اتىراۋ وبلىستىق اۋرۋحاناسىنىڭ №1 نيەۆرولوگيا ءبولىمىنىڭ پاسيەنتتەرى اڭگىمەلەگەن حيكايا قاتىگەزدىگىمەن تاڭ قالدىرادى. بۇل بولىمشەگە قاراقالپاقستاننىڭ تۋماسى، 26 جاستاعى پارۋاز مناجاتدينوۆا 28 ماۋسىمدا تۇسكەن. اياۋسىز سوققىعا جىعىلعان ونى پوليسەيلەر اۆانگارد ىقشاماۋدانىنان تاۋىپ العان. جەدەل جاردەمدى دە سولار شاقىرعان، دەپ حابارلايدى قامشى اقپاراتتىق اگەنتتىگى اق جايىق باسىلىمىنا سىلتەمە جاساپ.

جاس ايەل اۋرۋحاناعا اۋىر كۇيدە جەتكىزىلدى. بالا كەزدەن قويانشىق اۋرۋىمەن اۋىرادى ەكەن، ال اياۋسىز سوققىدان كەيىن ونىڭ جاعدايى ناشارلاپ كەتتى. قويانشىق ۇستاماسى بىرىنەن كەيىن ءبىرى قايتالانا بەردى. پاسيەنت وز-وزىنە كەلگەن كەزدە پالاتالاس كورشىلەرىنە باسىنان كەشكەن جاعدايدى اڭگىمەلەپ بەردى. پارۋازدىڭ دارمەنسىزدىگىن كورگەن ولار «اج»-عا كومەك سۇراپ جۇگىندى.

سونىمەن، وتكەن اپتادا مەن بىرنەشە رەت جولىققان پارۋازدىڭ ايتۋىنشا، ول نوكىستەن اقتاۋعا كۇيەۋىنە بارادى. پويىزدا ءۇش قىزبەن تانىسقان. ولاردىڭ ءبارى نيقاب كيىپ العان، سوندىقتان بەت-جۇزدەرىن كورمەگەن. ولاردىڭ ءبىرىنىڭ ءوزىن جۇماگۇلمىن دەپ تانىستىرعانى ەسىندە.

- ولار ماعان اتىراۋعا ۇيلەرىنە بارا جاتقانىن ايتىپ، پويىزدان ءتۇسىپ، وزدەرىمەن بىرگە كەتۋگە كوندىرە باستادى، - دەپ اڭگىمەلەدى پارۋاز. – بالا كۇتۋشى جۇمىسىن ۇسىنىپ، كۇن سايىن 2800 تەڭگەدەن تولەپ تۇرۋعا ۋادە بەردى. بۇل وتە جاقسى اقشا. مەن تۋىستارىما كومەكتەسكىم كەلدى، سوندىقتان كەلىستىم. 21 ماۋسىمدا اتىراۋعا كەلدىك. ۆوكزالدا ءبىزدى اق دجيپپەن ەر ادام كۇتىپ الدى. مەنى ەكى قاباتتى كوتتەدجگە اپارىپ، ءتولقۇجاتىم، تۋىستارىمنىڭ نومىرلەرى بار تەلەفونىم سالىنعان سومكەمدى الىپ قويىپ، جەرتولەگە قاماپ تاستادى. بالا كۇتۋشى جۇمىسىنىڭ ورنىنا مەنى الدەبىر كافەدە جۇمىس جاساۋعا ماجبۇرلەدى. سوسىن شاعىن مەشىتكە اپارادى، ول جەردە دە تاماق دايىنداۋعا ءتيىس بولدىم. تۇندەرىمدى ەگەۋقۇيرىقتار جايلاعان جەرتولەدە وتكىزدىم، ولار اياعىمدى تىستەپ الاتىن. ول جەردە بىرنەشە كۇن وتكىزگەن سوڭ، مەنى الداپ سوققاندارىن ءتۇسىندىم. ءساتىن تاۋىپ، قاشىپ كەتۋدى ۇيعاردىم. الايدا ول ادامدار ۇستاپ الىپ، ۇرىپ-سوعا باستادى. باسىمنان ۇرىپ، شاشىمنان سۇيرەدى. سوسىن دا ۇستامام ۇستاعان شىعار. مەن سەگىزىنشى سىنىپتان بەرى قويانشىق اۋرۋىمەن اۋىرامىن. ولار قورقىپ كەتىپ، مەنى كوشەگە لاقتىرىپ تاستادى. وز-وزىمە كەلگەن كەزدە، باسىم اۋعان جاققا قاراي جۇگىرە بەردىم...

