اقسەلەۋ اعا سەيدىمبەك تۋرالى جازۋ كوپتەن تولعاندىرىپ جۇرگەن وي ەدى. كوزىنىڭ تىرىسىندە ءوز باسىم اعانى، ءبىر جاعىنان، ارىپتەس-فولكلورشى عالىم رەتىندە، ەكىنشى جاعىنان، قازاقي داستۇردەگى سويىمىز ءبىر بولعاندىقتان ارقا تۇتاتىن ەدىم. سويىن ءبىلۋىمىز ونىڭ فاميلياسىنىڭ ورنىنا «تاراقتى اقسەلەۋ» دەپ جازعاننان كەيىن پايدا بولعان تانىم بولسا، فولكلورشى عالىم رەتىندەگى تانىستىعىمىز 1993 جىلدىڭ اقپان ايىنان باستالدى. ول كەزدە احاڭ م.اۋەزوۆ اتىنداعى ادەبيەت جانە ونەر ينستيتۋتىنىڭ «فولكلور جانە قولجازبا» بولىمىندە عىلىمي قىزمەتكەر بولاتىن.
وتكەن عاسىردىڭ 90-جىلدارى قازاقستان تاۋەلسىزدىك الىپ، ەلدىڭ ەڭسەسى كوتەرىلگەن، جۇمىسقا بەل شەشە، ەرەكشە قارقىنمەن، قىزۋمەن كىرىسكەن كەزەڭ ەدى. قوستاناي ولكەسىندە تىڭنان اشىلعان قازاق فيلولوگياسى فاكۋلتەتى باسشىسىنىڭ وقۋ جۇمىسى جونىندەگى ورىنباسارى رەتىندە الماتىداعى بەلگىلى وقۋ ورىندارىنىڭ ءتاجىريبەلەءرىن يگەرۋ ماقساتىندا سول كەزدەگى استانا – الماتىعا ىسساپارمەن كەلگەن كەزىم ەدى. ءۇش-تورت كۇنگە سوزىلعان ءىسساپار اياقتالىپ، شارۋا ىڭعايلانا باستاعاننان كەيىن، قىزىلوردادان قوستانايعا ءبىلىم مينيسترلىگىنىڭ جولداماسىمەن اتتاناردا فاكۋلتەت دەكانى بولعان ۇستازىمىز باعدات كارىبوزوۆتىڭ: «قازمۋ-دان (رەسپۋبليكاعا بەلگىلى عالىمنىڭ فاميلياسىن اتاپ) عىلىمي جەتەكشىلىككە عالىم تاۋىپ بەرەمىن، الماتىعا بارساڭ، ماعان تەلەفون سوق، مەن سەنى قازمۋ-مەن بايلانىستىرامىن»، – دەگەن ۋادە-سوزىن «بەرىك ۇستانىپ»، عىلىمي جەتەكشى بەلگىلەپ، تاقىرىپ بەكىتىپ الۋدى ءجون سانادىم.
وكىنىشكە قاراي، قىزىلورداداعى ب.كارىبوزوۆ اعامىزعا حابارلاسا الماي، پۇشايمان بولىپ قوستانايعا كەرى قايتقالى جاتىر ەدىم. سول كەزدە الماتىدا قوستانايلىق ارىپتەسىم ءارى جولداسىم قانىبەك بيجانوۆ دەگەن ازامات عىلىم اكادەمياسىندا عىلىمي ءتاجىريبەدەن ءوتىپ جۇرگەن ەدى. ول – قازمۋ-دىڭ تۇلەگى. قاسىندا ءتىل ءبىلىمى ينستيتۋتىندا اسپيرانت بولىپ جۇرگەن م.سابىروۆ دەگەن جولداسى بار. ەكەۋى وزدەرى وقىعان وقۋ ورنىنىڭ جاتاقحاناسىنا ورنالاسقان ەكەن. سولارعا جاعدايىمدى ايتىپ ەدىم، ولار اكادەميا عالىمدارىنا جولىعىپ، تاقىرىپ الۋدى كەڭەس ەتتى. قىسقاسى، كەلەسى كۇنى ق.بيجانوۆ تاجىريبەدەن ءوتىپ جاتقان م.اۋەزوۆ اتىنداعى ادەبيەت جانە ونەر ينستيتۋتىنىڭ فولكلور جانە قولجازبا بولىمىنە جول تارتتىق.
