قازاقستان رەسپۋبليكاسىنىڭ پرەزيدەنتى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋ ماقساتىندا 2017 جىلى 23 تامىزدا الماتى مۋزەيىندە «قولجەتىمدى مۋزەي» اتتى مۇمكىندىگى شەكتەۋلى جاندارعا ارنالعان تۇراقتى ەكسپوزيسياسىنىڭ اشىلۋى وتەدى، دەپ حابارلايدى Qamshy.kz اقپارات اگەنتتىگى مۋزەيدىڭ باسپا ءسوز قىزمەتىنە سىلتەمە جاساي وتىرىپ.

ءىس-شارانىڭ نەگىزگى ماقساتى كەلۋشىلەردىڭ بارلىق كاتەگورياسى ءۇشىن مۋزەي ەكسپوزيسياسى مەن باعدارلامالارىنا تەڭ قولجەتىمدىلىكتى قامتاماسىز ەتەتىن ورتانى قالىپتاستىرۋ.

بۇگىندە الماتى قالاسىندا مۇمكىندىگى شەكتەۋلى جانداردىڭ سانى 47 مىڭدى قۇرايدى. ولاردىڭ بارلىعى مۋزەيدە بولماعان، ءتىپتى كەيبىرەۋى مادەني ورىندارعا بارعاندا ولارعا كورسەتىلەتىن جەڭىلدىكتەر تۋرالى بىلمەيدى. 2015 جىلى قازاقستان رەسپۋبليكاسىندا راتيفيكاسيالانعان مۇمكىندىگى شەكتەۋلى جانداردىڭ قۇقىقتارى تۋرالى بۇۇ كونۆەنسياسىنا سايكەس «مەملەكەت-قاتىسۋشىلار مۇمكىندىگى شەكتەۋلى جانداردىڭ مادەني ومىرگە باسقالارمەن تەڭ قۇقىعىن مويىندايدى جانە مۇمكىندىگى شەكتەۋلى جانداردىڭ قولجەتىمدى فورماتتا تەاتر، مۋزەي، كينوتەاتر، كىتاپحانا سەكىلدى مادەني ورىنداردا مادەنيەت تۋىندىسىنا قولجەتىمدىلىگىن، سونداي-اق ۇلتتىق، مادەني قۇندىلىعى بار ەسكەرتكىشتەر مەن نىساندارعا بارىنشا جوعارى قولجەتىمدىلىككە يە بولۋىن قامتاماسىز ەتۋ ءۇشىن بارلىق شارالاردى قابىلدايدى».

ءىس-شارا باعدارلاماسىندا  مۇمكىندىگى شەكتەۋلى جانداردىڭ بارلىق كاتەگورياسى ءۇشىن قولجەتىمدىلىگى بويىنشا قىزمەتتەر ۇسىنىلادى: مۋزەي قورىنان تاكتيلدى ەكسپوناتتار، اۋديوگيدتەر، تيفلوكوممەنتاريي، برايل شريفتىمەن جولسەرىكتەر، ارحەولوگيالىق ارتەفاكتىلەردىڭ رەلەفتى سۋرەتتەرى، زالداردىڭ تاكتيلدى منەموسىزبالارى، سۋردواۋدارمامەن ەكسكۋرسيالار جانە ت.ب.

اشىلۋ سالتاناتىنا الماتى قالاسىنىڭ اكىمى ب. بايبەك، مۇمكىندىگى شەكتەۋلى جاندار ماسەلەسى بويىنشا اكىم كەڭەسشىسى ۆ. الايەۆ، «شىراق» مۇمكىندىگى شەكتەۋلى ايەلدەر اسسوسياسياسى» قوعامدىق قورىنىڭ ءتورايىمى، الماتى قالاسى ءماسليحاتىنىڭ دەپۋتاتى ل. قالتايەۆا، قازاقستان مۇمكىندىگى شەكتەۋلى جاندار ۇيىمى وداعىنىڭ ءتوراعاسى ا. امانبايەۆ، «ارجان» قوعامدىق قورىنىڭ ديرەكتورى ك. وماروۆا جانە ت.ب. قاتىسادى.