اتالعان شارا مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى اياسىندا ءوتتى. كورمە وتاندىق تاۋار وندىرۋشىلەر مەن تۇتىنۋشىلار اراسىندا اشىق ديالوگ  الاڭىن ۇسىنىپ، ءونىم باسەكەگە قابىلەتتى بولۋ ءۇشىن ساپاسىن ارتتىرۋ جانە نارىقتاعى ناسيحاتىن جاقسارتۋ، شەت ەلگە شىعارۋ جولدارىن تابۋ سەكىلدى تاقىرىپتاردى تالقىلاۋدى ماقسات تۇتادى دەپ حابارلايدى Qamshy.kz اقپارات اگەنتتىگى.

فورۋم جۇمىسىنا ق ر پرەمەر-مينيسترى باقىتجان ساعىنتايەۆ، «بايتەرەك» ۇبح اق باسقارما ءتوراعاسى ەربولات دوسايەۆ، «دامۋ» كاسىپكەرلىكتى دامىتۋ قورى» اق باسقارما ءتوراعاسى اباي سارقۇلوۆ، «اتامەكەن» ۇكپ ءتوراعاسى ابىلاي مىرزاحمەتوۆ، قازاقستاندىق كاسىپكەرلەر، ساراپشىلار، ساۋدا جەلىلەرى وكىلدەرى جانە باسقا دا كوپتەگەن تۇلعالار قاتىسادى.

«دامۋ» قورى ۇيىمداستىرعان «قازاقستاندا جاسالعان» اتتى وتاندىق تاۋار وندىرۋشىلەردىڭ ءىىى رەسپۋبليكالىق كورمەسى قوردان قولداۋ العان 350-دەن استام كاسىپورىننىڭ باسىن قوسقان.  ولاردىڭ اراسىندا تاماق ونەركاسىبى، قۇرىلىس سالاسى، جيھاز شىعارۋ، كيىم-كەشەك، ارنايى تەحنيكا مەن قۇرال-جابدىقتار، زەرگەرلىك بۇيىم، كادە سىي مەن پوليگرافيالىق ءونىم شىعارۋشى كاسىپورىندار بار. كورمە 28 شىلدە مەن 30 شىلدە ارالىعىندا 3 كۇنگە سوزىلادى.  بۇل كۇندەرى كورمە قوناقتارى وتاندىق وندىرۋشىلەردىڭ تاۋارلارىن الىپ، قىزمەت تۇرلەرىمەن تانىسىپ، شەبەرلىك ساباقتارىنا قاتاسىپ، تاماقتارىنان ءدام تاتا الادى. كۇندەلىكتى تاڭەرتەڭنەن 16:00-گە دەيىن قۇندى سىيلىقتار ويناتىلادى. شارا اياسىندا «قازاقستاننىڭ ۇزدىك تاۋارى» اتتى رەسپۋبليكالىق بايقاۋ-كورمەسى دە وتەدى.