قاپشاعايعا جاقىن ماڭدا ادامدى كولىكپەن ۇرلاپ اكەتپەك بولعان ءتورت ەر ادام ۇستالدى، دەپ حابارلايدى Qamshy.kz اقپارات اگەنتتىگى الماتى وبلىسى ىشكى ىستەر دەپارتامەنتىنىڭ باسپا ءسوز قىزمەتىنە سىلتەمە جاساپ.
15 تامىزعا قاراعان ءتۇنى جول-پاترۋلدىك پوليسيا قىزمەتكەرلەرى الماتى-وسكەمەن تاس جولىندا Daewoo Nexia كولىگىن توقتاتادى. جۇرگىزۋشىنىڭ ارەكەتى ءبىر ءتۇرلى كورىنگەن سوڭ، پوليسەيلەر كولىكتى تەكسەرىپ، جۇك سالعىشتان سوققىعا جىعىلعان ەر ادامدى تابادى. قوسىمشا كۇش شاقىرىپ، پاترۋلدىك پوليسەيلەر ءتورت ادامدى ۇستايدى دا، قاپشاعاي ىىب-نە جەتكىزەدى.
"ۇستالعاندار جامبىل وبلىسىندا تۇرادى، الماتىدا جالدامالى جۇمىسپەن اينالىسادى ەكەن. زارداپ شەگۋشى 25 جاستاعى باقاناس اۋىلىنىڭ تۇرعىنى، ول ۇستالعانداردىڭ تانىسى بولىپ شىقتى. ولار جىگىتتى ۇرلىق جاسادى دەپ كۇدىكتەنگەن. ياعني، ۇستالعاندار جابىرلەنۋشىنى جۇكسالعىشقا سالىپ، الماتىدان الىپ كەتىپ، ءارى قاراي ماسەلەنىڭ باسىن اشپاق بولعان"، — دەپ ءتۇسىندىردى باسپا ءسوز قىزمەتىندە.
ۇستالعاندار قاماۋعا الىنىپ، قىلمىستىق ءىس قوزعالدى.