بۇل حيكايانىڭ قانشالىقتى شىنايى ەكەنىن بىلمەيمىن. الايدا فاكت بار: بىرەۋلەر اياۋسىز سوققىعا جىققان ايەل قۇجاتتارسىز اۋرۋحانا كەرەۋەتىنەن ءبىر شىقتى.

پالاتالاس كورشىلەردىڭ ايتۋىنشا، پارۋازعا پوليسەيلەر كەلگەن:

- ولار ونىمەن اڭگىمەلەستى. ءبىراق ول ارىز جازعان جوق. پوليسەيلەر ارىز جازۋدى ۇسىنعان جوق، ال ول ءتىپتى بۇل تۋرالى ويلامادى دا. ونىڭ ۇستىنە، قازاق ءتىلىن دە، ورىس ءتىلىن دە بىلمەستەن، ۇستاماسى بىرنەشە ساعات سايىن قايتالاپ وتىرعان كۇيدە قالاي جازسىن.

پارۋازبەن مەن العاش 5 شىلدەدە كەزدەستىم. وسى كۇننەن باستاپ اتىراۋلىق پوليسەيلەردەن كوممەنتاريي الۋعا ارەكەتتەنىپ كەلەم، ءبىراق تۇك شىقپادى. ولارعا قويار سۇراعىم كوپ: وسى فاكت بويىنشا قىلمىستىق ءىس قوزعالدى ما؟ زارداپ شەگۋشىنىڭ تۋىستارىن ىزدەۋ شارالارى الىنىپ جاتىر ما؟ پارۋاز مناجاتدينوۆانى وتانىنا جىبەرۋ ءۇشىن قۇجاتتاردى رەسىمدەۋ ماسەلەلەرى شەشىلىپ جاتىر ما؟

ال دەمالىس كۇندەرى بۇعان بەي-جاي قاراماعان قالا تۇرعىندارى تابىلدى. ولار پارۋازعا كيىم-كەشەك پەن ءدام، بايلانىستى بولۋ ءۇشىن ۇيالى تەلەفون اكەلىپ بەردى. وزدەرىنە تانىس وزبەكستان ازاماتتارىنا دوسنازاروۆ سوۆحوزىندا تۇراتىن جانە اتىراۋ قالاسىندا اۋىر جاعدايدا قالعان 26 جاستاعى قاراقالپاقستان تۋماسى تۋرالى سىلتەمەلەر تاراتتى. پارۋازدىڭ حيكاياسى لەزدە كوپشىلىككە تاراپ كەتتى. تۋىستارىنىڭ بايلانىس دەرەكتەرى ەكىنشى كۇن دەگەندە تابىلدى. پارۋازدىڭ اكەسىمەن حابارلاسىپ، قىزىنىڭ باسىنان وتكەن جاعدايدى باياندادى. وكىنىشكە وراي، بۇل قارت قىزىنىڭ ارتىنان بارۋعا كۇشى دە، ماتەريالدىق مۇمكىندىگى دە جوق ەكەنىن ايتتى.  

بۇگىن، 10 شىلدەدە تاڭەرتەڭ پارۋاز بىزبەن حابارلاسىپ، دارىگەرلەردىڭ ونى اۋرۋحانادان شىعارۋعا دايىنداپ جاتقانىن ايتتى. شىققان كەزدە باراتىن جەرى دە جوق...

ءبىز پارۋازدىڭ باسىنداعى جاعداي ول ءۇشىن جاقسى جاعىنا شەشىلىپ، بەيتانىس ادامدارعا سەنبەۋ كەرەكتىگىنە ۇيرەتىپ، ساباق بولادى دەپ ۇمىتتەنەمىز. ءبىراق بۇل حيكايادا ەكى نارسە تاڭ قالدىرادى – قاراپايىم جانە وعان مۇلدەم بەيتانىس ادامداردىڭ جاناشىرلىعى جانە ازاماتتاردى قورعاۋ قىزمەتتىك مىندەتتەرىنە كىرەتىندەردىڭ مۇلدەم ارەكەتسىزدىگى. ءبىز اتىراۋلىق پوليسەيلەر شەت قالماي، وزدەرىنە قاتىستى شارالار الادى دەگەن ءۇمىتىمىزدى جوعالتپايمىز.