ق ر سىرتقى ىستەر ءمينيسترى قايرات ءابدىراحمانوۆ سيرياداعى جاعدايدى رەتتەۋگە قاتىستى كەلىسسوزدەرگە قاتىساتىن دەلەگاسيالاردىڭ استاناعا كەلگەنىن ايتتى، - دەپ حابارلايدى قامشى اقپاراتتىق اگەنتتىگى Tengrinews.kz سايتىنا سىلتەمە جاساپ.

مينيستر ب ا ق وكىلدەرىنە الداعى ۋاقىتتا ۇكىمەت پەن سيريا اراب رەسپۋبليكاسى قارۋلى وپپوزيسياسىنىڭ وكىلدەرى كەلىسسوزدەر جۇرگىزەتىنىن ايتتى. قازىرگى ۋاقىتتا دەلەگاسيالار ەكىجاقتى تارتىپتە كەلىسسوزدەر جۇرگىزىپ جاتىر. 5 شىلدەدە كەلىسسوزدەر جالعاسىپ، كۇن تارتىبىندەگى ماسەلەلەرگە قاتىستى قورىتىندى شەشىمدەر شىعارىلادى.

"باستاپقىدا ءتورت دەەسكالاسيا اۋماعىن قۇرۋ تۋرالى مەموراندۋمدى قالاي جۇزەگە اسىراتىنىمىز جايلى تالقىلاۋ كەرەك. بۇل مەموراندۋمعا رەسەي، تۇرىك رەسپۋبليكاسى، يران سياقتى گارانت ەلدەر قول قويعان بولاتىن. بۇل مەموراندۋمدى جۇزەگە اسىرۋداعى باستى ماسەلە وسى اۋماقتىڭ شەكارالارىن انىقتاۋ، سونداي-اق، ول اۋماقتاردىڭ قالاي باقىلاناتىنىن شەشۋ. سونداي-اق، مەموراندۋمدا شەكارا ماڭىندا باقىلاۋ-وتكىزۋ پۋنكتەرى بولاتىنى كورسەتىلگەن"، - دەدى مينيستر جۋرناليستەرگە.

قايرات ءابدىراحمانوۆتىڭ ايتۋىنشا، استانا پروسەسى بارىسىندا گارانت ەلدەر سيريا اراب رەسپۋبليكاسىنىڭ اۋماعىن ميناسىزداندىرۋ ماسەلەسىن تالقىلايدى.

سونىمەن قاتار، مينيستر استاناداعى كەلىسسوزدەردە قارۋلى وپپوزيسيانىڭ وكىلى كىم بولاتىنىن جانە ول قازاقستان استاناسىنا كەلدى مە، جوق پا دەگەن سۇراققا جاۋاپ بەردى.

"(...) استاناداعى الاڭعا سيريا قارۋلى وپپوزيسياسىنىڭ 9 وكىلى كەلدى. ولار قازىرگى ۋاقىتتا ەلوردادا"، - دەدى ق ر سىرتقى ىستەر ءمينيسترى.

ايتا كەتەيىك، سيرياداعى جاعدايدى رەتتەۋگە قاتىستى كەلىسسوزدەردىڭ ءتورت راۋندى وتكەن ەدى: 23-24 قاڭتاردا، 15-16 اقپاندا، 14-15 ناۋرىزدا جانە 3-4 مامىردا.

ەسكە سالا كەتەيىك، 23 قاڭتاردا استانادا سيرياداعى جاعدايدى رەتتەۋگە قاتىستى كەلىسسوزدەر باستالعان بولاتىن. كەلىسسوزدەر ەلورداداعى Rixos President Astana مەيمانحاناسىندا جابىق تارتىپتە ءوتىپ جاتىر. سونداي-اق، وسىعان دەيىن مەملەكەت باسشىسى نۇرسۇلتان نازاربايەۆ سيريا ماسەلەسى بۇگىندە تاياۋ شىعىستى عانا ەمەس، بۇكىل الەمدىك قاۋىمداستىقتى الاڭداتىپ وتىرعانىن اتاپ وتكەن ەدى.