فيدجي رەسپۋبليكاسى 2030 جىلعا قاراي كومىرتەك قالدىقتارىنىڭ كولەمىن 30%-عا قىسقارتۋدى كوزدەيدى. بۇل تۋرالى فيدجي رەسپۋبليكاسىنىڭ پرەمەر-مينيسترى دجوسايا ۆورەكە باينيماراما ەكسپو-2017 حالىقارالىق مامانداندىرىلعان كورمەسى اياسىندا فيدجي رەسپۋبليكاسىنىڭ ۇلتتىق كۇنىن مەرەكەلەۋ بارىسىندا اتاپ ءوتتى، دەپ حابارلايدى Qamshy.kz اقپارات اگەنتتىگى ەكسپو-2017 كورمەسىنىڭ مەديا-ورتالىعىنا سىلتەمە جاساپ.

«ءبىز 2030 جىلعا قاراي جەكە كومىرتەك قالدىقتارىن 30%-عا قىسقارتۋ جونىندەگى پاريج كەلىسىمى اياسىندا قابىلدانعان دۇنيەجۇزىلىك قاۋىمداستىق الدىندا مىندەتتەمەنى ورىنداۋ ءۇشىن  سۋ، جەل جانە كۇن ەنەرگياسى مەن بيوتىنعا كوشۋ قاجەتتىلىگىن تۇسىنەمىز. سونىمەن قاتار، فيدجي رەسپۋبليكاسى مەملەكەتتىڭ جانە الەم بولاشاعى ءۇشىن ماڭىزدى بولىپ تابىلاتىن جاڭارتىلاتىن ەنەرگيا كوزدەرىنە ينۆەستيسيالار تارتۋعا مۇددەلى. قازىرگى كەزدە قازبا وتىنىن يمپورتتاۋعا جىلىنا ميلليارد دوللارعا جۋىق قاراجات جۇمساۋدامىز»، - دەدى دجوسايا ۆورەكە باينيماراما.

ءوز كەزەگىندە ق ر سىرتقى ىستەر ءمينيسترى قايرات ءابدىراحمانوۆ استانا قالاسىنداعى حالىقارالىق مامانداندىرىلعان كورمەسىن وتكىزۋدە قولداۋ كورسەتكەن ەلدەرگە قازاق ەلىنىڭ العىس بىلدىرەتىندىگىن تىلگە تيەك ەتتى. ءمينيستردىڭ ايتۋىنشا، فيدجي رەسپۋبليكاسى قازاقستاننىڭ سەنىمدى سەرىكتەستەرىنىڭ ءبىرى.

 «فيدجي رەسپۋبليكاسى حالىقارالىق ساياسي ارەنادا قازاقستاننىڭ سەنىمدى سەرىكتەسى ەكەندىگىن اتاپ وتكىم كەلەدى. وسى قارىم-قاتىناستاردى جوعارى باعالايمىز جانە ولاردى ەكى ەلدىڭ يگىلىگى ءۇشىن نىعايتۋعا نيەت بىلدىرەمىز. كورمەگە فيدجي رەسپۋبليكاسىنىڭ قاتىسۋى ەكى ەلدىڭ ۇلتتىق سالت-دىستۇرلەرىن تانىپ بىلۋگە مۇمكىندىك بەرەدى»، - دەدى قايرات ءابدىراحمانوۆ. 

ايتا كەتەيىك، فيدجي رەسپۋبليكاسىنىڭ پاۆيلونى تىنىق مۇحيتى پلازاسىندا ورنالاسقان. پاۆيلوندا ەلدىڭ مادەنيەتى، تۋريزم، ساۋدا سالالارىنداعى جانە ينۆەستيسيالىق مۇمكىندىكتەرى ۇسىنىلعان. فيدجي رەسپۋبليكاسىنىڭ پاۆيلونىن كورمەنىڭ ەكى اي جۇمىسى ارالىعىندا 90 000 استام ادام تاماشالاعان.