جامبىل وبلىسىندا جول اپاتىنا سەبەپكەر بولعان توي كورتەجىندەگى كولىك جۇرگىزۋشىسىنە قارسى قىلمىستىق ءىس قوزعالدى، دەپ جازادى Qamshy.kz اقپارات اگەنتتىگى.

كتك جاڭالىقتار قىزمەتىنىڭ حابارلاۋىنشا، جوعارى جالدامدىقپەن كەلە جاتقان «گەلەندۆاگەن» «لادا» جەڭىل كولىگىمەن سوقتىعىسقان. ناتيجەسىندە ءبىر وتباسى تۇگەلدەي ومىردەن ءوتتى. 27 جاستاعى جۇرگىزۋشى 10 جىلعا باس بوستاندىعىنان ايىرىلۋى مۇمكىن. ءبىراق ايەلى، بالاسى جانە نەمەرەسىنەن ايىرىلعان وتاعاسى قانداي جاعداي بولماسىن قىلمىسكەردى بۇدان دا اۋىر جازا كۇتىپ تۇرعانىنا سەنىمدى بولدى.

«مەن ءسىزدى اقتىق دەمىم تاۋسىلعانشا قارعاپ وتەتىن بولامىن. ءسىز مەنىڭ ايەلىمدى، بالامدى، نەمەرەمدى ءولتىردىڭىز. ءسىز... ءسىز مەنى ءولتىردىڭىز. جاقسى، جاقسى. مەن شىعايىن! مۇنىڭ ءبارى وتىرىك، ءارى قاراي وتىرا المايمىن!»، - دەدى كوز جاسىنا ەرىك بەرگەن اگاپاشا امرۋلايەۆ.

قايعىلى وقيعا اۋىل تۇرعىندارىنىڭ ەسىندە ماڭگىگە قالىپ قويدى. كۋاگەرلەر كورتەج ءبىر اۋىلدان قالىڭدىقتى الىپ، كەلەسى اۋىلدان وزگە قوناقتاردى الۋعا جونەلگەن. كولىكتىڭ جارتىسى وزىپ كەتكەن، ال ەكى «گەلەندۆاگەن» كەشىككەندىكتەن، الداعى كولىكتەرگە تەز ارادا جەتىپ الۋدى كوزدەگەن. قايعىلى وقيعا سول ۋاقىتتا ورىن العان.

تەرگەۋ مالىمەتتەرىنە سايكەس، جول تالعامايتىن كولىك «لادانى» 50 مەترگە دەيىن سۇيرەپ اكەتكەن. ەكى جاسار قىز بەن 55 جاستاعى ايەل وقيعا ورنىندا قايتىس بولدى. تاعى ەكى ايەل اۋىر جاراقاتپەن اۋرۋحاناعا جەتكىزىلدى. ونىڭ ءبىرى التى ايلىق سابيگە جۇكتى بولعان وتباسىنىڭ كەلىنى ەدى. وقيعا ورنىنا ءبىرىنشى بولىپ وتاعاسى كەلدى. ونىڭ 23 جاستاعى ۇلى العاشىندا ءتىرى بولعان.

«ول ورىندىقتا وتىرعان. ونىڭ كوكىرەك قۋىسى سىنعان. كومەيى سىنعان. باۋىرى جارىلعان، بۇيرەگى جىرتىلعان، ىشىندە ساۋ دۇنيە قالماعان. سولاي بولا تۇرا ول ماعان تەسىلە قارادى دا، كۇلدى. مەنىمەن قوشتاستى. ال مەن مۇنى بىلمەگەنمىن. مەنىمەن قوشتاسىپ جاتقانىن اڭعارماپپىن دا...»، - دەدى اكەسى.

ال ايىپتالۋشى 10 جىلعا باس بوستاندىعىنان ايىرىلۋى مۇمكىن.

«مەن تەك كەشىرىم سۇرايمىن. كەشىرىڭىزدەر، وتىنەمىن. ءدال وسىلاي بولعانىن قالاعان جوقپىن»، - دەدى «گەلەندۆاگەندى» باسقارعان نۇربولات شولپانقۇلوۆ.