بۇكىل الەمدىك بوكس سەرياسى WSB جوباسىنىڭ VII ماۋسىمى دا اياقتالۋعا جاقىن. بۇل ماۋسىمنىڭ فينالدىق جەكپە-جەگى "استانا ارلاندارى" مەن "كۋبا دومادورەس" كوماندالارى اراسىندا وتەدى. فينالدىق ايقاس 15ء-شى شىلدە كۇنى استانا قالاسىنداعى "قازاقستان" سپورت كەشەنىندە بولماق. قازاق جۇرتى كوز تىككەن بۇل ايتۋلى باسەكەگە ءبىزدىڭ بوكسشىلار دا جانىن سالا دايىندالۋدا. ماۋسىمنىڭ اقىرعى ايقاسى باستالۋعا دا ساناۋلى كۇندەر قالدى. وسى ورايدا "استانا ارلاندارىنىڭ" باس باپكەرى نۇرلان اقۇرپەكوۆ مىرزانى اڭگىمەگە تارتقان ەدىك.

قۇداي قالاسا، بيىلعى جەتىنشى ماۋسىمداعى فينالعا دەيىنگى ايقاستاردا سۇرىنبەي، اقىرعى اسۋعا جەتتىڭىزدەر. الدا ۇلكەن سىناق كۇتىپ تۇر. جالپى، دايىندىقتارىڭىز جايلى قىسقاشا ايتىپ بەرسەڭىز.

– وزدەرىڭىز بىلەسىزدەر، الداعى بولاتىن ەكى جەكپە-جەك تە 15 شىلدە كۇنى قازاق جەرىندە وتەدى. رەگلامەنت بويىنشا 24 ماۋسىم كۇنى ءبىز كۋباعا بارۋعا ءتيىستى بولاتىنبىز. بارعان جاعدايدا بىزگە ءسال قيىن سوعار ەدى. ويتكەنى، ءبىزدىڭ ءبىرىنشى نومەرلى بوكسشىلار ءسال شارشادى. ونىڭ ۇستىنە ۋاقىت پەن كليماتى باسقاشا مۇحيتتىڭ ارعى جاعىنا ۇشىپ بارۋ دا بىزگە قولايسىز سوعار ەدى. AIBA شەشىمىمەن اقتىق ايقاستىڭ 15 شىلدەگە قالعانى جاقسى بولدى. جىگىتتەرىمىز ۇيلەرىنە بارىپ، ونشاقتى كۇن دەمالىپ الدى. سوسىن، 28 ماۋسىمنان دايىندىقتى باستاپ كەتتىك. بوكسشىلارىمىزعا بارلىق جاعداي جاسالىپ جاتىر. ءبارىنىڭ كوڭىل-كۇيلەرى دە جاقسى. قۇداي قالاسا الداعى كۇندە باعىمىزدى سىناپ،  15 شىلدە كۇنى قازاق بوكسىنىڭ قاي دەڭگەيدە تۇرعانىن كورسەتەمىز دەپ ويلايمىن.

ۇلتتىق قۇرمادان كەلەتىن كومەك جايلى جاعىمدى اقپاراتتار جانكۇيەرلەردى قۋانتىپ ەدى...

ۇلتتىق قۇراما بوكسشىلارى جاقىندا عانا تۇركياعا بارىپ، دەمالىس وقۋ-جاتتىعۋىنان كەلدى. ول جاقتان ۆاسيليي ليەۆيت جاراقاتپەن ورالدى. سوعان بايلانىستى ول الداعى فينالدا بىزگە كومەككە كەلە المايدى. مەنىڭ كوڭىلىمە قاياۋ سالىپ تۇرعان وسى ماسەلە. ويتكەنى، 91 كەلىدە جەڭەتىن جىگىتتەردىڭ تىزىمىندە ۆاسيا تۇرعان ەدى. ونىڭ ورنىنا ەندى ءوزىمىزدىڭ كوماندانىڭ ءتىس قاققان بوكسشىسى انتون پينچۋكتى دايىنداپ وتىرمىن.

