وقو-دا 107 اۋىل اكىمى سايلاندى. بۇل تۋرالى وقو وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا وقو ورتالىق سايلاۋ كوميسسياسىنىڭ ءتوراعاسى الىبەك ومىرالييەۆ حابارلادى. ايتۋىنشا، 2017 جىلدىڭ 7-24 تامىز ارالىعىندا وتكەن اۋىل وكرۋگتەرىنىڭ اكىمدەرىن سايلاۋ ناۋقانىنا 95 وكرۋگ بويىنشا 320 ۇمىتكەر تىركەلسە، ونىڭ 302ء-ى ەر، 18ء-ى ايەل. تىركەلگەندەردىڭ 264ء-ى «نۇر وتان» پارتياسىنىڭ مۇشەلەرى. ال قالعاندارى پارتيالىلىعىن كورسەتپەگەن. بيىل دوداعا تۇسكەندەردىڭ باسىم كوپشىلىگىنىڭ جاسى ەلۋدەن اسقاندار ەكەن دەپ جازادى Qamshy.kz اقپارات اگەنتتىگى.
«سايلاۋدىڭ قورىتىندىسى بويىنشا 107 اكىم سايلاندى. ساياسي ناۋقان ەرەجەگە ساي ءوتتى. ناۋقان بارىسىندا اۋداندىق، قالالىق سايلاۋ كوميسسيالارى جۇمىس ىستەدى. سايلاۋدا ۇمىتكەرلەر بەلسەندىلىك تانىتىپ، ولاردىڭ اراسىندا شىنايى باسەكە، كۇرەس بولدى.
ايتا كەتەيىك، سايلانعان اۋىل اكىمدەردىڭ اراسىندا ەڭ جاسى وتىرار اۋدانى، شىلىك اۋىلىنىڭ اكىمى – ج.سەيىتجانوۆ. جانسۇلتان ءادىلجان ۇلى 25 جاستا. ال ماقتاارال اۋدانىنىڭ ماقتالى اۋىل وكرۋگىنىڭ اكىمى د.مامۋتوۆ 62 جاستا ەكەن. 107 اكىمنىڭ 68ء-ى قايتا سايلانسا، قالعاندارى اۋىل اكىمى لاۋازىمىنا العاش رەت سايلانىپ وتىر»، – دەدى وبلىستىق سايلاۋ كوميسسياسىنىڭ ءتوراعاسى دەپ حابارلادى وقو اكىمىنىڭ باسپا ءسوز قىزمەتى.
ايتا كەتەيىك، مەملەكەت باسشىسى ن.نازاربايەۆتىڭ جارلىعىنا سايكەس، 2013 جىلدان بەرى اۋىل اكىمدەرىن سايلاۋ وتكىزىلىپ كەلەدى. سول جىلى رەسپۋبليكا بويىنشا 181 اۋىل وكرۋگىنىڭ اكىمى سايلاندى. اۋىلدىق وكرۋگ اكىمدەرىنىڭ باسقا جۇمىسقا اۋىسۋى، زەينەتكەرلىككە شىعۋى، قونىس اۋدارۋى، دەنساۋلىعىنىڭ سىر بەرۋى سياقتى ءارتۇرلى سەبەپتەرگە بايلانىستى بوساعان ورىندارعا 2014 جىلى – 8، 2015 جىلى – 24، ال وتكەن جىلى – 42 اۋىل اكىمى سايلانعان.
