«استانا ەكسپو-2017» ۇلتتىق كومپانياسى باسپا ءسوز قىزمەتى كورمەنى 1 قاراشاعا دەيىن ۇزارتۋدى سۇراعان استانالىق كاسىپكەرلەردىڭ ۇندەۋحاتىنا جاۋاپ بەردى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

ەسكە سالا كەتسەك، كەشە تۋريستىك وپەراتورلار «استانا ەكسپو-2017» ۇق اق باسقارما ءتوراعاسى احمەتجان ەسىموۆتەن حالىقارالىق كورمەنى 1 قاراشاعا دەيىن سوزۋدى سۇراعان ەدى. اشىق حات اۆتورلارىنىڭ ايتۋىنشا، تۋروپەراتورلار مەن تۋربىرلەستىكتەر ءۇشىن تۇڭعىش رەت تۋريزمنەن پايدا تابۋ مۇمكىندىگى تۋعان.

«ءبىز ولاردى جاقسى تۇسىنەمىز، ەكسپو كەزىندە ولار وتە قوماقتى تابىس تابۋدا. كورمە باستالعان ساتتەن بەرى استاناعا 1 ميلليون 772 مىڭ 489 تۋريست كەلگەن. بۇل كورسەتكىش وتكەن جىلمەن سالىستىرعاندا 4،5 ەسەگە كوپ. كەشە باستاماشىل توپ وكىلدەرىمەن كەزدەسىپ، ۋاجدەرىن تىڭدادىق. ارينە، ولار ءۇشىن قۋانىشتىمىز، ەكسپو-نىڭ باستى مىندەتتەرىنىڭ ءبىرى ءتۋريزمدى دامىتۋ ەدى. دەگەنمەن، ەكسپو حالىقارالىق كورمەلەر بيۋروسىنىڭ رەگلامەنتىنە سايكەس، 3 اي عانا جۇمىس ىستەيدى. بۇل - كاسىپكەرلەردىڭ ۇسىنىسىن قابىلداي الماۋىمىزدىڭ باستى سەبەبى. ونىڭ ۇستىنە كورمەنىڭ حالىقارالىق قاتىسۋشىلارىنىڭ بيۋدجەتى ەسەپتەۋلى، كورمەنى ۇزارتۋ ولارعا دا وڭايعا سوقپاسى انىق»، - دەدى «استانا ەكسپو-2017» ۇلتتىق كومپانياسى قوعاممەن بايلانىس دەپارتامەنتىنىڭ ديرەكتورى سەرگەي كۋيانوۆ.

سونىمەن بىرگە، قوعاممەن بايلانىس دەپارتامەنتىنىڭ باسشىسى كورمە اياقتالعان سوڭ دا ەكسپو-نىڭ ءبىرقاتار عيماراتتارىنىڭ ءوز جۇمىسىن جالعاستىراتىنىن حابارلادى.

«كورمەنىڭ باستى عيماراتى - نۇر الەم پاۆيلونى تۋريستىك نىسان رەتىندە قالدىرىلادى. ول بولاشاقتىڭ مۋزەيى دەپ اتالاتىن بولادى جانە تۇراقتى نەگىزدە جۇمىس ىستەيدى. ارت ورتالىق پەن ۇزدىك تاجىريبەلەر ايماعى دا قالا بەرەدى. ەكى ايدا بۇل پاۆيلوندارعا 120 مىڭنان استام ادام كەلگەن. كونگرەسس ورتالىق پەن ەنەرگيا حولل دا جۇمىس ىستەي بەرەدى»، - دەپ ءوز ءسوزىن تۇيىندەدى س.كۋيانوۆ.