اۋىر سالماقتا ودان كەيىن ءۇمىت ارتقان بوكسشىمىز قامشىبەك قوڭقابايەۆ ەدى. اۋىلداعى اناسى اۋىرىپ، اۋىر حالدە ەمحاناعا تۇسكەن ەكەن. سوعان بايلانىستى ول دا قىزىلورداعا ۇشىپ كەتتى. فينال كەزىندە ونىڭ شارشى الاڭعا شىعا المايتىنى بەلگىلى بولدى. ونىڭ ورنىنا ولجاس بۇقايەۆتان وزگە لايىقتى ادام بولماي تۇر.

ۇلتتىق قۇرامادان 75 كەلى سالماق دارەجەسى بويىنشا ءابىلحان امانقۇل "ارلاندار" ساپىندا مايدانعا شىعادى دەپ ەستىپ ەدىك...

اڭگىمە باسىندا ايتقانىمداي، بۇل جولعى ايقاس ءبىز ءۇشىن جەڭىل سوققالى تۇرعان جوق. وتكەندە عانا استانادا وتكەن پرەزيدەنت كۋبوگىندا ءابىلحان امانقۇل ءبىر قولىنان جاراقات العان بولاتىن. جۋىقتا دايىندىق ۇستىندە ەكىنشى قولىن دا جارالاپ الدى. ول دا الداعى فينالدىق كەزدەسۋدە مايدانعا شىعا المايتىن بولدى. اقىرى، ونىڭ ورنىنا ساپارباي ايداروۆ شىعادى دەپ وتىرمىز.

قىسقاسى، ۇلتتىق قۇراما تاراپىنان بىزگە كومەككە كەلەدى دەگەن سەنىمدى ءۇش بوكسشى دا جوعارىدا ايتقان جاعدايلارعا بايلانىستى ارلاندار ساپىندا شارشى الاڭعا شىعا المايتىنى وكىنىشتى-اق بولدى...

بيىلعى ماۋسىمداعى ەڭ ءقاۋىپتى قارسىلاس "كۋبا دومادورەس" كومانداسى تۋرالى قىسقاشا ايتىپ بەرسەڭىز.

كۋبا كومانداسى – قازىرگى كۇندە الەمدە اتاعىنان ات ۇركەتىن ايتۋلى كوماندالاردىڭ ءبىرى. قۇرامىندا شەتىنەن ىعاي مەن سىعايلار، الەم جانە وليمپيادا چەمپيوندارى، ەڭ كەمى پانامەريكا ويىندارىنىڭ جەڭىمپازدارى.

ءبىر تاڭ قالارلىعى ولاردىڭ نومەرى ءبىرىنشى ويىنشىلارى قازاقستانعا كەلىپ قانشا كەزدەسۋ وتكىزسە دە جالىقپايدى. ولار دا "قازاق بوكسشىلارىمەن كەزدەستىرىپ، ەكىنشى نومەرلى بوكسشىلارىمىزدى ءبىر سىناپ كورەيىك" دەمەيدى. بىزدە وتكەن قانداي كەزدەسۋ بولماسىن، ۇنەمى ءبىرىنشى نومەرلى جىگىتتەرىن اكەلە بەرەدى. ەكى دۇركىن نەمەسە ءۇش دۇركىن الەم چەمپيوندارى دا كەلە بەرەدى. الدا الەم چەمپيوناتى كۇتىپ تۇر، سوعان قاتىساتىن بوكسشىلارى بىزگە كەلىپ جاراقات الىپ قالا ما دەگەن ساقتانبايدى. كۋبا – الەم چەمپيوناتىنان قورىقپايدى، قازاق بوكسشىلارىنان قورقادى. ولار مۇحيتتىڭ ارعى جاعىنان جولدى اۋىرسىنباي، ارنايى كەلىپ، الەم چەمپيوناتىنا قارسى دايىندىعىن بىزگە كەلىپ پىسىقتايدى. ولاردىڭ بۇل جولى دا ءبىرىنشى نومەرلەرىن الىپ كەلە جاتقانىنا قاراعاندا، ءوز جەرىمىزدە ءبىزدىڭ ەلدەن جەڭىستى جۇلىپ الۋدى ماقسات ەتىپ تە كەلە جاتىر. سول سەبەپتى مەن جانكۇيەرلەردىڭ الدىندا جەرگە قاراپ قالماس ءۇشىن جىگىتتەرىمدى كۇندىز-تۇنى دايىنداپ، ولاردى كۇنىگە قايراپ، جەڭىستى قالايدى قولدان بەرمەۋگە جىگەرلەندىرۋدەمىن. ءار بوكسشىمەن جەكە-جەكە جۇمىس جاساپ، دايىندىقتى قايتالاي پىسىقتاپ، قانداي تاسىلمەن جەڭۋ جولدارىن زەرتتەۋدەمىن. اۋىر سالماقتا ليەۆيت پەن قوڭقابايەۆتان وزگە جانىبەك ءالىمحان مەن ادىلبەك نيازىمبەتوۆتەردىڭ دە جاراقاتى قول بايلاپ وتىر. ولار الدا وتەتىن الەم چەمپيوناتىنا دا قاتىسپايدى.