ءبولىم باسشىسى ق.بيجانوۆتىڭ عىلىمي جەتەكشىسى – شاكىر ىبىرايەۆ. قانەكەڭ مەنى تانىستىرىپ، ماقساتىمدى ايتقاننان كەيىن ول بولىمدە وتىرعان وزگە كىسىلەرمەن كەڭەسىپ، اقىلداسا باستادى. ءبىر كەزدە توردە وتىرعان ءبولىم باسشىسىنىڭ سول جاعىندا اقسارى كەلگەن، بويشاڭ كىسى ءسوز الدى. ءسوز ساپتاۋى بولەك، سويلەمدەرى كىسىنى ۇيىتاتىن ورامدى، ويلى ەكەن. قانەكەڭ ماعان سىبىرلاپ: «بۇل كىسى اقسەلەۋ سەيدىمبەكوۆ دەگەن تاراقتى اعاڭ بولادى»، – دەدى.
– شاكە، بۇل جىگىت ات تەرلەتىپ سوناۋ الىستاعى قوستانايدان كەلگەن ەكەن، – دەدى ول، – بۇل ولكە قازاقتىڭ ءبىرتۋار ازاماتتارى شىققان ءقادىرلى جەر عوي، سوندىقتان سول جاقتا مىناۋ قانىبەك ءبىر كوزىمىز بەن قۇلاعىمىز بولسا، مىنا جىگىت ەكىنشى كوزىمىز بەن قۇلاعىمىز بولىپ وتىرسىن. تاقىرىپ بەرەيىك، بۇل جىگىتتى دە وزىڭىزگە الىپ، ەكى جىگىتكە قوس پار ات جەككەندەي ەتىپ، جەتەكشىلىك ەتسەڭىز، دۇرىس بولار ەدى، – دەدى.
شاكىر اعامىز وعان:
– اقا، ءسوزىڭىز ورىندى، ءبىراق ماعان ول جۇمىس اۋىر تيەر. دوكتورلىق ديسسەرتاسيامنىڭ جۇمىسى قاۋىرت بولىپ جاتىر. بۇل جىگىتتى سەكەڭە ۇسىنايىق، ول كىسى عىلىمعا ىنتاسى بار جىگىت بولسا، ۇسىنار تاقىرىپتارىم بار ەدى دەپ ايتىپ ەدى. مەن وعان تەلەفون سوعايىن، نە دەر ەكەن؟، – دەپ جاۋاپ قاتتى.
ءسويتىپ، ول دەرەۋ تەلەفون شالىپ، ءبىر كىسىمەن سويلەسە باستادى. بايقايمىن: شاكىر اعامىزدىڭ باپپەن سويلەگەن ءسوزى مەن بيازى ۇنىندە سىي-قۇرمەت تابى ەرەكشە سەزىلىپ تۇر. مەنىڭ جولداسىم سىبىرلاپ: «سەكەڭ دەپ جاتقانى – ۆاك-تىڭ ءتوراعاسى سەيىت قاسقاباسوۆ»،– دەدى.
ۆاك دەگەننىڭ نە نارسە ەكەنىن تۇسىنبەسەم دە، ماڭىزدى مەكەمە ەكەنىن ىشتەي ۇعىندىم. ءبىر كەزدە شاكىر اعامىز:
– سەكەڭنىڭ شارۋاسى وتە قاۋىرت، شەتەلگە شىققالى وتىر ەكەن. جەتەكشىلىككە كەلىسىمىن بەرىپ، ابىلاي حان تۋرالى اڭىزداردى تاقىرىپ ەتىپ بەرۋدى ۇسىندى. بۇل جىگىت ءوزى دە ەرتەڭ ەلىنە جۇرگەلى وتىر ەكەن، سوندىقتان ءتۇس اۋا ءبولىمنىڭ جينالىسىن اشىپ، سەكەڭ ۇسىنعان تاقىرىپتى بولىمدە بەكىتەيىك. سودان كەيىن ينستيتۋتتىڭ عىلىمي كەڭەسىنە ۇسىنارمىز. ءوزىڭ كەلەسى جىلى اسپيرانتۋرا، ول بولماسا، عىلىمي تاجىريبە الىپ، بىزگە كەل، – دەدى.
