2017 جىلدىڭ 4 شىلدەسىندە № 2 اۆتوپارككە تيەسىلى مەملەكەتتىك ءنومىرى 142 ات 01. گاراجدىق ۆ 001، № 50 اۆتوبۋستا جولاۋشى مەن كوندۋكتور جانە وسى مارشرۋتتىڭ جۇرگىزۋشىسى اراسىندا جانجال ورىن العان.
جولاۋشىلار كولىگى باسقارماسى، «استانا LRT» ج ش س كولىكتىك باقىلاۋ قىزمەتى جانە №2 اۆتوبۋس پاركى اتالعان فاكت بويىنشا تەكسەرىس جۇرگىزدى.
اۆتوبۋستا ورناتىلعان بەينەباقىلاۋدىڭ كومەگىمەن بۇل كيكىلجىڭنىڭ قالاي وربىگەنىن انىقتادى.
ساعات 10.30 ۋاقىت شاماسىندا تۇران كوشەسى بويىنداعى «انا مەن بالا» ايالداماسىنان №50 باعىت بويىنشا قاتىناعان اۆتوبۋس ايالداۋ بولىگىنەن اسىپ بارىپ توقتايدى. سەبەبى ايالدامانىڭ ورتاسىندا № 51 اۆتوبۋس (گارموشكا) تۇرادى دا، جۇرگىزۋشىگە ايالدامانىڭ الدىنا توقتاۋ مۇمكىن بولمايدى.
بۇل فاكتىگە كوڭىلى تولماعان جولاۋشى اتالعان باعىت جۇرگىزۋشىسىنە بىلاپىت ءسوز ايتا باستايدى. ونى كوندۋكتور سابىرعا شاقىرعانمەن، ول تەلەفونىنداعى كامەرانى قوسىپ، اۆتوبۋستى جۇرگىزىپ بارا جاتقان جۇرگىزۋشىگە بارادى. جولاۋشى داۋىس كوتەرىپ ايقايلاپ، اۆتوبۋستىڭ ءقاۋىپسىز جۇرۋىنە كەدەرگى كەلتىرەدى دەپ حابارلايدى قامشى اقپاراتتىق اگەنتتىگى استانا قالاسى اكىمدىگىنىڭ باسپا ءسوز قىزمەتىنە سىلتەمە جاساپ.
اۆتوموبيل كولىگىمەن جولاۋشىلار مەن جۇكتى تاسىمالداۋ ەرەجەسىنە سايكەس اۆتوكولىك قۇرالى قوزعالىسىن باسقارۋ كەزىندە جۇرگىزۋشىنىڭ اڭگىمەمەن الاڭداۋىنا تىيىم سالىنادى. جۇرگىزۋشىنى الاڭداتۋ جول كولىك وقيعالارىنا نەمەسە ودان دا اۋىر قايعىلى وقيعالارعا اكەپ سوعۋى مۇمكىن. سالدارىنان جولاۋشىلار زارداپ شەگۋى ىقتيمال.
اۆتوبۋستا ورناتىلعان بەينەباقىلاۋ كامەراسىنان الىنعان ۆيدەودا جولاۋشىنىڭ ءوزى جۇرگىزۋشىمەن جانجال تۋدىرۋعا ارەكەت ەتكەنى كورىنىپ تۇر. ال، كوندۋكتور بولسا، جولاۋشىعا اۆتوبۋستىڭ ورتاسىنا ءوتىپ، ءوز ورنىنا جايعاسۋدى شاقىرىپ، كيكىلجىڭدى باسۋعا تىرىسقان.
الايدا جولاۋشى ارى قاراي ءموبيلدى تەلەفونىنا ءتۇسىرۋدى جالعاستىرىپ، وسىلايشا اۆتوبۋستىڭ قوزعالىسىنا كەدەرگى كەلتىرگەن. جۇرگىزۋشى بىرنەشە رەت تەلەفوندى الىپ تاستاۋعا تىرىسقان. ءتىپتى جۇرگىزۋشىنىڭ قولى تەلەفونعا ءتيىپ كەتىپ، ول الدىڭعى تەرەزەگە قاراي قۇلاعان. بۇل فاكتىگە جولاۋشى ىزالانىپ، جۇرگىزۋشىنى جاعىنان ۇرعان. جۇرگىزۋشىنىڭ سوزىنشە، ول باعىتتى شاتاستىرىپ الىپ، شۇعىل تەجەگىشتى باسقان. ابىروي بولعاندا، جىلدام توقتاعانننان اۆتوبۋس سالونىندا ەشكىم زارداپ شەكپەگەن، قۇلاماعان.
دەنە جاراقاتىن سالۋ جانە قوعامدىق كولىكتىڭ قوزعالىسىنا كەدەرگى جاساۋ فاكتىسى بويىنشا №2 اۆتوبۋس پاركى ارىز تولتىرۋ ۇستىندە، ول ءتيىستى قۇقىق قورعاۋ ورگاندارىنا جىبەرىلەدى.
قول جۇمساۋ ارەكەتتەرىنەن كەيىن كوندۋكتور وز-وزىنە يە بولا الماي، جولاۋشىعا داۋىس كوتەرە باستاعان.
قانداي جاعداي بولماسىن، ءتارتىپتى بۇزعان بۇزاقىعا كوندۋكتوردىڭ داۋىس كوتەرۋگە قۇقىعى جوق. بۇل ءۇشىن كوندۋكتور تارتىپتىك جاۋاپكەرشىلىككە تارتىلادى.
ورىن العان ۇرىس-كەرىسكە قوعامدىق كولىكتىڭ جولاۋشىلارى ارالاسىپ، ەر ادامدى سابىرعا شاقىرۋعا تىرىسقان. بۇل بەينەكامەراعا ءتۇسىپ قالعان ۆيدەودا جازىلعان. جولاۋشى نارازىلىق تۋدىرعان ەر ادامدى سابىرعا شاقىرۋعا تىرىسقان، دەگەنمەن بەينەگە ءتۇسىرۋىن توقتاتپاعان.
كەلەڭسىز وقيعا قوعامدىق كولىكتىڭ جولاۋشىلارى مەن كوندۋكتورى، نارازىلىق تۋدىرعان ەر ادامنىڭ اراسىندا قارقىن الىپ، داۋ-دامايعا ۇلاسقان. جولاۋشى ءدال وسى ءساتتى الەۋمەتتىك جەلىلەرگە سالىپ، بەينەنى تاراتىپ جىبەرگەن.
قىزمەتكەرلەردىڭ جۇمىس ساپاسىن ارتتىرۋ ماقساتىندا استانادا كولىك قىزمەتكەرلەرىنىڭ كاسىبي شەبەرلىگىن ارتتىرۋ ورتالىعى جۇمىس ىستەيدى. ول جەردە قوعامدىق كولىكتىڭ قىزمەتكەرلەرى پسيحولوگيالىق تەست، جول كولىك قوزعالىسىنىڭ ەرەجەلەرىن ءبىلۋ، تەحنيكالىق ءتارتىپتىڭ كاسىبي نەگىزى بويىنشا وقىلىمدار سياقتى حالىقارالىق ستاندارتقا نەگىزدەلگەن وقۋدان وتەدى. جولاۋشىلارعا قاتىستى مادەنيەتتى ساقتاۋعا ەرەكشە كوڭىل بولىنەدى.
شولۋشى: اسەم المۇحانبەت
