكتى ادامدارعا بويجەتكەندى بەرمەي قويعان.

بەلگىلى بولعانداي، كومەك سۇراپ كەلگەن قىز وش وبلىسى نوقات اۋدانىنىڭ تۇرعىنى – اسەل ەسىمدى قىز ەكەن.

ول جالال-ابادتاعى اپكەسىنىڭ ۇيىنە بارا جاتقاندىعىن ايتقان. جولدا ءبىر تانىسى ونى الداپ وش وبلىسىنا الىپ كەلىپ، قىزدى ساتىپ جىبەرمەك بولعان.

ءزابىر كورسەتۋشى ءبىر توپ جىگىتتەر مەن ايەل ول قىزدى جەڭىل ءجۇرىستى قىز دەپ اتاپ، جەزوكشەلەر ۇيىنەن قاشىپ كەتكەن دەپ ايتىپ بەرگەن. الايدا، قىزعا كومەكتەسكەن ادامدار ول سوزگە سەنگەن جوق. بىرنەشە ۋاقىتتان سوڭ اسەلدى سۇلەيمان توو پوليسيا باسقارماسىنا جەتكىزگەن.

«مەن جالال-ابادتاعى گيپەرماركەتتە جۇمىس ىستەيمىن. سول جاققا اپكەمە بارا جاتقانمىن. جولدا مەنىڭ ميكا ەسىمدى تانىسىم ءبىر جەردە دەمالىپ، ءشاي ءىشۋدى ۇسىندى. مەن كەلىستىم، كەيىننەن ەكەۋمىز بەيتانىس كولىككە وتىرىپ، ولار ءبىزدى وش قالاسى رايىمبەك كوشەسىندەگى كوپ قاباتتى ۇيلەردىڭ بىرىنە الىپ كەلدى. جۇرەگىم ءبىر جاماندىقتى سەزە باستادى. قاتتى قورقىپ كەتتىم دە، دالاعا قاشىپ شىقتىم. مەنىڭ ارتىمنان ميكا دا جۇگىرىپ شىعىپ، كۇشتەپ پاتەرگە كىرگىزە باستادى. مەن بار داۋىسىممەن ايقايلاپ، كومەككە شاقىردىم. مەن ءقازىر ەشكىمگە دە سەنبەيمىن، ءتىپتى، پوليسيا قىزمەتكەرلەرىنە دە. مەنى ساتىپ جىبەرمەك بولعان ادامداردىڭ اقشاسى كوپ، ولار مەنى كەز كەلگەن ۋاقىتتا پوليسيا باسقارماسىنان دا الىپ كەتە الادى. تەك رەسمي فورمادا كەلگەن پوليسيا قىزمەتكەرلەرىنە عانا سەندىم، ولار مەنى ۇيىمە جەتكىزىپ تاستاۋى كەرەك»، - دەيدى اسەل.

سونىمەن قاتار، ول قىز پاتەردەن اياق كيىمسىز جۇگىرىپ شىققان. ال ونىڭ ارتىنان ءبىر توپ جىگىتتەر مەن ءبىر ايەل قۋىپ، الىپ كەتپەك بولعان.

كەشكى ۋاقىتتا وقيعا ورنىنا پوليسيا قىزمەتكەرلەرى كەلىپ، قىزدى پوليسيا باسقارماسىنا الىپ كەتتى.

اۋدارعان: نازەركە لابيحان