«ەكسپو-2017» حالىقارالىق كورمەسى 3 ميلليونىنشى مەيمانىن كۇتىپ الدى. مارتەبەلى مەيمان بولۋ باقىتى رف ازاماتى، «ورتا جانە شاعىن ەكسپورتشىلاردىڭ ەۋرازيالىق قاۋىمداستىعى» ديرەكتورى مىندەتىن اتقارۋشى يۋريي ششۋرىگينگە بۇيىردى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

«ەكسپو-2017» كورمەسىنىڭ باستى وپەراسيالىق ورتالىعىنىڭ قىزمەتكەرلەرى كورمەنىڭ 4 كىرۋ ەسىگىن قاداعالاپ وتىر. كوپشىلىك باقىلاپ وتىرعان جاڭالىقتى جارتى ساعات ۋاقىت كۇتۋگە تۋرا كەلگەن. اقىرى بيلەتتىڭ سوڭعى 4 ءنومىرى ارقىلى كورمە قىزمەتكەرلەرى 3 ميلليونىنشى كەلۋشىنىڭ كىم ەكەنىن انىقتادى. ول كورمەنىڭ ورىنبور كوشەسى جاعىندا ورنالاسقان ەسىكتەن كىردى. 

الەمدىك دارەجەدەگى حالىقارالىق كورمەنىڭ 3 ميلليونىنشى كەلۋشىسى بولۋ باقىتى رەسەي ازاماتى يۋريي ششۋرىگينگە بۇيىرعان ەكەن. مەيمان ماسكەۋدەن «ەۋرازيا اپتاسى» شاراسىنا ارنايى كەلگەن.

«مۇنداي ساتتىلىكتى كۇتكەن جوقپىن، البەتتە. «ەۋرازيالىق اپتا» شاراسىنان قاشىپ كەتىپ، كورمەگە كەلگەن بەتىم. كۇنى كەشە عانا «ەكسپو-2017» حالىقارالىق كورمەسىنە كىرىپ، قازاقستاننىڭ پاۆيلونىنا كىرىپ شىققان ەدىم. ءبىراق رەسەيدىڭ پاۆيلونىن تاماشالاپ ۇلگەرە الماي كەتتىم. وسى سەبەپتى كورمەگە قايتا كەلگەن بەتىم. قازاقستانعا ءتورتىنشى رەت كەلىپ وتىرمىن. ءارتۇرلى وڭىرلەردەن كاسىپكەرلەردى اكەلىپ، سەرىكتەستەردى الىپ كەلگەن ەدىك. قازاقتىڭ ۇلتتىق تاعامدارىن وتە جاقسى كورەمىن»، – دەيدى  كورمەنىڭ 3 ميلليونىنشى كەلۋشىسى.

جولى بولعان مەيماندى ەكسپو باسشىسى احمەتجان ەسىموۆ قۇتتىقتاپ، كورمەنىڭ سيمۆولى مەن پلانشەت سىيعا تارتتى.

«3 ميلليونىنشى مەيمان كەلدى. وسى اپتانىڭ سوڭىندا كەلەتىنىن كۇتىپ وتىرعانبىز. كورمەنى تاماشالاۋشىلاردىڭ سانى كوبەيىپ كەلەدى. ءۇش ميلليونشى مەيماندى 21 كۇن كۇتتىك»، – دەدى احمەتجان ەسىموۆ.

ەسكە سالا كەتسەك، حالىقارالىق كورمەگە 2 ميلليونىنشى كەلۋشى 4 تامىزدا كەلگەن بولاتىن. ورال قالاسىنىڭ عايسا جۇمالييەۆ اتتى كاسىپكەرى كورمەنىڭ 2 ميلليونىنشى مەيمانى اتانىپ، ونى «استانا ەكسپو-2017» ۇلتتىق كومپانياسىنىڭ باسقارما ءتوراعاسى احمەتجان ەسىموۆ قۇتتىقتاعان ەدى. مارتەبەلى مەيمانعا پلانشەت، قۇلاققاپ پەن كورمەگە ءليميتسىز بيلەت سىيعا تارتىلعان بولاتىن.