پولشا رەسپۋبليكاسىنىڭ پرەزيدەنتى اندجەي دۋدا استانا قالاسىنداعى حالىقارالىق مامانداندىرىلعان كورمەسىنە قاتىستى. جوعارى مارتەبەلى قوناق ەكسپو-2017 كورمەسى اياسىنداعى پولشا رەسپۋبليكاسىنىڭ ۇلتتىق كۇنىنە ارنايى رەسمي ساپارمان كەلدى. ءوز سوزىندە اندجەي دۋدا مەملەكەتتەردىڭ وركەندەۋى ءۇشىن جاڭارتىلاتىن ەنەرگيا كوزدەرىنىڭ دامۋ ماڭىزدىلىعىن اتاپ ءوتتى. ونىڭ ايتۋىنشا، ەكونوميكا، ساۋدا، ونەركاسىپ جانە باسقا سالالاردىڭ قىزمەتى ەنەرگەتيكانىڭ دامۋىنا تىكەلەي تاۋەلدى. ءسوز سوڭىندا اندجەي دۋدا قازاقستان رەسپۋبليكاسىنىڭ ۇكىمەتىن جانە ازاماتتارىن كورمەنى ءساتتى وتكىزۋىمەن قۇتتىقتادى.

«قازىرگى زاماندا ەكونوميكا بولسىن، باسقا دا ماڭىزدى سالالاردا ەنەرگيا سەكتورىنىڭ ماڭىزى زور. بۇگىن ەنەرگەتيكالىق تاۋەلسىزدىكتى ەنەرگيا كوزدەرى ارقىلى جانە باسقا جولدارمەن ورناتۋعا بولادى. ەكسپو-2017 كورمەسىنە قاتىسقان پولشانىڭ جەرگىلىكتى بيلىگى، عالىمدارى مەن ساراپشىلارى بولاشاقتا قولداناتىن قۇندى تاجىريبە جيناقتاعانىنا سەنىمدىمىن. قازاقستان ۇكىمەتى مەن بارشا حالقىن استانا قالاسىنداعى كورمەنى ءساتتى وتكىزۋىمەن شىن جۇرەكتەن قۇتتىقتايمىن. كورمە ورتالىق ازيا اۋماعىندا العاش رەت وتكىزىلۋدە. بۇل سوڭعى 26 جىل ارالىعىنداعى قازاقستاننىڭ جەتىستىكتەرىنىڭ ايقىن دالەلى بولىپ تابىلادى. وسىنداي جوعارى دەڭگەيدە ۇيىمداستىرىلعان شاراعا قاتىسۋ - ءبىز ءۇشىن ۇلكەن قۇرمەت»، - اتاپ ءوتتى اندجەي دۋدا.

ءوز كەزەگىندە قازاقستان رەسپۋبليكاسىنىڭ پرەمەر-مينيسترى باقىتجان ساعىنتايەۆ قازاقستان پولشا رەسپۋبليكاسىن ورتالىق جانە شىعىس ەۋروپاداعى نەگىزگى ساۋدا-ەكونوميكالىق سەرىكتەس رەتىندە قاراستىراتىندىعىن حابارلادى. ونىڭ ايتۋىنشا، ەكى ەل جاڭارتىلاتىن ەنەرگەتيكا، عىلىم، تەحنولوگيا، يننوۆاسيا، كوممۋنيكاسيا، ورمان شارۋاشىلىعى جانە تۋريزم سالالارىنداعى ىنتىماقتاستىقتى دامىتۋ مۇمكىندىگىنە يە.

«ەكى ەل اراسىندا جاسىل تەحنولوگيا سالاسىنداعى ءوزارا ارەكەتتەسۋدىڭ جاڭا باعىتى دامۋدا. پولشا ۇكىمەتى مەن ىسكەرلىك توپتارىن ەكسپو-2017 مۇراسى نەگىزىندە جۇمىس اتقاراتىن بۇۇ اياسىنداعى حالىقارالىق جاسىل ەكونوميكا ورتالىعى ششەڭبەرىندە ىنتىماقتاستىقتى دامىتۋعا شاقىرامىز. بۇگىنگى كۇنى ەلىمىزدە پولشا كاپيتالىنىڭ قاتىسۋىمەن جۇزدەن استام كاسىپورىندار جۇمىس ىستەۋدە. ەكى ەل اراسىنداعى ىنتىماقتاستىقتى كەڭەيتۋگە مۇددەلىمىز»، - دەپ اتاپ ءوتتى باقىتجان ساعىنتايەۆ.

پولشا رەسپۋبليكاسى ۇلتتىق پاۆيلونىنىڭ نەگىزگى تاقىرىبى «تابيعات كەزەڭدەرى». مەملەكەت كورمە اياسىندا بولاشاق ەنەرگياسى سالاسىنداعى جەتىستىكتەر تۋرالى تىڭ اقپاراتتاردى ۇسىنۋدا.

پولشا ەكسپو-2022 حالىقارالىق مامانداندىرىلعان كورمەسىن لودز قالاسىندا ۇيىمداستىرۋعا جانە وتكىزۋگە ءوتىنىم جاسادى.