اقسارى كەلگەن كىسى:
– بارەكەلدى، تاۋەلسىزدىككە دەيىن زەرتتەۋ مۇمكىن بولماعان تىڭ تاقىرىپتاردىڭ ءبىرى ەكەن. ونىڭ ۇستىنە اتاقتى ابىلاي حان تۋرالى. سەن، باۋىرىم، تاريحتا بولماعان جاعدايدى باسىڭنان كەشىرىپ وتىرسىڭ. ۆاك-تىڭ ءتوراعاسىنان تەلەفونمەن تاقىرىپ الۋ دەگەن بۇرىن-سوڭدى بولماعان. سەيىت اسقار ۇلى – تالابى قاتتى اتاقتى عالىم. ول كىسىنىڭ مەكتەبىنەن ءوتۋ، تاعىلىم الۋ دەگەن ۇلكەن ابىروي. وسىنى ۇمىتپا! – دەدى.
وسىلايشا، احاڭ ماعان قازاقتىڭ كورنەكتى عالىمى سەيىت قاسقاباسوۆتان تاقىرىپ الىپ، جەتەكشى ەتىپ الۋىما ءوز سەپتىگىن تيگىزدى. ءسويتىپ، سول كۇنى ءتۇس اۋا ءبولىمنىڭ جينالىسىندا تاقىرىپ بەكىتىلىپ، ەرتەڭىنە قوستانايعا كەرى تارتىپ كەتكەن جايىم بار ەدى. ءبىر جىلدان سوڭ، 1994 جىلى كۇز ايى قىركۇيەكتە ارنايى عىلىمي جولداما الىپ، عىلىم اكادەمياسىنىڭ ادەبيەت جانە ونەر ينستيتۋتىنا كەلدىم. سول كەزدە احاڭمەن ءجيى كەزدەسىپ، تىلدەسۋ، سۇحباتتاسۋ، كەڭىرەك تانىسۋ مۇمكىنءدىگى تۋدى. جەتەكشىم – سەيىت اعا ءال-فارابي اتىنداعى ءقازمۋ-دىڭ نيكولسك بازارىنىڭ جانىندا ورنالاسقان بىلىكتىلىكتى كوتەرۋ ينستيتۋتىنىڭ جاتاقحاناسىنان بولمە الىپ بەرگەن بولاتىن. قاسىمدا قاراقالپاقستاننان دوكتورلىق ديسسەرتاسيا جازۋ ءۇشىن كەلگەن ءبىر كىسى بار. ءبىر كۇنى ول ماعان: «كەشكىلىك بولمەگە ەرتەرەك كەل. اقسەلەۋ سەيدىمبەك پەن شاكىر ىبىرايەۆتى شاي ىشۋگە شاقىرىپ وتىرمىن، بىرگە بول»، – دەدى. احاڭ وتىرىستا «سويلەسە – ءسوزدىڭ شەشەءنى، تولعانسا – تەرەڭ ويدىڭ كوسەمى» ەكەنىن تانىتىپ، كوسا اڭگىمە ايتتى.
شاكەڭ ونى ءالسىن-السىن «احاڭ بۇعان نە دەدى ەكەن؟» دەپ كوتەرمەلەپ، قولپاشتاپ وتىردى. سول وتىرىستا احاڭ نە سەبەپتەن فاميليا ورنىنا ءوزىنىڭ شىققان سويىن – تاراقتىنى جازىپ جۇرگەنىن ايتتى. « – مۇنى رۋىمدى كورسەتەيىن، ماقتانايىن دەپ، بولماسا تايپالىق سانانىڭ جالاۋىن جەلبىرەتىپ جۇرگەن جوقپىن. ورىستىڭ داستۇرىنەن ورنىققان «وۆ»-تان قۇتىلۋدىڭ ءبىر ءادىسى رەتىندە قولدانىپ ءجۇرمىن. ءبىر كۇنى قىزىق وقيعا بولدى. ونوماستيكا جونىندەگى رەسپۋبليكالىق كەڭەستىڭ مۇشەسى ەدىم. بىردە ونوماستيكا ماسەلەسى جونىندە رەسپۋبليكالىق كەڭەس وتىرىسى ءوتتى. سوندا قازاق اراسىندا، سونىڭ ىشىندە زيالىلاردىڭ رۋدى فاميليا ەتىپ الۋ كورىنىسى قاتتى سىنالدى. مەنىڭ دە اتىم اتالدى. مەن ءوز ويىمدى ايتتىم. داۋ-تالاس تۋدى. سوندا اكادەميك ماناش قوزىبايەۆ تۇرىپ بىلاي دەدى: «رۋدى فاميليا ەتىپ الۋ، ەل-جۇرت اراسىنا ىرىتكى سالۋى، تاۋەلسىزدىك الىپ جاتقان جاس مەملەكەتىمىزدىڭ بىرلىگىن بۇزۋى مۇمكىن. سوندىقتان مۇنداي داستۇرگە اۋەس بولمايىق. اقسەلەۋگە بۇل جاراسادى. وعان رۇقسات بەرەيىك. وسىمەن ءاڭگىمە ءتامام بولسىن»، – دەدى. وسىلايشا، تەگىمدى رەسپۋبليكالىق ونوماستيكالىق كەڭەس ارقىلى، ماناش اعانىڭ ارقاسىندا «اۋىزشا بەكىتىپ» العانمىن دەپ، – كۇلدى.
