مەملەكەت باسشىسى ن.نازاربايەۆتىڭ بيىلعى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋى دا قازىرگى جاھاندىق سىن-قاتەرلەرمەن كۇرەس جوسپارى عانا ەمەس، سونداي-اق بولاشاققا، «قازاقستان-2050» ستراتە­گياسى ماقساتتارىنا باستايتىن باستى جول ەكەندىگى انىق. ءبىرىنشى جاڭعىرۋ قازاقستاننىڭ تاۋەلسىزدىك العان العاشقى قيىن-قىستاۋ كەزەڭدەرىمەن تۇسپا-تۇس كەلدى.

ول جىلدارى جوسپارلى ەكونوميكادان نارىقتىق ەكونوميكاعا باتىل قادام جاسالىپ، از شىعىنمەن زور جەتىستىكتەرگە قول جەتكىزدىك. ال ەكىنشى جاڭعىرۋ تۇسىندا ەلوردامىز استاناعا كوشىرىلىپ، «قازاقستان-2030» ستراتەگياسى قابىلداندى. بۇل جىلدارى دا مەملەكەتىمىز ەلەۋلى تابىستارعا جەتىپ، الەمنىڭ باسەكەگە قابىلەتتى 50 ەلىنىڭ قاتارىنا ەندى.

ءۇشىنشى جاڭعىرۋداعى ءبىرىنشى باسىمدىق – ەكونوميكانىڭ جەدەلدەتىلگەن تەحنولوگيالىق جاڭعىرتىلۋى. سونىڭ نەگىزىندە «سيفرلىق قازاقستان» باعدارلاماسىن قابىلداۋ تاپسىرىلىپ، 3D-پرينتينگ، ونلاين-ساۋدا، ءموبيلدى بانكينگ، سيفرلىق قىزمەت كورسەتۋ سەكىلدى دەنساۋلىق ساقتاۋ، ءبىلىم بەرۋ ىسىندە قولدانىلاتىن جانە باسقا دا پەرسپەكتيۆالى سالالاردى دامىتۋ جۇيەسىن ەنگىزۋدىڭ باسىمدىقتارى ەسكەرىلدى. بۇل زامان تالابىنا سايكەس، جاھاندانۋدىڭ جارقىن ۇلگىسى بولىپ، مەكەمەلەردەگى جۇمىس بارىسىن جەدەلدەتۋمەن قاتار ساپاسىن ارتتىرۋعا ارنالادى.

ەلباسى ەكىنشى باسىمدىقتا ءوندىرىس سالالارىنداعى ەكسپورتتىق ونىمدەردى ارتتىرۋ ماسەلەسىن قوزعاعان. ياعني 2025 جىلعا قاراي ەكسپورتتىق شيكىزاتتىق ەمەس ءونىمدى 25%-عا ارتتىرۋ ماقساتى العا قويىلىپ، يمپورتتىق زاتتاردىڭ پايىزدىق مولشەرلەمەسىن تومەندەتۋ ارقىلى دۇنيەجۇزىلىك ساۋداعا كەشەندى ۇلەس قوسۋدى مەڭزەپ، جۇمىس ورىندارىن كوبەيتۋدى قولعا الۋدىڭ ماڭىزى جايىندا ايتىلادى.
ءۇشىنشى ماڭىزدى مەجەگە تاۋ-كەن، مۇناي-گاز كەشەندەرىنىڭ جۇمىسىن جانداندىرۋدى قويىپ، شيكىزاتتى قورىتۋ، ونىڭ ەكونوميكانىڭ ورلەۋىنە تيگىزەر سەپتىگىن مولايتۋ تۋرالى تۇشىمدى تاپسىرمالار بەرىلگەن. سونداي-اق جىلدىڭ سوڭىنا قاراي جەر قويناۋى تۋرالى ارنايى زاڭ قابىلداۋدى قاتاڭ تاپسىردى. ارينە، تابيعي بايلىققا باي قازاقستاننىڭ جەر كەنىشتەرىن يگىلىكپەن يگەرۋ مەملەكەتىمىزدىڭ دامۋ جولىن ايقىنداپ، ءبىرىڭعاي قالىپقا سالىپ، كوزدەگەن ماقساتتارعا جەتۋگە يگى اسەر ەتسە كەرەك.

اگرارلىق سەكتوردى ەكونوميكانىڭ جاڭا درايۆەرىنە اينالدىرۋ جونىندەگى ناقتى قادامدار بۇگىندە اۋىلشارۋاشىلىق سالاسى ماماندارىنىڭ اراسىندا قىزۋ تالقىعا سالىنىپ، قارقىندى جۇمىستار جۇرگىزىلۋدە. قازاقستان الەمدە ءىرى اگرارلىق ەكسپورتتىق ءونىم وندىرۋشىلەرىنىڭ بىرىنە اينالۋى ءتيىس. ول ءۇشىن مەملەكەت باسشىسى تاپسىرماسىمەن «Made in Kazakhstan» برەندىمەن ەكولوگيالىق تازا ونىمدەر شىعارۋ ماقساتىندا جەر-جەرلەردە كورمەلەر ۇيىمداستىرىلىپ، تازا ءونىم ساپاسىن ارتتىرۋ قولعا الىنۋدا.
پرەزيدەنتتىڭ جولداۋلارى مەملەكەتىمىزدىڭ بولاشاققا قاراي باعىتىنىڭ ءتۇزۋ بولۋىنا نەگىزدەلگەن نەگىزگى نۇسقاۋشى قۇجات. ونداعى تاپسىرمالار ءار ازاماتتىڭ كەلەشەگىنىڭ كەمەل دە جارقىن بولۋىنا بارلىق مۇمكىندىكتەردى تۋدىراتىنى ايقىن.