3 شىلدەدە اپتاپ ىستىقتان جاعدايى ناشارلاعان بالانى فاتيما حايزۋللانى قۇتقارىپ قالعان. جولسەرىك بۇل جاعدايدىڭ قالاي بولعانىن بايانداپ بەردى دەپ xابارلايدى قامشى اقپاراتتىق اگەنتتىگى.

3 شىلدە كۇنى التىناي رامبايەۆا ادەتتەگىدەي جۇمىسقا شىقتى. استراحاننان ماڭعىستاۋعا بەت العان جولاۋشىلارعا جولسەرىك بولعان ول ماقات ستانساسىنا دەيىن بارلىعى ويداعىداي بولدى دەيدى. اتالعان ستانساعا كەلىپ جەتكەن كەزدە جولاۋشىلاردىڭ ءبىرى كۋپەدە ءسابيدىڭ شەتىنەپ كەتكەنىن حابارلاعان.

«ماقاتتان وتكەننەن كەيىن ەكىنشى كۋپەدەگى ايەل جۇگىرىپ كەلىپ ءسابيدىڭ كوز جۇمعانىن، ال اناسىنىڭ جىلاپ وتىرعانىن حابارلادى. جۇگىرىپ كەلىپ، نارەستەنىڭ ەس-تۇسسىز جاتقانىن كوردىم. تىنىس الۋىن، جۇرەك قاعىسىن تەكسەردىم… بالا كوك-كومبەك بولىپ كەتكەن. سوسىن قىزدى ءوزىمنىڭ قىزمەتتىك بولمەمە الىپ كەتىپ، ونىڭ قايتا تىنىس الۋى ءۇشىن بارىمدى سالدىم»، – دەيدى التىناي رامبايەۆا.

جولسەرىك 9 ايلىق فاتيماعا سۋ شاشىپ، ارقاسى مەن قۇيرىعىنان قاققان.

«سول ساتتە ەشتەڭەدەن قورىقپادىم. قۇددى ىشىمدە ءبىر كۇش پايدا بولعانداي، قولىمنان كەلگەننىڭ ءبارىن جاسادىم. ءوزىمنىڭ ەكى قىزىم بار، سوندىقتان بۇل قىزدىڭ ءومىر سۇرگەنىن قاتتى قالادىم. ال 40 مينۋتتان كەيىن ەسىن جيعان كەزدە قۋانىشتان جىلاپ جىبەردىم دە: “ءومىر ءسۇر، قانەكي، ءومىر ءسۇر”، – دەپ ايقايلاي بەردىم. سودان قۇلسارى ستانساسىنا جەتكەنشە بىرنەشە جاتتىعۋ جاسادىم. ودان كەيىن قىز تىنىس الىپ، جىلاي باستادى. باقىتىمدا شەك بولعان جوق»، – دەپ ءبولىستى التىناي رامبايەۆا.

ال قۇلسارىعا جەتكەننەن كەيىن كىشكەنتاي فاتيما مەن ونىڭ اناسى اراي جالييەۆا اۋرۋحاناعا جەتكىزىلدى.