سول جولى ول كىسى ماعان ءوزىنىڭ «كۇي شەجىرە» اتتى زەرتتەۋ كىتابىن اۆتورلىق قولتاڭبا جازىپ، سىيعا تارتتى. قولتاڭبا جازىلعان ايقارا بەتتىڭ ءبىر جاعىندا احاڭنىڭ ءوزى سالعان اۆتوپورترەتى بەينەلەنگەن. قولتاڭبادا: «ءقادىرلى باۋىرىم الماسقا اعالىق اق كوڭىلىممەن ۇسىنامىن. س.اقسەلەۋ. 15.11.94 ج» – دەپ جازىلعان ەدى. احاڭنىڭ قولتاڭباسى تۇسكەن اتالمىش كىتاپ احاڭنىڭ بىزدەر ستۋدەنتتىك جىلدارى قۇمارتا وقىعان «كۇڭگىر-كۇڭگىر كۇمبەزدەر»، «سونار» اتتى كىتابىنىڭ قاتارىنان قۇرمەتپەن ورىن تاپتى، ءقازىر دە كىتاپحانا قورىمىزدا ساقتالىپ تۇر.
«كۇي شەجىرە» كىتابىن كەڭەيتە، عىلىمي اپپاراتتارمەن تولىقتىرا وتىرىپ، احاڭ سەيىت اسقار ۇلىنىڭ جەتەكشىلىگىمەن دوكتورلىق ديسسەرتاسيا قورعادى. ونىڭ ديسسەرتاسيا قورعاعان وقيعاسىن سەيىت اعا رازى كەيىپپەن بىلايشا ەسكە الىپ وتىراتىن: «استانادان الماتىعا ينستيتۋتقا ديرەكتور بولىپ قايتا ورالعان كەزىم ەدى. اقسەلەۋ كەءلىپ اقىلداستى: «ءوزىڭىز بىلەءسىز، قازاقتىڭ كۇي ونەرىنە قاتىستى ءبىرنەشە زەرتتەۋ كىتابىن شىعاردىم. سولاردىڭ نەگىزىندە، دوكتورلىق جۇمىستى قورعاسام قايتەدى؟» – دەدى. مەن ايتتىم: «زەرتتەۋ كىتاپتارىڭ عىلىمي ورتاعا تانىس. جۇرتشىلىق سەنى جاقسى بىلەدى. ەندى، سەن سول زەرتتەۋلەرىڭدى عىلىمي جۇيەگە سالىپ، تالداپ، ساراپتاپ، ديسسەرتاسيا جاز، جۇرت الدىندا قورعا»، – دەدىم. ول: «ەندەشە، ءسىز عىلىمي جەتەكشى بولىڭىز»، – دەپ قولقا سالدى. ءسويتىپ، م.اۋەزوۆ ەرەكشە ىقىلاسپەن اتاپ وتكەن قازاقتىڭ كۇي-اڭىزدارى تاقىرىبىن وعان بەردىم. اقسەلەۋ دوكتورلىعىن قورعاعان عىلىمي كەڭەس وتىرىسىنا اتاقتى عالىمدارمەن قاتار، ءاسانالى ءاشىموۆ باستاعان ءبىر توپ ونەر قايراتكەرلەرى قاتىستى. عىلىمي كەڭەس – بەلگىلى عالىمدار مەن قازاق ونەرىنىڭ مايتالماندارى باس قوسقان القالى جيىنعا اينالىپ كەتتى. كەڭەستى زورعا جاپتىق».
