قازاقستان رەسپۋبليكاسى جوعارعى سوتىنىڭ ءتوراعاسى قايرات ءماميدىڭ جۇڭگو حالىق رەسپۋبليكاسىنا جۇمىس ساپارى باستالدى. ءىس-شارا قىتايدىڭ دۋنحۋان قالاسىنداعى (گانسۋ پروۆينسياسى) جىبەك جولىنداعى سوت ىنتىماقتاستىعى بويىنشا حالىقارالىق فورۋم شەڭبەرىندە وتۋدە، دەپ حابارلايدى Qamshy.kz اقپارات اگەنتتىگى ق ر جوعارعى سوتىنىڭ باسپا ءسوز قىزمەتىنىڭ مالىمەتىنە سۇيەنىپ. 

ساپار بارىسىندا ق.ءمامي قىتايدىڭ جوعارعى حالىق سوتىنىڭ ءتوراعاسى سيان چجوۋ مىرزامەن كەزدەستى. تاراپتار بارلىق سالالار، سونىڭ ىشىندە، قۇقىقتىق ماسەلەلەر بويىنشا قازاقستان-قىتاي اراسىندا قارىم-قاتىناسىنىڭ جوعارى دەڭگەيى قالىپتاسقانىن اتاپ ءوتتى. قازاقستان جوعارعى سوتىنىڭ ءتوراعاسى فورۋمعا شاقىرعانى ءۇشىن العىس بىلدىرە كەلە، اتالعان ءىس-شارانىڭ مەملەكەتارالىق ىنتىماقتاستىقتى قۇقىقتىق قولداۋداعى ماڭىزدىلىعىن اتاپ ءوتتى.

ق.ءمامي قىتايلىق ارىپتەسىن ۇلت جوسپارى شەڭبەرىندە سوت جۇيەسىندە جۇرگىزىلگەن رەفورمالاردىڭ نەگىزگى قورىتىندىلارى، قازاقستانداعى ەلەكتروندى سوت تورەلىگىنىڭ دامۋى جانە قىلمىستىق-پروسەستىك قۇقىقتى جاقسارتۋ بويىنشا جۇرگىزىلىپ جاتقان جۇمىس بارىسى تۋرالى حاباردار ەتتى.

سۋديالاردى وقىتۋ ماسەلەلەرى بويىنشا بىرلەسكەن جۇمىستىڭ جوعارى دەڭگەيى ايرىقشا اتالىپ ءوتىلدى. اڭگىمە بارىسىندا تاراپتار بارلىق تالقىلانعان ماسەلەلەر بويىنشا قىزۋ پىكىر الماستى.   كەزدەسۋ شەڭبەرىندە ەكى ەلدىڭ جوعارى سوت ورگاندارى اراسىندا ىنتىماقتاستىق تۋرالى مەموراندۋمعا قول قويىلدى. قۇجاتتا سوت اكىمشىلىگى، ەلەكتروندى سوت تورەلىگى جانە ءبىلىم بەرۋ باعدارلامالارى سەكىلدى باسىم باعىتتارعا ەرەكشە كوڭىل بولىنگەن. ەكى ەلدىڭ سوت ءبىلىمىن بەرۋ مەكەمەلەرى اراسىنداعى ءوزارا ءىس-قيمىلدى كەڭەيتۋگە ايرىقشا ءمان بەرىلدى.

مەموراندۋمدا حالىقارالىق باعدارلامالار مەن بايلانىستار شەڭبەرىندە قۇقىقتىق اقپاراتپەن جانە سوت پراكتيكاسىمەن الماسۋ، ءتيىستى كونسۋلتاسيالار وتكىزۋ، ءوزارا قولداۋ كورسەتۋ جانە ورتاق ۇستانىمداردى قالىپتاستىرۋ كوزدەلىپ وتىر. ەكى ەل اراسىنداعى قۇقىقتىق كومەكتى نىعايتۋ، سونىڭ ىشىندە، سوت شەشىمدەرىن مويىنداۋ مەن اتقارۋ ماسەلەلەرىن شەشۋ، دالەلدەمەلەردى جيناۋ جانە باسقا دا پروسەستىك ارەكەتتەردى جۇرگىزۋ تۋرالى تاپسىرمالاردى ورىنداۋ ماسەلەلەرى ايتىلعان. قول قويۋ راسىمىندە سويلەگەن سوزىندە ق.ءمامي مەموراندۋم سوت تورەلىگىن جەتىلدىرۋ مەن قۇقىق ۇستەمدىگىمەن بايلانىستى وزگە دە ماسەلەلەر بويىنشا بىرلەسكەن باستامالاردى ىسكە اسىرۋداعى ەكى ەل سوت ورگاندارىنىڭ ءتيىمدى ءوزارا ءىس-قيمىلىنا ىقپال ەتەتىندىگىن اتاپ ءوتتى.