تۇرعىن ۇي-كوممۋنالدىق شارۋاشىلىعى مەن جىلۋ-ەلەكتر كەشەنى ۇيىمىنىڭ رەسمي وكىلى يان گيرين الماتىدا جىلى تاراتۋ قاشان جۇزەگە اساتىنىن ايتتى دەپ حابارلايدى Qamshy.kz اقپارات اگەنتتىگى.

«ارنايى نورماتيۆتەر بار. ەگەر  اۋا تەمپەراتۋراسى 3 تاۋلىك بويى 8 سەلسي گرادۋس جانە ودان تومەندى كورسەتەتىن بولسا، سول كەزدە جىلۋ بەرىلەتىن بولادى»-دەيدى گيرين.

ونىڭ سوزىنشە جىلۋ قازاندىقتارى جۇمىسقا دايىن. 

«كەيدە ادامدار كۇن سۋىق بولعان سوڭ جىلۋ قوسۋدى سۇرايدى. الايدا كۇن جىلىپ كەتكەن سوڭ جىلۋدى قايتا ءوشىرۋدى سۇراپ، ءبىزدى اۋرەگە سالادى. سەبەبى بۇل قوسىپ-وشىرە سالاتىن، ءبىر ساعاتتا ىستەي سالاتىن جۇمىس ەمەس»-دەيدى ول.

كازگيدرومەت اۋا رايىنىڭ ايدىڭ سوڭىنا دەيىن +15،+14 گرادۋستى ساقتاپ تۇراتىنىن مالىمدەگەن. 

ناقتىراق ايتقاندا، قۇتقارۋ قىزمەتى جىلىتۋ ماۋسىمىنا دايىندىق بارىسىندا جەكە سەكتورلارداعى ءورت قاۋىپسىزدىگىن تەكسەرمەك.

ويتكەنى مەگاپوليستەگى الاتاۋ، تۇركىسىب، جەتىسۋ اۋداندارىنداعى جەكە تۇرعىن ۇيلەردىڭ دەنى كومىرمەن جىلىتىلادى. سوندىقتان ونداعى ءورت قاۋىپسىزدىگى نازاردان تىس قالماق ەمەس.

«جىلىتۋ ماۋسىمىنان كەيىن ادامدار مۇرجالاردى تازارتپايدى، پليتالارىن اۋىستىرمايدى سوندىقتان، كوپ جاعدايدا ىس ءتيىپ جاتادى»، - دەدى الماتى تجد باسقارما باسشىسى مارات بەكبايەۆ.

وسىعان بايلانىستى قۇتقارۋشىلار مەن پوليسيا قىزمەتكەرلەرى 15 قىركۇيەك پەن 15 قازان ارالىعىندا تۇرعىن ۇيلەردى ارالاپ، ءورتتىڭ شىعۋىنا ءورت قاۋىپسىزدىگىنىڭ ساقتالماۋى سەبەپ بولسا، 5 اەك كولەمىندە ايىپپۇل سالىناتىنىن ەسكەرتىپ شىقپاق.

ەنەرگەتيكتەر ورتالىقتاندىرىلعان جىلىتۋ جۇيەسىنە قوسىلعان الماتىلىقتارعا جىلۋ ۋاقىتىندا بەرىلەتىنىن ايتىپ وتىر.

الايدا، سالا ماماندارى جىلىتۋ قۇرىلعىلارىنا جوندەۋ جۇمىستارى ءالى اياقتالماعانىن جەتكىزدى.

ايتا كەتەيىك، الماتىنىڭ ەنەرگەتيكا جەلىلەرىنە جاۋاپتى كومپانيا مەن «KEGOK» اق اراسىندا بىرلەسكەن جوندەۋ جۇمىستارىن جۇرگىزۋ كەستەسى ازىرلەنگەن بولاتىن. بەكىتىلگەن كەستەگە سايكەس، 2017 جىلى «الماتى ەلەكتر جەلىلەرى» اق جەو-1، جەو-2، جەو-3 جانە باتىس جىلۋ كەشەنى مەن قاپشاعاي سەس، كاسكاد سەس بويىنشا 69 نەگىزگى قۇرىلعىعا جوندەۋ جۇمىسىن جۇرگىزۋى قاجەت. ونىڭ ىشىندە 20 ەنەرگەتيكالىق قازاندىعى مەن 13 تۋربواگرەگات، 19 سۋ ىسىتۋ قازاندىعى مەن 17 گيدرواگرەگاتقا جوندەۋ جۇرگىزىلۋى قاجەت بولعان. ەنەرگوجەلىسىنە جاۋاپتى كومپانيا بۇعان الاڭداۋدىڭ قاجەتى جوق ەكەنىن جەتكىزدى.

سالا مامنادىرىنىڭ ايتۋىنشا، جىلۋتى مەرزىمىنە دەيىن بارلىق جوندەۋ جۇمىستارى اياقتالادى.

«ەنەرگوقۇرىلعىلاردى جوندەۋگە 4 ملرد تەڭگە جۇمسالادى. 2017 جىلدىڭ 25 قىركۇيەگىندەگى احۋال بويىنشا 59 قۇرىلعى جوندەۋدەن وتكىزىلىپ، جۇمىستىڭ 86 پايىزى اياقتالدى. قازىرگى ۋاقىتتا 6 نەگىزگى جانە كومەكشى قۇرىلعىنى جوندەۋ جۇرگىزىلىپ جاتىر. جەو-لارعا 2017 جىلى وتىن جەتكىزۋ بويىنشا كەلىسىمشارت جاسالىپ قويعان»، - دەدى «الماتى جىلۋ جەلىلەرى» اق باسقارما ءتوراعاسىنىڭ ورىنباسارى، ءوندىرىس بويىنشا باس ينجەنەر عازي يسمۇحامبەتوۆ.