دوكتورلىق ديسسەرتاسيا قورعاعاننان كەيىن احاڭ الماتىدان استاناعا اۋىسىپ، ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنە وقىتۋشىلىق قىزمەتكە ورنالاستى. ءبىر كۇنى، ۇمىتپاسام، 2004 جىلى بولسا كەرەك، استاناعا جول ءتۇسىپ، احاڭا سالەم بەرۋگە بارىپ، ەۋرازيا ۋنيۆەرسيتەتىنىڭ باس عيماراتىندا جولىقتىم. قال-جاعدايىمدى ءبىلگەننەن كەيىن، عىلىم جاعىنا ويىسىپ، دوكتورلىق ديسسەرتاسيا تۋرالى سۇرادى. قازاق حاندىعىنا بايلانىستى تاقىرىپتى جەتەكشىممەن كەلىسىپ، بەكىتكەنىمدى، ءبىراق ءالى بەل شەشىپ كىرىسپەگەنىمدى ايتتىم. سوندا ول كىسى ماعان بىلاي دەدى: «بۇيىردەگى قوستانايدا بايگەگە ءتۇسىپ ءجۇرسىڭ. سەنىمەن باسەكەلەسەتىن كىسى قاتارى سيرەك. سودان سەن بايگەنىڭ سورەسىنە وق بويى وزىپ كەلەسىڭ دە: «ويپىرم-اي، ءوزىم كەرەمەت ەكەنمىن عوي»، – دەپ رازى بولاسىڭ. جەكە-دارا ءجۇءرىپ، كانديداتتىقتىڭ بۋىنا مالدانىپ قالىپسىڭ. ۋاقىت تەز ءوتىپ كەتەدى. دوكتورلىق قورعاۋ جولىنا ءتۇس. ول ءۇشىن عىلىمي ورتا كەرەك. استاناعا عالىمدار جينالىپ جاتىر. وسىندا اۋىس. الماتىعا دا، سەكەڭە دە (س.قاسقاباسوۆقا) جاقىندايسىڭ. جۇمىسقا ورنالاسۋعا مەن كومەكتەسەيىن. مىناۋ زاڭ ۋنيۆەرسيتەتىنىڭ رەكتورى ماقسۇت نارىكبايەۆپەن جاقسى تامىرلىعىم بار ەدى. وعان ءبىر ءوتىنىش ايتايىن، سەنى جۇمىسقا ال دەپ. ءسوزىمدى جەرگە تاستاماس.از-ماز ساعات الىپ، دوكتورلىعىڭدى وندىرە جازىپ شىعۋىڭ كەرەك»، – دەدى.
«ويلانايىن» دەپ «تايم-اۋت» الىپ، ەلگە تارتتىم. قوستانايدا 9 جىل جاتاقحانادا تۇرىپ، جۇرەگىمىز شايلىعىپ قالعاندىقتان با، ۇي-كۇي جوق استاناعا اۋىسۋعا باتا المادىم. قوستانايدا قالىپ، شىقپاي قويدىم. ءبىراق احاڭنىڭ اقىلىنان كەيىن «قامشىنى باسىپ» 2009 جىلى سەيىت قاسقاباسوۆتىڭ جەتەكشىلىگىمەن دوكتورلىق ديسسەرتاسيا قورعاپ شىقتىم. ديسسەرتاسياعا پىكىر بەرەتىن جەتەكشى ۇيىم بولىپ ەۋرازيا ۋنيۆەرسيتەتىنىڭ قازاق ادەبيەتى كافەدراسى بەكىتىلدى. ەرەجە بويىنشا، تالقىلاۋعا فولكلوريستيكا سالاسىنان ءۇش عىلىم دوكتورى بولۋى ءتيىس. احاڭ جۋرناليستيكا كافەدراسىنىڭ پروفەسسورى ەدى. سوندىقتان قازاق ادەبيەتى مەن جۋرناليستيكا كافەدرالارى بىرىگىپ وتىرىس وتكىزىپ، دوكتورلىق ديسسەرتاسيالىق جۇمىسىمدى تالقىلادى. وڭ شەشىمىن شىعاردى.
