ورالدىڭ «قازاق اۋىل» اتانىپ كەتكەن بولىگىنىڭ ءبىر جاقسىسى بۇندا كوشەلەردىڭ باسىم كوپشىلىگىنىڭ اتاۋى قازاق تىلىندە. جانە الاشوردا قايراتكەرلەرىنىڭ بارىنە دەرلىك كوشە اتى بەرىلگەن دەسەم قاتتى قاتەلەسپەسپىن. سول الاشوردا ارىستارىنىڭ ءبىرى مۇقامەتجان تىنىشباي ۇلى 1905 جىلى دۋمادا جاساعان بايانداماسىندا بىلاي دەگەن ەكەن: «قازاقتار ورىستىڭ قول استىنا كىرگەننەن بەرى بىردە-بىر شۋاقتى كۇن، باقىتتى ءسات بولعان ەمەس. سودان بەرى ەشكىم دە، شىن مانىندە ەشبىر ادام قازاقتار ءۇشىن ءسال دە بولسا يگىلىكتى ءىس، نەمەسە سول يگىلىكتى ىسكە ۇقساس بىردەڭە ىستەۋ تۋرالى ويلاعان جوق». بۇنداي ازاماتتاردىڭ اتىن كوشەگە عانا ەمەس، ەلدى مەكەنگە بەرسە دا ارتىق بولمايدى عوي، ءيا. جەلتوقسان ايى بويى ەل ءۇشىن جانىن قيعان ارداقتىلارىمىزدى ۇلىقتاساق، بۇل ايدىڭ شىرشالى سيپاتىن وزگەرىپ، الاشتىڭ ايى – تاۋەلسىزدىك ايىنا اينالا باستار ما ەدى...

(نۇرلان ءسادىردىڭ فەيسبۋكتەگى پاراقشاسىنان)