اتىراۋ وبلىسىنداعى قاشاعان كەن ورنىن وڭدەۋشى NCOC كومپانياسى IT سالاسىنداعى قاۋىپسىزدىك جۇيەسىن كۇشەيتپەكشى، دەپ حابارلايدى «قازاقپارات» حاا. 

«2017 جىلدىڭ 12 مامىرىندا NCOC كومپانياسى WannaCry زياندى باعدارلاماسىن پايدالانا وتىرىپ، الەمدەگى كيبەر شابۋىلعا ۇشىراعان كومپانيالاردىڭ ءبىرى اتاندى. IT بويىنشا ءتيىمسىز قىزمەتتەر مەن بارلىق قولدانۋشىلاردىڭ پايدالانۋ مۇمكىندىگى دەرەۋ قالپىنا كەلتىرىلدى. اتالعان شابۋىل مۇناي وندىرۋگە قاتىستى وندىرىستىك وپەراسيالارعا اسەر ەتكەن جوق. سونداي-اق، وندىرىستىك قاۋىپسىزدىكتى قامتاماسىز ەتۋدە دە ەشقانداي ماسەلە تۋىنداماعان. قازىرگى ۋاقىتتا IT-گە قاتىستى بارلىق وپەراسيالار شتاتتىق تارتىپپەن جۇزەگە اسىرىلۋدا. NCOC كومپانياسى بولاشاقتا مۇنداي شابۋىلداردى بولدىرماۋ ماقساتىمەن IT سالاسىنداعى قاۋىپسىزدىك جۇيەسىن كۇشەيتۋ جۇمىستارىن جالعاستىرادى»، - دەپ حابارلادى اگەنتتىك سۇراعىنا جاۋاپ بەرگەن كومپانيانىڭ باسپا ءسوز قىزمەتى.

ايتا كەتەيىك، 12 مامىر، جۇما كۇنى NCOC كومپانياسىنىڭ اقپاراتتىق قاۋىپسىزدىك جۇيەسىندە شامامەن ساعات 18.00-دە كومپانيا سەرۆەرلەرىنە ۆيرۋستىق شابۋىل جاسالعاندىعى تىركەلدى. ساقتاندىرۋ شاراسى رەتىندە ينتەرنەت جەلىسىنە جانە كورپوراتيۆتىك پوشتاعا ەنۋ توقتاتىلدى. كيبەر شابۋىل سەرۆەرلەردىڭ 10-20%-ى مەن NCOC كومپانياسىنىڭ كومپيۋتەرلەرىن شارپىعان بولاتىن.