جاڭا استانادا احاڭ القالى جيىنداردىڭ، كەلەلى كەڭەستەردىڭ بەل ورتاسىندا ءجۇردى. تاۋەلسىز ەلدىڭ ەسىل بويىنداعى جاڭا استاناسى احاڭنىڭ قازاق الەمىن زەرتتەپ جۇرگەن ىزدەنىسىنىڭ رۋحىنا جاقىن بولاتىن. سوندىقتان ول استانادا تۋعان حالقىنا اسا ۇلكەن شابىتپەن قىزمەت جاسادى. ەلباسى جاڭا رەزيدەنسياعا – اقورداعا كىرگەندە، قازاقتىڭ حان كوتەرگەندە جاسايتىن كونە ءتول ءراسىمىن ىرىمداۋ كورىنىسىنە قاتىسىپ، ورداعا العاشقىلاردىڭ ءبىرى بولىپ كىردى. اقوردا ءتورىندە پرەزيدەنتكە باتا بەرگەن (م.جولداسبەكوۆ، ءا.كەكىلباي) ءۇش تۇلعانىڭ قاتارىندا بولدى.
احاڭنىڭ استاناداعى كەزەڭى مەن سوناۋ ءحۇى عاسىردا قاسىم حاندىعىنداعى وراز-مۇحاممەد حاننىڭ جانىندا قىزمەت اتقارعان قادىرعالي ءجالايىريدىڭ بەينەءسىمەن شەندەستىرەمىن. رەسەي پاتشالىعىنا تۇتقىن بولىپ تۇسكەن وراز-مۇحاممەد ار الدىنداعى ادالدىعى مەن ەرلىك ىستەرى ارقاسىندا قاسىم حاندىعىنىڭ تاعىنا وتىرعاندىعى بەلگىلى. سول وقيعانىڭ قۇرمەتىنە قادىرعالي جالايىري اتاقتى «جامي ات-تاۋاريح» (عىلىمعا تانىلعان اتاۋ) اتتى شىڭعىس حاننان قازاق حاندارىنا دەيىن ۇلاسقان بيلەۋشىلەردىڭ شەجىرەسىن جازادى. حان تاعىنىڭ جانىنان ورىن الادى. ەڭبەكتىڭ سوڭعى سوزدەرىنىڭ سورەسىنە «تاراق تاڭبالى قادىرعالي بي جالايىري» دەگەن مالىمەتتى قالدىرادى. اتالمىش ەڭبەك 400 جىل وتكەن سوڭ، تاراق تاڭبالى اقسەلەۋ سەيدىمبەكتىڭ التى الاشتىڭ شەجىرەسى جيناقتالعان «قازاقتىڭ اۋىزشا تاريحى» اتتى تۋىندىسىمەن استانا تورىندە قايتا جاڭعىرىپ، لايىقتى جالعاسىن تاپتى.
وسى جولداردى وي كوزىمەن وقىعان وقىرمان: «بۇل نە تىلسىم، بولماسا نە قۇدىرەت، الدە تاعدىر ما؟» دەگەن ساۋال تاستاۋى مۇمكىن. بىزدە سول ساۋالدىڭ «شاتىرىن پانالاپ»، قالام سۇيكەپ وتىرعان جايىمىز بار. سانامىز شيىرلاي المايتىن قۇدىرەت سىرلارىن تەك ماتەريالدىق بولمىسقا سۇيەنگەن تۇيسىكپەن ۇعىنىپ، تۇيىندەيتىن تولىق ەمەس تۇسىنىگىمىز بار. ول مىناعان سايادى: بۇل ءومىردىڭ ءمانى – ءارقاشان جالعاستىق تاۋىپ وتىرۋىمەن ماڭىزدى، ماعىنالى ءارى ءساندى. احاڭ تۇلا بويىمەن كونە قازاق مادەنيەتىنىڭ جاڭا مىڭجىلدىقتاعى جاڭعىرىعى، جالعاسى، وزگەشە ءسانى بولىپ قالدى. مادەنيەت بولمىسى مىقتى تۇلعالارمەن جاڭارادى. احاڭ سىندى تۋما تالانتتاردىڭ ءومىرى مەن شىعارماشىلىعى – سونىڭ دالەلى.
الماسبەك ءابسادىق،
فيلولوگيا عىلىمدارىنىڭ دوكتورى،
ا.بايتۇرسىن ۇلى اتىنداعى قمۋ پروفەسسورى
پىكىر قالدىرۋ