اۋىر سالماقتاعى جىگىتتەردىڭ جاعدايى بەلگىلى بولدى. ەندى ورتا جانە جەڭىل سالماقتا ونەر كورسەتەتىن جىگىتتەرمىز بەن ونىڭ قارسىلاستارى تۋرالى ايتىپ بەرسەڭىز.

49 كەلىدە تەمىرتاس ءجۇسىپوۆ. ول دا ءبىزدىڭ قۇراماداعى ەڭ تاجىريبەلى بوكسشىلاردىڭ ءبىرى، قازاقستان چەمپيونى. وسى سالماقتا جۇرگەنىنە ۇزاق بولدى. نەگىزىندە، 49 كەلى سالماقتا ونەر كورسەتۋ، بۇل سالماقتى بىرنەشە جىل بويى ۇستاپ تۇرۋ دەگەن وتە قيىن. كەز كەلگەن ادامنىڭ ورگانيزمى، دەنەسى وسەدى، مىسالى، 49 كەلىدە نە ءبىر مىقتى جىگىتتەر شىعادى، سوسىن ۋاقىت وتە كەلە تۇلعاسى ءوسىپ كەتەدى دە ءارى قاراي سالماقپەن كۇرەسىپ كەتەدى. ال تەمىرتاس جاسى 30-دان اسسا دا 49 كەلىدە قازاقستاندا تەڭدەسى جوق بوكسشى. وسى جوبادا كوماندامىزعا تالاي جەڭىستەر سىيلاپ، جانكۇيەرلەرىنىڭ كوڭىلىنەن شىعىپ ءجۇر. تۋرا وسى جولعى قارسىلاسى – يوانيس وسكار ارگيلاگوس پەرەستى 2015 جىلى جەڭگەن بولاتىن. ءبىراق، ول كەزدە پەرەس 17 جاستا بولدى. ودان بەرى وسى كۇنگە دەيىن تاجىريبە جيناقتادى، تەمىرتاس بولسا ەسەيە ءتۇستى دەگەندەي. سوندىقتان بۇل جەردە اسلانبەك شىمبەرگەنوۆ پەن ونىڭ قارسىلاسى سياقتى، تاجىريبە مەن جاستىق جالىننىڭ ايقاسى بولماق.

52 كەلىدە كوماندامىزدىڭ كاپيتانى ولجاس ساتتىبايەۆ. بۇل جولعى قارسىلاسى – يوسۆاني ۆەيتيا سوتومەن بۇعان دەيىن دە 2015 جىلى وسى جوبادا جەڭگەن. سونىمەن قاتار، ەكەۋى وزگە دە حالىقارالىق تۋرنيرلەردە كەزدەسكەن، ءبىر-بىرىن جاقسى بىلەدى. بۇل قارسىلاسى دا وسال جاۋ ەمەس، وليمپيادانىڭ قولا جۇلدەگەرى. جالپى، بۇل جولى قاي-قايسىسىنا دا وڭاي بولمايدى، ارينە. دەگەنمەن، ولجاس – نامىسشىل، جىگەرلى جىگىت، كىشكەنتايىنان ءوزىمنىڭ شاكىرتىم، قىر-سىرىن جاقسى بىلەمىن. ەل نامىسى سىنعا تۇسكەن وسىنداي قىسىلتاياڭ ساتتەردە ءوزىن كورسەتە الادى بۇيىرسا.

