«سامۇرىق-قازىنا» قورىنىڭ ءىرى اكتيۆتەرىن وتكىزۋ مەرزىمدەرى نىسانداردى بارىنشا تارتىمدى باعامەن ساتۋ ءۇشىن تۇزەتىلدى، دەپ جازادى قامشى اقپارات اگەنتتىگى. بۇل تۋرالى ۇكىمەت وتىرىسىنىڭ قورىتىندىسى بويىنشا وتكەن باسپا ءسوز كونفەرەنسياسىندا ق ر قارجى ۆيسە-مينيسترى بەرىك شولپانقۇلوۆ حابارلادى. 

جۋرناليستەردىڭ سۇراقتارىنا جاۋاپ بەرە وتىرىپ، ب. شولپانقۇلوۆ جاڭا تەرمينال تۇرعىزىلعان استانانىڭ حالىقارالىق اۋەجايىن مىسالعا كەلتىردى. 

«قۇرىلىس اياقتالعاننان كەيىن، اۋەجاي قۇنى ۇلعايتىلدى. ونى سول كەزدە ساتقان دۇرىس بولار ما ەدى، الدە باعانىڭ وسكەنىن كۇتۋ كەرەك پە؟ ءبارى دە تۇسىنىكتى دەپ ويلايمىن»، - دەدى سپيكەر. 

ءدال وسىنداي جاعداي «قازاتومونەركاسىپتە» ورىن الدى. 

«كومپانيا وندىرەتىن ءونىم قۇنى وسەدى دەپ كۇتىلۋدە، سايكەسىنشە، كومپانيا باعاسى دا ۇلعايادى. وسىنى ەسكەرە وتىرىپ، ءبىز نارىقتاعى ەڭ جوعارعى باعانى كۇتەمىز»، - دەدى ۆيسە-مينيستر. 

قازىرگى تاڭدا ءىرى كومپانيالاردى وتكىزۋ ءۇشىن ساتۋ الدىنداعى دايىندىق جۇمىستارى، باعالاۋ، الەۋەتتى ينۆەستورلاردى ىزدەستىرۋ جۇمىستارى جۇرگىزىلىپ جاتىر. قارجىلىق اۋديت ءۇشىن تاۋەلسىز كونسۋلتانتتار تارتىلدى. «سامۇرىق-قازىنا» ءۇاق 17 ءىرى كومپانياسىن وتكىزۋ جۇمىستارى جوسپارعا سايكەس 2019-2020 جىلدارى جۇزەگە اسىرىلادى.