34 جاستاعى جۇلدىز قىستاۋوۆا جەزقازعان تۇرمەسىنە ءتۇسىپ، كەنەتتەن ول قايتىس بولدى دەگەن . ءولىمنىڭ سەبەبى: ءوز وزىنە قول سالعان. الايدا تۋىستارى جۇلدىز ءوزىن ءولتىردى دەگەنگە سەنبەيدى، دەپ حابارلايدى قامشى اقپاراتتىق اگەنتتىگى NewTimes.kz سايتىنا سىلتەمە جاساپ.

تۋىستارىنىڭ ايتۋىنشا، 7 ءساۋىر كۇنى جۇلدىز قىستاۋوۆانى ءبىر ەر ادام زورلاماق بولعان. ءوزىن قورعاۋ ماقساتىندا جاسالعان ىس-ارەكەتتەن جۇلدىز ول ەر ادامدى ءولتىرىپ العان.

«ءۇش اي بويى مەنىڭ قىزىم تەرگەۋ اباقتىسىندا جاتتى. ونى بىرەسە قاراعاندىعا، بىرەسە جەزقازعانعا تاسىپ ءجۇردى»، - دەيدى جۇلدىزدىڭ اناسى مارۋزا جۇمابەكوۆا.

ونىڭ ويىنشا، قىزىن اقتاپ الۋعا بولاتىن ەدى نەمەسە شارتتى جازا تاعايىندالاتىن ەدى. سوندىقتان دا جۇلدىزدىڭ تۋىستارى تەرگەۋ جۇمىستارىنىڭ اياقتالعانىن توسىپ، سوت وتىرىسىن كۇتىپ جۇرگەن. 26 ماۋسىم كۇنى جۇلدىزدىڭ تۋىستارىنا ونىڭ ءولىمى جايلى حابار كەلگەن. رەسمي قۇجاتتاردا وز-وزىنە قول سالدى دەپ كورسەتىلگەن.

«25 ماۋسىم كۇنى ءبىر ەر ادام حابارلاسىپ اۋرۋدى باساتىن ءدارى الىپ كەلىپ بەرۋدى ءوتىندى. ال ءبىر كۇن بۇرىن جۇلدىزدىڭ ءوزى حابارلاسىپ اياعى ءىسىپ كەتكەندىگىن، سوعان قارسى ءدارى الىپ كەلىپ بەرۋدى وتىنگەن بولاتىن. 26 ماۋسىم كۇنى ونىڭ اسىلىپ قالعاندىعىن ەستىدىك»، - دەيدى ونىڭ اناسى.

34 جاستاعى ايەلدىڭ اناسى قىزىنىڭ وزىنە قول سالدى دەگەنىنە سەنبەي وتىر.

بىرىنشىدەن، ونىڭ وزىنە قول جۇمسايتىن ويى بار ەكەندىگىنەن مۇلدەم حابارسىز بولعان. ءۇش اي بويى تۋىستارى جۇلدىزبەن كەزدەسە الماسا دا، اپتا سايىن ودان حات الىپ تۇرعان. ول وزىنە بارىنشا ساقتىقپەن قاراپ، جاقىن ارادا ۇيگە ورالاتىندىعىن جازعان.

«ونىڭ ارتىندا 8 جانە 13 جاستاعى ەكى بالالارى قالدى. ولارعا تەك جاقسىلىققا ۇمىتتەنىپ جۇرگەندىگىن جازعان. جاقىن ارادا بوستاندىققا شىعىپ، قاستارىنا ورالاتىندىعىن ايتقان. ەشقانداي دا وز-وزىنە قول جۇمساۋعا قاتىستى بىردە-بىر بەلگى جوق»، - دەيدى مارۋزا جۇمابەكوۆا.

ەكىنشىدەن، جۇمابەكوۆانىڭ ايتۋىنشا، سۋرەتتەرگە قاراپ وتىرىپ، ونى قيناپ ولتىرگەندىگىن كورۋگە بولادى.

«ونىڭ دەنەسىنىڭ بارلىعى كوگەرگەن. كوپتەگەن سىزاتتار بار، ميىنا زاقىم كەلگەن جانە دە شاشىنا بەلگىسىز سۇيىقتىق جاعىلعان. باس سۇيەگى مەن تىرناقتارى سىنعان، دەنەسىنىڭ ءار جەرى تىلگىلەنگەن. ونىڭ ءمايىتىن بىزگە جەرلەگەنگە دەيىن كورسەتكەن جوق. ءمايىتحاناعا كىرگىزبەي تاستادى. تەك جەرلەۋگە دايىندالىپ جاتقان كەزدە عانا ءبىز بۇل سۇمدىق كارتينانى كوردىك»، - دەپ قوسا كەتتى اناسى.

جۇلدىز قىستاۋوۆانىڭ ولىمىنە قاتىستى ءوزىنىڭ شاعىمدارىن ونىڭ تۋىستارى ق ر باس پروكۋراتۋراسىنا جولدادى. 

دايىنداعان: نازەركە لابيحان