56 كەلىدە ءىلياس سۇلەيمەنوۆ. ول دا كوپتەگەن سىناقتاردان سۇرىنبەي ءوتىپ جۇرگەن تاجىريبەلى سپورتشى. ازيا ويىندارىنىڭ چەمپيونى، وليمپياداعا قاتىسقان. بيىل 52 كەلىدەن 56 كەلىگە سالماق اۋىستىردى، قازاقستان چەمپيوناتىنىڭ كۇمىس جۇلدەگەرى بولدى، سودان بەرى ءبىزدىڭ جوبادا بوكستاسىپ ءجۇر. "ارلاندار" ساپىنداعى بارلىق جەكپە-جەكتەرىن تەك قانا جەڭىسپەن اياقتاپ ءجۇر. سوندىقتان ءىلياسقا ارتار سەنىم مول. ال ونىڭ قارسىلاسى جاۆەر يبانەز دياس تا وسال بوكسشى ەمەس. دەگەنمەن، جەڭىسكە مۇمكىندىك بار.

60 كەلىدە كورەرمەندەردىڭ كوڭىلىنەن شىعىپ جۇرگەن جاس باتىر زاكىر سافيۋللين. ول وزىنە ساي ءستيلى قالىپتاسقان، اقىل توقتاتقان، كەز كەلگەن جاعدايدا ءوزىن كورسەتە الاتىن، وتە تاجىريبەلى بوكسشى. بۇعان دەيىن الداعى قارسىلاسى كۋبالىق لازارو الۆارەس ەسترادامەن كەزدەسكەن، تەڭ ويىن بولسا دا، جەڭىس ەستراداعا بەرىلگەن بولاتىن. ودان بەرى دە ول كوپ تاجىريبە جيناقتادى عوي. سوندىقتان زاكىرگە ارتار سەنىم مول.

64 كەلىدە ءدىلمۇرات ءماجيتوۆ بولسا ول جاس سپورتشى، وسى كۇنگە دەيىن كۋبالىقتارمەن كەزدەسىپ كورمەگەن. ول دا ءۇمىتتى اقتاپ جۇرگەن جىگىت، مايداندى قالاي باستاسا، سولاي اياقتايدى، جىلدامدىعى باياۋلامايدى. ونىڭ بۇل جولعى قارسىلاسى الەم چەمپيونى – اندي كرۋز گومەز.

ال 69 كەلى سالماقتا اسلانبەك شىمبەرگەنوۆكە سەنىم ارتىپ وتىرمىن. ونىڭ قارسىلاسى – وليمپيادا چەمپيونى رەينەر يگلەزياس سوتولونگو.  بۇعان دەيىنگى ءبىر كەزدەسۋدە اسلانبەك ونى ايقىن باسىمدىقپەن جەڭگەن. بۇرىن سوتولونگو 64 كەلىدە وليمپيادا چەمپيونى بولعان. ءقازىر 69 كەلىگە اۋىسقانىمەن ۇلكەن جەتىستىككە ءالى جەتە قويعان جوق. الەم چەمپيوناتىندا قولا العانىمەن،  بىلتىر وتكەن ريو وليمپياداسىندا جۇلدەگە ىلىنبەي قالعان. ونىڭ دا جاسى كەلىپ قالعان، اسلانبەك بولسا جاس. سوندىقتان الداعى كەزدەسۋ تاجىريبە مەن جاستىق جالىننىڭ باسەكەسى بولماق.

قورىتىپ ايتقاندا، كۋبا قابىلاندارى ءبىزدىڭ ارلاندار ءۇشىن قۇبىجىق ەمەس. بۇعان دەيىنگى كەزدەسۋلەردە دە تاس-تالقان ەتىپ جەڭگەنبىز. اللا ءساتىن سالسا، بۇل جولى دا جەڭىستى جولىمىزدى جالعاستىرىپ، كەلەسى ماۋسىمعا قادام باسامىز دەگەن سەنىمدەمىن.

اڭگىمەڭىزگە راحمەت! بۇل شايقاستا "ارلاندارىمىز قازاق رۋحىن كوتەرىپ، تۋىمىزدى بيىكتە جەلبىرەتكەي!

اڭگىمەلەسكەن، سۋرەتتەردى تۇسىرگەن ۇلاربەك دالەي ۇلى