بالقاش كولىندە ءىز-تۇسسىز جوعالىپ كەتكەن بالىقشىلاردىڭ تۋعان-تۋىستارى اقتوعاي اۋدانى جانە بالقاش قالاسىنىڭ تۇرعىندارىن ىزدەستىرۋ جۇمىستارىنا اتسالىسۋعا شاقىرادى، دەپ حابارلايدى قازاقپارات-قا سىلتەمە بەرىپ Qamshy.kz. 24 قىركۇيەكتەن بەرى بالىقشىلار - 20 جاستاعى ارمان بوراش پەن باتىرحان ءجۇنىسوۆتار تابىلماي جاتىر. «قايىعى جانە باسقا دا جابدىقتارى بار، بولىپ جاتقان وقيعاعا بەي-جاي قاراپ وتىرا المايتىن ازاماتتاردىڭ بارلىقتارىن ىزدەستىرۋ جۇمىستارىنا اتسالىسۋىن سۇرايمىز»، - دەيدى تابىلماي جاتقان ارماننىڭ اعاسى قابىل.

قاراعاندى وبلىستىق تج دەپارتامەنتىنىڭ جەدەل-قۇتقارۋ جاساعى ىزدەستىرۋدى جالعاستىرىپ جاتقانىنا قاراماستان، بالىقشىلاردىڭ تۋعان-تۋىستارى ىزدەۋ اۋدانىن كەڭەيتىپ، ىزدەستىرۋگە جۇمىلدىرىلعانداردىڭ سانىن كوبەيتكىسى كەلەدى. ەسكە سالا كەتسەك، ەكى جىگىت 24 قىركۇيەك كۇنى تاڭەرتەڭ بالقاش كولىندە بالىق اۋلاۋ ءۇشىن «پروگرەسس-4» كاتەرىمەن تاسارال ارالىنان وڭتۇستىككە قاراي 25 شاقىرىم جەرگە اتتانعان. سول كۇننەن بەرى بالىقشىلار حابار-وشارسىز كەتكەن.